لفظِ ”اردو“ پر مشتمل اشعار پیش کریں(کسی بھی زبان کے)

[خالد محمود چوہدری]

او جان کے گاہک ترے اردو میں جو آئے
سودائی ہوئے حسن کا بازار سمجھ کر

 

[فاتح]

او جان کے گاہک ترے اردو میں جو آئے
سودائی ہوئے حسن کا بازار سمجھ کر

دیوانِ ہزبز 1866ء
واضح رہے کہ یہاں لفظ اردو بمعنی زبانِ اردو استعمال نہیں ہوا بلکہ اردو کا لفظ "بازار" کے معنوں میں استعمال ہوا ہے

 

[فاتح]

نسیمِ دہلوی، ہم موجدِ بابِ فصاحت ہیں
کوئی اردو کو کیا سمجھے کہ جیسا ہم سمجھتے ہیں
(اصغر علی خان نسیم دہلوی)

 

[فاتح]

بچّو، یہ سبق آپ سے کل بھی میں سنوں گا
وہ آنکھ ہے نرگس کی جو ہرگز نہیں سوتی
عنقا ہے وہ طائر کہ دکھائی نہیں دیتا
اردو وہ زباں ہے کہ جو نافذ نہیں ہوتی
(انور مسعود)

 

[فاتح]

اصفر بجا ہے جادوئے بنگال بھی مگر
اُردو زباں کے فیض سے جادو بیاں ہوں میں
(اصغر بنگالی)

 

[فاتح]

گو لاکھ ہو رنگت پھولوں میں خوشبو جو نہیں تو کچھ بھی نہیں
اس ملک میں چاہے ہُن برسے اردو جو نہیں تو کچھ بھی نہیں
(جسٹس آنند نرائن مُلّا)

 

[فاتح]

وہ دشمنِ اُردو ہیں وہ ہیں دشمنِ مِلّت
کرتے ہیں جو اُردو کی سلاست کو سبوتاژ
(اکبر لاہوری)

 

[فاتح]

مِلا اردو کو اس کا حق نہ جمہوری نظام آیا
ہوئے پورے نہ جو وعدے کیے تھے ہم نے قائد سے
(سید قاسم جلال)

 

[جاسمن]

واہ واہ فاتح بھائی!

 

[فہد اشرف]

اس کے اردو میں بھی اب کے مغربی لہجہ ملا
کالے بالوں کی رنگت زعفرانی ہو گئی

 

[شکیب]

مرے آنسو کو جگنو بولتی ہے
مری تہذ یب اردو بولتی ہے​

 

[جاسمن]

کانوں میں رس جو گھول دے اردو ہے وہ زباں
اردو فروغ پارہی بولو میاں !کہاں
خدمت میں رات دن ہے لگی کون انجمن
بزمِ سخن وراں ہے وہ،بزمِ سخن وراں
منظور احمد

 

[سید عاطف علی]

جنگل جھومے ،صحرا مہکے۔۔
ایک عرب جب اردو بولے
عربی اور اردو شاعر ۔ ڈاکٹر زبیر فاروق، عرب امارات

 

[اکمل زیدی]

ملاقات بلمشافہ تھی گفتگو دو بدو
بیٹھے تھے ہم ایسے بلکل روبرو
دیر تک ہوئی نظر سے نظر کی بات
کہ ان کی زباں فرنگی میری تھی اردو

 

[Baz vsh Ghambir]

ریختہ (اردو) کے تم ہی استاد نہیں ہو غالب
کہتے ہیں کے اگلے زمانے میں کوئی میر بھی تھا

 

[یوسف سلطان]

اپنے محبوب کی خاطر تھا خدا کو منظور
ورنہ قرآن بھی اترتا زبانِ اردو
(اکبر الہ آبادی)

 

[یوسف سلطان]

شہد و شکر سے شیریں اردو زبان ہماری
ہوتی ہے جس کی بولی میٹھی زبان ہماری
(الطاف حسین حالی)

 

[فہد اشرف]

وہ عطردان سا لہجہ مرے بزرگوں کا
رَچی بسی ہوئ اُردو زباں کی خوشبُو.

 

[غدیر زھرا]

میری گھٹی میں پڑی تھی ہو کے حل اردو زباں
جو بھی میں کہتا گیا حسنِ بیاں بنتا گیا

(فراق گورکھپوری)

 

[غدیر زھرا]

بعد نفرت پھر محبت کو زباں درکار ہے
پھر عزیزِ جاں وہی اردو زباں ہونے لگی

(یعقوب عامر)