آپ کے پسندیدہ اشعار!

[محمد عدنان اکبری نقیبی]

اُس کی دہلیز کو چھو کر ہی گزرتا جاؤں
اِتنی دور آیا ہوں، ایک کام تو کرتا جاؤں
شجاعت علی راہی

 

[فہد اشرف]

ہم خوشبوئے آوارہ ہم نور پریشاں ہیں
اے بدر مقدر میں آشفتہ بیانی ہے
بشیر بدر

 

[سردار محمد نعیم]

سکوں لُوٹ کر پھر ستانے لگے ہیں
نہ جانے وہ کیوں یاد آنے لگے ہیں
پیر نصیر الدین نصیر

 

[محمد وارث]

غالبِ خستہ کے بغیر، کون سے کام بند ہیں
روئیے زار زار کیا؟ کیجئے ہائے ہائے کیوں؟

 

[سردار محمد نعیم]

نہ کوئی وعدہ نہ کوئی یقیں نہ کوئی امید
مگر ہمیں تو ترا انتظار کرنا تھا
فراق گور کھپوری

 

[زارا آریان]

ہے مری تر دامنی عبرت دہِ طوفان ِنوح
میرے دامن کے برابر دامنِ ساحل ہے کیا

امداد امام اثرؔ
پٹنہ، بھارت | ۱۸۴۹ – ۱۹۳۳

 

[فہد اشرف]

ہے مری تر دامنی عبرت دہِ طوفان ِنوح
میرے دامن کے برابر دامنِ ساحل ہے کیا

امداد امام اثرؔ
پٹنہ، بھارت | ۱۸۴۹ – ۱۹۳۳

عبرت دہِ ہے یا عبرت گہِ یا عبرت کدہِ؟

 

[سردار محمد نعیم]

اک محو تماشا ہیں اک گرم ہیں قصے کے
یاں آج جو کچھ دیکھا سو وہ کل فسانہ تھا
میر تقی میر

 

[فہد اشرف]

بہت ہی خوب شے ہے اختیاری شان خودداری
اگر معشوق بھی کچھ اور بے پروا نہ ہو جائے
حفیظ جالندھری

 

[سردار محمد نعیم]

اس کی امت میں ہوں میں، میرے رہیں کیوں کام بند
واسطے جس شہ کے غالبؔ! گنبدِ بے در کھلا

 

[فرقان احمد]

خرد رقیبِ تماشا ہے، دل رہینِ جمال
وہ کش مکش ہے سکوں عمر بھی ملے نہ ملے

 

[فرقان احمد]

لوگ کیا سادہ ہیں ہر بت کو خدا کہتے ہیں
یہ تقاضے ہی کبھی اپنی جبیں کے نہ رہے

روؤف خیر

 

[عبد الرحمٰن]

مجھے ہمسفر بھی مِلا کوئی تو شکستہ حال مِری طرح
کئی منزلوں کا تھکا ہوا، کہیں راستے میں لُٹا ہوا

 

[عبد الرحمٰن]

ابھی راہ میں کئی موڑ ہیں کوئی آئے گا کوئی جائے گا
تمہیں جس نے دل سے بھلا دیا اسے بھولنے کی دعا کرو


کبھی حسن پردہ نشیں بھی ہو ذرا عاشقانہ لباس میں
جو میں بن سنور کے کہیں چلوں مرے ساتھ تم بھی چلا کرو

بشیر بدر

 

[عبید انصاری]

جی ہاں، مگر یہ واضح رہے کہ شتر گربہ بیسویں صدی کا عیب ہے!

وارث بھائی یہ اونٹ اور بلی کیا مطلب؟

 

[محمد وارث]

وارث بھائی یہ اونٹ اور بلی کیا مطلب؟

انصاری صاحب اس کا مطلب ہے کہ ایک مصرعے میں شاعر کسی کو اونٹ کہہ کر مخاطب کرتا ہے اور دوسرے میں بلی مثال کے طور پر مومن کا ایک شعر ہے

جسے آپ گنتے تھے آشنا ، جسے آپ کہتے تھے باوفا
میں وہی ہوں مومنِ مبتلا ، تمہیں یاد ہو کہ نہ یاد ہو

پہلے مصرعے میں شاعر مخاطب کو آپ کہہ رہا ہے اور دوسرے میں تم۔ جدید تنقید نگاروں کے نزدیک یہ شتر گربہ کا عیب ہے اور یہ عیب بیسویں صدی کی پیداوار ہے۔ کلاسیکی اردو فارسی شعرا کے ہاں اس بات کا خیال نہیں رکھا جاتا تھا سو ان کے کلام میں اس طرح کی مثالیں اکثر مل جاتی ہیں۔

 

[محمد عدنان اکبری نقیبی]

میں دشت میں ہوں ! یہ مغالطہ ہے،نہ شاعرانہ مبالغہ ہے
مرےبدن پرکہیں رکھ کے دیکھ ،نقش قدم بنے گا
عمیر نجمی

 

[فہد اشرف]

نہ کم ہوا تھا گناہوں سے رغبتوں کا جنوں
ہزار صحبت صدق و صفا کے ہوتے ہوئے
زبیر رضوی

 

[عبد الرحمٰن]

وہ شخص جو گنواتا ہے پیڑوں کے فوائد۔۔۔
لگتا ہے کسی سائے سے محروم ہوا ہے۔۔
پارس مزاری

 

[محمد عدنان اکبری نقیبی]

پوچھا جو اُس نے حال تو پلکوں سے ٹوٹ کر
چھوٹا سا ایک اشک بڑا کام کرگیا
ظفر گورکھپوری