آج کا شعر - 5

[عرفان سرور]

کیوں کر نہ لپٹ جاؤں صراحی کے گلو سے
بیعت مجھے پھر تازہ ہوئی دستِ سُبو سے
(انشا اللہ خان انشا)

 

[عرفان سرور]

امیر، جاتی جوانی یہ مُجھ سے کہتی ہے
خزاں نہ سمجھو مجھے، آخری بہار ہوں میں
(امیر مینائی)

 

[عرفان سرور]

آگہی میں اک خلا موجود ہے
اس کا مطلب ہے خدا موجود ہے

(عدم)

 

[محمداحمد]

یاد آتے ہو اس سلیقے سے​

جیسے بارش ہو وقفے وقفے سے​

 

[Rashid Ashraf]

اس کے پیالے میں زہر تھا ہی نہیں
ورنہ سقراط مر گیا ہوتا
لیاقت علی عاصم

 

[مغزل]

ایک تو خواب لیے پھرتے ہو گلیوں گلیوں !!!
اس پہ تکرار بھی کرتے ہو خریدار کے ساتھ
احمد فراز

 

[غ۔ن۔غ]

یہ سوچ کر کے غم کے خریدار آگئے
ہم خواب بیچنے سر بازار آگئے

 

[کاشفی]

دونوں راہیں چھوڑ دی ہیں ہم نے مشکل دیکھ کر​

دیر و کعبہ کون جائے، وسعتِ دل دیکھ کر​

(باسط بسوانی)​

 

[کاشفی]

نگاہِ شوق کی رعنائیوں کا کیا کہنا​

مگر خدا کی قسم آپ کا جواب نہیں​

(فانی بدایونی)​

 

[Rashid Ashraf]

دل کو ہم سمجھا کے لائے کوئے جاناں سے حسن​

دل ہمیں سمجھا بجھا کر، کوئے جاناں لے چلا​

(حسن رضا بریلوی)​

 

[کاشفی]

بچوں کو ماں کی گود بھی مکتب سے کم نہیں​

اِس مدرسے میں حاجتِ لوح و قلم نہیں​

(پنڈت برج نراین چکبست لکھنوی)​

 

[عرفان سرور]

جفا دیکھو جنازے پر مرے آئے تو فرمایا
کہو تم بے وفا ٹھہرے کہ اب ہم بے وفا ٹھہرے
(امیر مینائی)

 

[عرفان سرور]

باتیں ناصح کی سُنیں، یار کے نظارے کیے
آنکھیں جنت میں رہیں، کان جہنم میں رہے

اُن کے تڑپانے کی طاقت جو نہیں ہم میں نہ ہو
کاش اپنے ہی تڑپنے کی سکت ہم میں رہے
(امیر مینائی)

 

[عرفان سرور]

تہمت نہ کہہ خدا کے لیئے مجھ پہ زاہد
کب میں نے توبہ کی تھی جو توبہ شکن ہوا
(داغ دہلوی رحمتہ اللہ علیہ)

 

[عرفان سرور]

صبحِ بہار ہے، مجھے ساقی! پلا شراب
سب جانتے ہیں عید کا روزہ حرام ہے
(آتش)

 

[عرفان سرور]

یہ بزم مئے ہے یاں کوتاہ دستی میں ہے محرومی
جو بڑھ کر خود اٹھا لے ہاتھ میں وہ جام اسی کا ہے
(شاد عظیم آبادی)

 

[عرفان سرور]

برق ناحق چمن میں ہے بدنام
آگ پھولوں نے خود لگائی ہے
(آنند نارائن ملّا)

 

[عرفان سرور]

دشنام یا دعا تھی، شکایت کہ شکر تھا
وہ منہ ہی منہ میں چلتے ہوئے کچھ تو کہہ گیا
(داغ رحمتہ اللہ علیہ)

 

[غ۔ن۔غ]

ترے وصال کا لمحہ حباب لگتا ہے
یہ خواب جاگتی آنکھوں کا خواب لگتا ہے

یہ میرے ہاتھ اسے چھو کے دیکھنا چاہیں
وہ آدمی تو مجھے اک سراب لگتا ہے

(ثمینہ راجہ)

 

[عرفان سرور]

شب بیتی چاند بھی ڈوب چلا زنجیر پڑی دروازے پر
کیوں دیر گئے گھر آئے ہو سجنی سے کرو گے بہانہ کیا
(ابنِ انشا)