آج کا شعر - 5

[محمداحمد]

آ کے پتھر تو مرے صحن میں دو چار گرے
جتنے اس پیڑ کے پھل تھے پسِ دیوار گرے

کیا کہوں دیدہ ء تر، یہ تو مرا چہرہ ہے
سنگ کٹ جاتے ہیں بارش کی جہاں دھار گرے

شکیب جلالی

 

[مدیحہ گیلانی]

فطرت عشق کے نثار اس کو مرا خیال تھا
صدقے غرورِ حسن کے مجھ سے چھپا گیا کوئی
(بہزاد لکھنوی)

 

[مدیحہ گیلانی]

دریافت کیجے گردشِ صد کہکشاں مگر
بس اک مقامِ حضرتِ انساں نہ پوچھیے
جب سے خبر ہوئی کہ ہے بسمل ابھی حیات
اٹھتی نہیں ہیں، غیرتِ مژگاں نہ پوچھیے
فاتح الدین بشیر

 

[محمداحمد]

فاصلے راہِ تعلق کے مٹیں گے کیونکر
حسن پابندِ انا، عشق تن آسان بہت

امجد اسلام امجد

 

[مدیحہ گیلانی]

نگاہِ شوق نہیں، آہِ صبح و شام نہیں
عجب فسردہ دلی حیف مجھ پہ طاری ہے
یہی متاع ہے میری، یہی مرا حاصل
نہالِ غم کی لہو سے کی آبیاری ہے
نگہ میں آبِ رُخِ یار، ہاتھ میں تیشہ
زمیں کی مانگ اسی جہد نے سنواری ہے
محمد وارث

 

[محمداحمد]

سفر نصیب ہیں ہم کو سفر میں رہنے دو
سفالِ جاں کو کفِ کوزہ گر میں رہنے دو

پیرزادہ قاسم

 

[مدیحہ گیلانی]

یاد ہے سیرِ چراغاں ناصرؔ
دل کے بجھنے کا سبب یاد نہیں
محمداحمدبہت عمدہ ۔

 

[محمداحمد]

ہم اُسے دیکھنے کہاں جائیں
ساتھ رہتا ہو جو نظر کی طرح

لیاقت علی عاصم

 

[مدیحہ گیلانی]

سمجھے تھے میر ہم کہ یہ ناسُور کم ہُوا
پِھر اِن دِنوں میں دیدہ ء خُوں بار نم ہُوا
میر

 

[محمداحمد]

ترکِ دنیا کا ارادہ ہی کیا تھا کہ وہ شخص
آگیا خواہشِ دنیا کو جگانے کے لئے

جمال احسانی

ہم تو سمجھے تھے کہ اک زخم ہے بھر جائے گا
کیا خبر تھی کہ رگِ جاں میں اُتر جائے گا

پروین شاکر

 

[صائمہ شاہ]

غمِ ابلاغ میں ہم لوگ آدھے رہ گئے ہیں
مکمل سوچ کی ترسیل کا غم کھا گیا ہے

اخترعثمان

 

[حسان خان]

یہ مہر و ماہ و کواکب کی بزمِ لامحدود
صلائے دعوتِ پرواز ہے بشر کے لیے
(حبیب احمد صدیقی)

 

[نیرنگ خیال]

سن کر میرا فسانہ غم اس نے یہ کہا​

ہوجائے جھوٹ سچ، یہی خوبی زباں کی ہے​

داغ دہلوی​

 

[صائمہ شاہ]

محبت تھی چمن سے لیکن اب یہ بد دماغی ہے
کہ موجِ بوئے گل سے ناک میں آتا ہے دم میرا

غالب

 

[صائمہ شاہ]

مسعود،حرف و صوت کے مکتب میں عمر بھر
کرتا رہا ہوں ___ ذات کے سادھو سے گفتگو

مسعود مُنور

 

[شمشاد]

بتخانہ ہی میں چل بیٹھ یا کعبہ میں حسن اب
یوں کب تلک دوانے تو دردبدر رہیگا
(میر حسن)

 

[مدیحہ گیلانی]

جہاں تلک بھی یہ صحرا دِکھائی دیتا ہے ۔۔۔۔
میری طرح سے اکیلا دِکھائی دیتا ہے ۔۔۔۔۔!
شکیب جلالی

 

[مدیحہ گیلانی]

سلامت آپ کا حسنِ لازوال مگر ۔۔۔۔۔
ہم آج ہی کے ہیں، کل کے اُمیدوار نہیں ۔۔۔۔۔
یاس یگانہ چنگیزی

 

[مدیحہ گیلانی]

نہ ہوئے تیری خاکِ پا، ہم نے -
خاک میں آپ کو ملا دیکھا -
بہادر شاہ ظفر

 

[شمشاد]

تنہائیوں کا راج ہے دل میں تمہارے بعد​

ہم نے کسی کو اس میں بسایا نہیں کبھی
(تسنیم کوثر)