آج کا شعر - 5

[غلام مجتبیٰ ملک]

میرے سنگِ مزار پر فرہاد
رکھ کے تیشہ کہے ہے یا استاد!

(میر محمد تقی میر)

 

[کاشفی]

مِرا نشیمن بکھر نہ جائے، ہوا قیامت کی چل رہی ہے
جو خواب زندہ ہے مر نہ جائے، ہوا قیامت کی چل رہی ہے
(شاہدہ حسن)

 

[کاشف اکرم وارثی]

جو سود خور ہیں بہتر ہے وہ کنارہ کریں
یہ کار ِ عشق ہے ، اِس میں خسارہ کافی ہے

 

[مانی عباسی]

اہلِ جگر کو صاحبِ خنجر نہیں ملے
وہ جو ملے تو نظریں ملا کر نہیں ملے

مانی​

 

[مدیحہ گیلانی]

جو کھلی کھلی تھیں عداوتیں مجھے راس تھیں​

یہ جو زہر خند سلام تھے، مجھے کھا گئے​

خورشیدؔ رضوی ۔​

​

 

[حسان خان]

اس پہ صلوٰت پڑھو کر کے جگر دو ٹکڑے
جس کے نانا نے کیا قرصِ قمر دو ٹکڑے
(منسوب بہ میر انیس)

 

[عبدالحسیب]

خلوتِ رنگیں میں بھی ڈستا ہے یوں دنیا کا حال
جیسے پیتے ہوئے، بھوکے بال بچّوں کا خیال

-مخدوم محئ الدین ​

 

[حسان خان]

لطافت طائرِ روحِ رواں کی دیکھ حیراں ہوں
کہ اس نے قالبِ خاکی میں کیسے آشیاں باندھا
(بہرام جی جاماسپ جی)

 

[حسان خان]

اس دور میں تعلیم ہے امراضِ ملت کی دوا
ہے خونِ فاسد کے لیے تعلیم مثلِ نیشتر
(علامہ اقبال)

 

[مانی عباسی]

تہلکہ ڈال دیتی ہے عرشِ آسمانی میں
محبت جب خدا کا نام لیتی ہے جوانی میں

شاعر:نامعلوم

 

[ابوذر نقوی]

ہم نے چاہا تھا کہ دنیا سے کنارہ کر لیں​

ہم نے دیکھا تو ہمیں رونقِ دُنیا نکلے​

(مشفق خواجہ - عبدالحئی)​

بہت خوب

 

[عمراعظم]

آدمی کو اس طرح اغراض کی دیمک لگ گئی
’خلق مٹی میں ملا ، رشتے ’برادہ ہو گئے

 

[مدیحہ گیلانی]

میرے مکاں تک آئی تو خود سر تھی کس قدر
اس کی گلی سے باد صبا با ادب چلی

اوروں کا ذکر زور کے لہجے میں تھا مگر
میری ہی بات صرف وہاں زیر لب چلی
اسعد بدایونی

 

[شوکت پرویز]

بلندی چاہئے انسان کی فطرت میں پوشیدہ
کوئی ہو بھیس لیکن شانِ سلطانی نہیں جاتی
(جگر مراد آبادی)

 

[محمداحمد]

زخموں کو پھول، خون کو رنگِ قبا کہیں ​

پتھر یہ چاہتے ہیں اُنہیں آئینہ کہیں​

​

صحرا ہیں تشنگی کے، سبیلیں ہیں زہر کی​

پی کر مریں اِسی کو، اِسی کو دوا کہیں​

​

تاج بھوپالی​

 

[مدیحہ گیلانی]

کسی کے پاس حرفِ دلنشیں باقی نہیں ورنہ
قبول اب بھی دلوں کی خاک میں رد سے زیادہ ہے
___ (خورشید رضوی ) __

 

[نیلم]

عجب مکاں ہے کہ جس میں مکیں نہیں آتا
حُدودِ شہر میں کیا ،دل کہیں نہیں آتا

 

[مزمل شیخ بسمل]

اے مرے ہمنشیں چل کہیں اور چل
اس چمن میں اب اپنا گزارہ نہیں

بات پھولوں کی ہوتی تو سہہ لیتے ہم
اب تو کانٹوں پہ بھی حق ہمارا نہیں

استاد قمر جلالوی۔

 

[مدیحہ گیلانی]

غم خانۂ جہاں میں وُقعت ہی کیا ہماری
اک نا شُنیدہ اُف ہیں، اک آہِ بے اثر ہیں
اکبر الٰہ آبادی

 

[شیزان]

​

کیسے کیسے ہجر جھیلے ہیں در و دیوار نے​

پھر بھی قائم ہے حصارِ جسم و جاں اپنی جگہ​

​

داستاں گو قتل ہوتا ہے کہانی میں سلیم​

تب جنم لیتی ہے کوئی داستاں اپنی جگہ​

​

سلیم کوثر​