آج کا شعر - 5

[عرفان سرور]

میں سوالِ وصل کر کے اس ادا پر مٹ گیا
ہنس کے فرمایا کہ یہ درخواست نا منظور ہے
(حیات بخش رسا بلند شہری)

 

[عرفان سرور]

ترے حسنِ مغرور سے نسبتیں ہیں
کہیں ہم نہ رہ جائیں مغرور ہوکر
(جگر)

 

[عرفان سرور]

گئے جس بزم میں روشن چراغ حسن سے کردی
بہارِ تازہ آئی، تم اگر گلزار میں آئے
(آتش)

 

[عرفان سرور]

ہستی جسے کہتے ہیں اک سادہ حقیقت ہے
رنگین نگاہوں نے رنگیں بنا ڈالی
(جگر)

 

[کامران احمد]

غور سے دیکھ تِرے ساتھ چلی آئی ہیں
تیرا جانا مِری آنکھوں کو گوارہ ہی نہ تھا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ یاسمین حبیب​

 

[عرفان سرور]

بھول کر شاید کبھی آجائےان کو بھی خیال
یوں پسند آئی ہے اس کوچے کی رسوائی مجھے
حسرت موہانی

 

[عرفان سرور]

جھونکا جو کوئی آئے مدینے کی ہوا کا
ٹھنڈا ہو کلیجہ ترے مشتاقِ لقا کا

بیمار ہوں میں الفت محبوب خدا کا
اس درد میں ملتا ہے مزا مجھ کو دوا کا
(امیر مینائی رحمتہ اللہ علیہ)

 

[عرفان سرور]

کہاں رہ کے توبہ نباہوں الہٰی ؟
کہ جنت میں بھی مجمعِ حور نکلا
(داغ دہلوی رحمتہ اللہ علیہ)

 

[کاشفی]

کام ہے میرا تغیّر، نام ہے میرا شباب​

میرا نعرہ انقلاب و انقلاب و انقلاب​

(جوش ملیح آبادی)​

 

[عرفان سرور]

حسینوں کی وفا کیسی جفا کیا؟
جو دل آیا تو پھر اچھا بُرا کیا؟
(داغ دہلوی رحمتہ اللہ علیہ)

 

[عرفان سرور]

مجھ کو وعدے نے ترے جی سے گزرنے نہ دیا
میں نے چاہا تھا کہ مرجاؤں تو مرنے نہ دیا
(داغ دہلوی رحمتہ اللہ علیہ)

 

[عرفان سرور]

جانتا ہوں ہورہا ہے جو نہ ہونا چاہئے
بحث یہ ہے کب تلک اس غم میں رونا چاہئے
(جلال الدین اکبر)

 

[عرفان سرور]

ہوئی نہ قدر کبھی یہ ملال لے کے چلے
لحد میں ساتھ ہم اپنا کمال لے چلے
(حکیم میر ضامن علی صاحب جلال لکھنوی)

 

[عرفان سرور]

عار کیا ہے تجھے لوگوں کی ملامت سے نیاز
عاشقوں میں تو اکیلا ہی تو بدنام نہیں
حضرت شاہ نیاز بریلوی

 

[عرفان سرور]

ذبح کرتا ہے تو ، میرے دست و بازو کھول دے
رحم کر قاتل کہ بے تڑپے مزا ملتا نہیں
(امیر مینائی)

 

[عرفان سرور]

ہم بہت لاغر ہیں پہناؤ نہ ہم کو ہتھکڑی
ڈال دو چھلّا کوئی اپنا ہمارے ہاتھ میں
(امیر مینائی)

 

[عرفان سرور]

سرکشی اہلِ تواضع سے کوئی چلتی ہے
پست دروازہ سے خود آتا ہے انساں جھک کر

مرتبہ پیشِ خدا ہوتا ہے اتنا ہی بلند
جس قدر چلتا ہے انساں سے انساں جھک کر
(امیر مینائی)

 

[عرفان سرور]

سیہ کاری سے جی بھرتا نہیں پر شرم آتی ہے
کہاں تک بوجھ رکھئیے کاتبِ اعمال کے سر پر
(امیر مینائی)

 

[عرفان سرور]

ہم نے حافظ سے بگاڑی ہے نہ شیطاں سے کبھی
دن کو مسجد میں رہے رات کو میخانے میں

 

[عرفان سرور]

کوئی دُنیا سے کیا بھلا مانگے؟
وہ بیچاری تو آپ ننگی ہے
(انشا اللہ خان انشا)