آج کا شعر - 5

[حسان خان]

تیرے مغنی کی ہر صدا میں
تیری ہی خوشبو مہک رہی ہے
ہر ایک سُر میں، ہر ایک لے میں
تیری محبت چمک رہی ہے

وطن کی مٹی گواہ رہنا۔۔۔

 

[غلام مجتبیٰ ملک]

انشاء جی یہ اور نگر ہے، اس بستی کی رِیت یہی ہے
سب کی اپنی اپنی آنکھیں، سب کا اپنا اپنا چاند

(ابنِ انشاء)​

 

[محمد عادل عزیز]

کھلتا کسی پہ کیوں کر میرے دل کا معاملہ
شعروں کے انتخاب نے رسوا کیا مجھے
غالب

 

[مدیحہ گیلانی]

مری طلب تھا ایک شخص وہ جو نہیں ملا تو پھر
ہاتھ دعا سے یوں گرا، بھول گیا سوال بھی

شام کی نا سمجھ ہوا پوچھ رہی ہے اک پتا
موج ہوائے کوئے یار، کچھ تو مرا خیال بھی
پروین شاکر

 

[محمداحمد]

دنوں میں بھر گئے سب زخم، سال تک نہ رہے
تری جدائی کے صدمے، وصال تک نہ رہے
متین ایسے تعلق کا فائدہ کیا ہے
جو ٹوٹ جائے تو دل کو ملال تک نہ رہے

ارشاد متین​

 

[نیرنگ خیال]

لفظ تاثیر سے زندہ ہیں تلفظ سے نہیں
اہلِ دل آج بھی ہیں اہلِ زباں سے آگے

 

[محمداحمد]

لفظ تاثیر سے زندہ ہیں تلفظ سے نہیں
اہلِ دل آج بھی ہیں اہلِ زباں سے آگے

بہت خوب نیرنگ خیال بھائی۔۔۔۔!

یعنی :

حرف جذبوں سے رنگ پاتے ہیں
آگہی شاعری نہیں ہوتی


​

 

[نیرنگ خیال]

فراقِ زیست کا دھڑکا لگا رہا محسن
تمام عمر جیئے مرگِ ناگہاں کے لئے

محسنؔ بھوپالی

 

[محمداحمد]

کھلتا کسی پہ کیوں کر میرے دل کا معاملہ
شعروں کے انتخاب نے رسوا کیا مجھے
غالب

یہ تو غالباً پروین شاکر کا شعر ہے۔

 

[نیرنگ خیال]

یہ تو غالباً پروین شاکر کا شعر ہے۔

غالب کی غزل کا مقطع ہے یہ ۔۔۔ دیوان غالب جو وکی سورس پر موجود ہے۔ اس میں یہ غزل موجود ہے۔۔۔ مکمل غزل ملاحظہ کیجیے

ہے آرمیدگی میں نکوہش بجا مجھے
صبحِ وطن ہے خندۂ دنداں نما مجھے

ڈھونڈے ہے اس مغنّیِ آتش نفس کو جی
جس کی صدا ہو جلوۂ برقِ فنا مجھے

مستانہ طے کروں ہوں رہِ وادیِ خیال
تا باز گشت سے نہ رہے مدّعا مجھے

کرتا ہے بسکہ باغ میں تو بے حجابیاں
آنے لگی ہے نکہتِ گل سے حیا مجھے

کھلتا کسی پہ کیوں مرے دل کا معاملہ
شعروں کے انتخاب نے رسوا کیا مجھے

 

[السید کامل عباس الجعفري]

جانیے کس قدر بچے گا "وہ"
اُس سے جب "ہم" گھٹائے جائیں گے

جون​

 

[جنید اقبال]

دَرد کا شَہر بساتے ہُوئے رو پڑتا ہُوں
روز گھر لوٹ کے آتے ہُوئے رو پڑتا ہُوں
جانے کیا سوچ کے لے لیتا ہُوں تازہ گجرے
اور پھر پھینکنے جاتے ہُوئے رو پڑتا ہُوں
جسم پہ چاقو سے ہنستے ہُوئے جو لکھا تھا
اَب تو وُہ نام دِکھاتے ہُوئے رو پڑتا ہُوں
راہ تکتے ہُوئے دیکھوں جو کسی تنہا کو
جانے کیوں آس دِلاتے ہُوئے رو پڑتا ہُوں
لوگ جب روگ کی تفصیل طلب کرتے ہیں
سخت اِک بات چھپاتے ہُوئے رو پڑتا ہُوں
گرم تھی چوٹ تبھی لکھ سکا یہ غم کی بیاض
اَب تو اِک شعر سناتے ہُوئے رو پڑتا ہُوں
روز دِل کرتا ہے منہ موڑ لوں میں دُنیا سے
روز میں دِل کو مناتے ہُوئے رو پڑتا ہُوں
اِسمِ لیلیٰ کو فقط اِس لیے رَکھا مخفی
پھُوٹ کر نام بتاتے ہُوئے رو پڑتا ہُوں
دُور جاتا ہو کوئی یار سبھی کہتے ہیں
صرف میں ہاتھ ہلاتے ہُوئے رو پڑتا ہُوں
چند چپ چاپ سی یادوں کا ہے سایہ مجھ پر قیس بارِش میں نہاتے ہُوئے رو پڑتا ہُوں​

 

[نیرنگ خیال]

تم نے چھیڑا تو کچھ کھلے ہم بھی
بات پر بات یاد آتی ہے

عزیزؔ لکھنوی

 

[محمداحمد]

غالب کی غزل کا مقطع ہے یہ ۔۔۔ دیوان غالب جو وکی سورس پر موجود ہے۔ اس میں یہ غزل موجود ہے۔۔۔

شکریہ ۔۔۔۔!

دعویٰ ء سخن فہمی اور حال یہ اپنا
شعر چچا غالب کا اور نام پرویں کا

ہماری یادداشت اور سخن فہمی دونوں کو ہی "بیڈ ریسٹ" کی ضرورت ہے۔

 

[نیرنگ خیال]

شکریہ ۔۔۔ ۔!

دعویٰ ء سخن فہمی اور حال یہ اپنا
شعر چچا غالب کا اور نام پرویں کا

ہماری یادداشت اور سخن فہمی دونوں کو ہی "بیڈ ریسٹ" کی ضرورت ہے۔

شاید آپ سمجھے ہوں کہ پروین غالب ہی ہوتی ہے۔۔۔

 

[محمداحمد]

شاید آپ سمجھیں ہوں کہ پروین غالب ہی ہوتی ہے۔۔۔

ہم کچھ سمجھتے تو بات ہی کیا تھی۔

 

[محمداحمد]

مجھ میں یوں تازہ ملاقات کے موسم جاگے
آئینہ ہنسنے لگا ہے مری تیاری پر

سلیم کوثر​

 

[محمداحمد]

کبھی اِس جرم پہ سر کاٹ دئے جاتے تھے
اب تو انعام دیا جاتا ہے غدّاری پر

سلیم کوثر​

 

[حسان خان]

آفتابِ داغِ دل کا سامنا اچھا نہیں
سانولا رنگ آپ کا اے مہ لقا ہو جائے گا
(تعشق لکھنوی)

 

[صائمہ شاہ]

میں تو خود پر بھی کفایت سے اسے خرچ کروں
وہ ہے مہنگائی میں مشکل سے کمایا ہوا شخص
شہزاد نیر​