آپ کے پسندیدہ اشعار!

[یاز]

سو بار چمن مہکا، سو بار بہار آئی
دنیا کی وہی رونق، دل کی وہی تنہائی
غلام مصطفیٰ تبسم

 

[ایمن چودھری]

تنہائی میں کرنی تو ہے اک بات کسی سے
لیکن وہ کسی وقت اکیلا نہیں ہوتا
احمد مشتاق

 

[محمد وارث]

واعظو، آتشِ دوزخ سے جہاں کو تم نے
یہ ڈرایا ہے کہ خود بن گئے ڈر کی صورت
حالی

 

[فرقان احمد]

میں اِک چراغِ سرِ دشتِ نامُرادی تھا
ہَوائے شہرِ تمنّا بجھا گئی مجھ کو ۔۔۔۔۔!

حزیں صدیقی

 

[یاز]

نہ پوچھ عالمِ برگشتہ طالعی آتش
برستی آگ، جو باراں کی آرزو کرتے
حیدر علی آتش

 

[فرحان محمد خان]

ہم وارداتِ قلب سمجھتے تھے عشق کو
یہ فتنہ واردات سے آگے کی چیز ہے
راحیل فاروق

 

[سردار محمد نعیم]

ہم تجھ سے کس ہوس کی فلک جستجو کریں
دل ہی نہیں رہا ہے کہ کچھ آرزو کریں
خواجہ میر درد

 

[محمد وارث]

بہار و خزاں کم نگاہوں کے وہم
برے یا بھلے، سب زمانے ترے
عدم

 

[La Alma]

شعارِ زیست ہنر تھا سو ہم نہ جان سکے
جو کام ہم نے کیا دوسرا نہ کرتا تھا

 

[فرقان احمد]

جادُو ہے یا طِلسْم تمہاری زبان میں !
تم جُھوٹ کہہ رہے تھے، مجھے اعتبار تھا

بے خود دہلوی

 

[زارا آریان]

صراحی خم کرے گردن اٹھیں تعظیم کو ساغر
افق مسجد میں سجدہ کر کے میخانہ میں آتا ہے

افق لکھنوی ( منشی دوارکا پرشاد )
لکھنؤ | ۱۸۶۴ – ۱۹۱۳
کتاب : ملک الشعراء منشی دوارکا پرشاد افق لکھنوی

 

[فرقان احمد]

ہمارے دل پہ جو زخموں کا باب لکھا ہے
اُسی میں وقت کا ۔۔۔ سارا حِساب لکھا ہے!

کُچھ اورکام تو ہم سے نہ ہوسکا، لیکن
تمہارے ہجر کا اِک اِک عذاب لکھا ہے!

منظر بھوپالی

 

[فرقان احمد]

میں اب تک دِن کے ہنگاموں میں گم تھا
مگر اب شام ہوتی جا رہی ہے ۔۔۔۔۔!

ساقی امروہوی

 

[فہد اشرف]

یا حسن ہی اس شہر میں کافر نہیں ہوتا
یا عشق یہاں عزت سادات میں گم ہے
عرفان صدیقی

 

[فرقان احمد]

مجھے سنے نہ کوئی مستِ بادۂ عشرت
مجاز ٹوٹے ہوئے دل کی اک صدا ہوں میں

اسرار الحق مجاز

 

[محمد وارث]

پائے وحشت نے عجب نقش بنائے تھے یہاں
اے ہوائے سرِ صحرا تری رفتار پہ خاک
عرفان صدیقی

 

[محمد وارث]

پہلےمیں رنگِ گُل کو سمجھتا تھا رنگِ گُل
یہ بھی مرا لہو ہے مجھے اب پتا چلا
علی ارمان

 

[فرقان احمد]

بارِنِگاہِ لُطف اُٹھایا نہ جائے گا !
احساں یہ کیجیے، کہ یہ احساں نہ کیجیے

حفیظ جالندھری

 

[فرحان محمد خان]

تکلفات مساجد میں اچھے لگتے ہیں
سجودِ شوق کو بےاہتمام رہنے دے
راحیلؔ فاروق

 

[فرقان احمد]

بزم مقتل جو سجے کل، تو یہ اِمکان بھی ہے
ہم سے بسمل تو رہیں آپ سا قاتل نہ رہے

احمد فراز