کاشفی

محفلین
غزل
(مرزا غالب رحمتہ اللہ علیہ)
رہا گر کوئی تا قیامت سلامت
پھر اک روز مرنا ہے حضرت سلامت!

جگر کو مرے عشق خوں نابہ مشرب
لکھے ہے خداوند نعمت سلامت

علی الرغم دشمن شہیدِ وفا ہوں
مبارک مبارک، سلامت سلامت

نہیں گر سر و برگ ادراک معنی
تماشائے نیرنگِ صورت سلامت

دو عالم کی ہستی پہ خط فنا کھینچ
دل و دست ارباب ہمت سلامت

نہیں گر بہ کام دل خستہ گردوں
جگر خائی جوش حسرت سلامت

نہ اوروں کی سنتا نہ کہتا ہوں اپنی
سر خستہ دشوار وحشت سلامت

وفور بلا ہے ہجوم وفا ہے
سلامت ملامت ملامت سلامت

نہ فکر سلامت نہ بیم ملامت
ز خود رفتگی ہائے حیرت سلامت

رہے غالب خستہ مغلوب گردوں
یہ کیا بےنیازی ہے حضرت سلامت
 
Top