آج کا شعر - 5

[حسان خان]

لبِ لعل کو کس کے جنبش ہوئی
ہوا میں ہے کچھ رنگ عناب کا
(شیفتہ)

 

[صائمہ شاہ]

داور حشر کا انصاف اشارے ان کے
بس یہی ہے کسی بندے کا خُدا ہو جانا

حفیظ جالندھری

 

[شمشاد]

حشر میں پیشِ خدا فیصلہ اس کا ہو گا​

زندگی میں مجھے اس گبر کو ترسانے دو
(سیاح)

 

[محمد وارث]

اب ہم ہیں اور کشمکشِ اضطرابِ دل
وہ دن گئے کہ دعویِٰ صبر و قرار تھا

حبیب اشعر دہلوی

 

[مزمل شیخ بسمل]

صحبتِ واعظ میں بھی انگڑائیاں آنے لگیں
راز اپنی مے کشی کا کیا کہیں کیونکر کھلا

یاس یگانہ

 

[حسان خان]

اے تابِ برق تھوڑی سی تکلیف اور بھی
کچھ رہ گئے ہیں خار و خسِ آشیاں ہنوز
(شیفتہ)

 

[مدیحہ گیلانی]

ناموسِ جان و دل کی بازی لگی تھی ورنہ
آساں نہ تھی کچھ ایسی راہِ وفا شعاراں

 

[محمداحمد]

کیا میری طرح خانماں برباد ہو تم بھی​

کیا بات ہے تم گھر کا پتہ کیوں نہیں دیتے​

​

مقبول نقش​

 

[حسان خان]

اہلِ زمانہ دیکھتے ہیں عیب ہی کو بس
کیا فائدہ جو شیفتہ عرضِ ہنر کریں
(شیفتہ)

 

[محمداحمد]

ہنر کا حق تو ہوا کی بستی میں کون دے گا​

یہاں میں اپنا دیا جلا لوں یہی بہت ہے​

​

محشر بدایونی​

 

[حسان خان]

ہر سنگ میں شرار ہے تیرے ظہور کا
موسیٰ نہیں کہ سیر کروں کوہِ طور کا
(مرزا رفیع سودا)

 

[حسان خان]

عشق کی بھی منزلت کچھ کم خدائی سے نہیں
ایک سا احوال یاں بھی ہے گدا و شاہ کا
(سودا)

ترکی کے شاعر محمد فضولی نے یہی مضمون یوں باندھا ہے:
وادیِ وحدت حقیقت‌دہ مقامِ عشق‌دِر
کیم مشخص اولمز اول وادی‌دہ سلطان‌دن گدا

یعنی عشق کی جگہ ہی درحقیقت وادیِ وحدت ہے، کیونکہ اّس وادی میں سلطان و گدا کی تشخیص نہیں ہوتی۔

 

[صائمہ شاہ]

آنکھوں سے دور ہو کے بھی دل کے قریں رہے
یہ ارتباط ہو ، تو وہ چاہے ۔۔۔۔۔۔۔۔۔۔۔۔۔۔۔۔ کہیں رہے

جگرمراد آبادی

 

[محمداحمد]

نسیمِ صبح میں نکہت، نہ پھول میں خوشبو
یہی چمن ہے تو ایسے چمن سے دُور چلیں

شکیل بدایونی

 

[حسان خان]

پڑھیے دردد حُسنِ صبیح و ملیح پر
جلوہ ہر ایک پر ہے محمد کے نور کا
(سودا)

 

[محمداحمد]

درمیانِ قعرِ دریا تختہ بندم کردئی​

باز می گوئی کہ دامن تر مکن ہُشیار باش​

 

[حسان خان]

خوب رویا قبر میں جس دم چلے منکر نکیر
یاد آیا مجھ کو تنہا چھوڑ جانا یار کا
(امیر اللہ تسلیم لکھنوی)

 

[حسان خان]

جو عالی رتبہ ہیں درکار کیا امدادِ غیر اُن کو
فتیلہ ہے نہ روغن ہے چراغِ آسمانی میں
(مولوی سید فضلِ رسول خان واسطی)

 

[حسان خان]

ہوں گے ٹھنڈے دست و پا بادِ اجل سے ایک دن
گرم ہو کر ہے اکڑنا اہلِ دنیا کا عبث
(سید افتخار علی شاہ چشتی قادری)

 

[محمد وارث]

دل کو تسکین نہیں اشکِ دما دم سے بھی
اِس زمانے میں گئی ہے بَرَکت غم سے بھی

میر