ساحر اے شریف انسانو ۔ ساحر لدھیانوی

[فاتح]

16 جولائی 2007 کو میں نے ہی محفل کے ایک دھاگے "میری پسند کی شاعری" پر ساحر لدھیانوی کی یہ نظم ارسال کی تھی اور شاید محفل پر وہ میرا دوسرا یا تیسرا مراسلہ تھا۔ موجودہ حالات کے پس منظر میں دوبارہ اسے ایک نئے دھاگے کے طور پر ارسال کر رہا ہوں۔ امید ہے یہ اعادہ احباب کی طبع نازک پر گراں نہیں گزرے گا۔

گو کہ یہ نظم ہندوستان اور پاکستان کی جنگ کے پس منظر میں لکھی گئی اور معاہدہ تاشقند کے موقع پر نشر کی گئی لیکن جب تک اس کا مقصد پورا نہیں ہوتا یہ تازہ ہی رہے گی۔

اے شریف انسانو
خون اپنا ہو یا پرایا ہو
نسلِ آدم کا خون ہے آخر
جنگ مشرق میں ہو کہ مغرب میں
امنِ عالم کا خون ہے آخر

بم گھروں پر گریں کہ سرحد پر
روحِ تعمیر زخم کھاتی ہے
کھیت اپنے جلیں کہ اوروں کے
زیست فاقوں سے تلملاتی ہے

ٹینک آگے بڑھیں کہ پیچھے ہٹیں
کوکھ دھرتی کی بانجھ ہوتی ہے
فتح کا جشن ہو کہ ہار کا سوگ
زندگی میّتوں پہ روتی ہے

جنگ تو خود ہی ایک مسئلہ ہے
جنگ کیا مسئلوں کا حل دے گی
آگ اور خون آج بخشے گی
بھوک اور احتیاج کل دے گی

اس لئے اے شریف انسانو!
جنگ ٹلتی رہے تو بہتر ہے
آپ اور ہم سبھی کے آنگن میں
شمع جلتی رہے تو بہتر ہے

(2)

برتری کے ثبوت کی خاطر
خوں بہانا ہی کیا ضروری ہے
گھر کی تاریکیاں مٹانے کو
گھر جلانا ہی کیا ضروری ہے

جنگ کے اور بھی تو میداں ہیں
صرف میدانِ کشت وخوں ہی نہیں
حاصلِ زندگی خِرد بھی ہے
حاصلِ زندگی جنوں ہی نہیں

آؤ اس تیرہ بخت دنیا میں
فکر کی روشنی کو عام کریں
امن کو جن سے تقویت پہنچے
ایسی جنگوں کا اہتمام کریں

جنگ، وحشت سے بربریّت سے
امن، تہذیب و ارتقا کے لئے
جنگ، مرگ آفریں سیاست سے
امن، انسان کی بقا کے لئے

جنگ، افلاس اور غلامی سے
امن، بہتر نظام کی خاطر
جنگ، بھٹکی ہوئی قیادت سے
امن، بے بس عوام کی خاطر

جنگ، سرمائے کے تسلّط سے
امن، جمہور کی خوشی کے لئے
جنگ، جنگوں کے فلسفے کے خلاف
امن، پُر امن زندگی کے لئے

(ساحر لدھیانوی)
​

 

[ابن سعید]

جزاک اللہ!!

 

[محمد وارث]

یہ نظم مجھے بھی بہت پسند ہے، شکریہ فاتح صاحب شیئر کرنے کیلیئے!

 

[فرخ منظور]

واہ فاتح صاحب کیا ہی خوبصورت نظم ہے - ہم تو بچپن سے ہی ساحر کے اسیر ہیں -

 

[فاتح]

ابن سعید اور وارث صاحبان نظم پسند کرنے پر آپ کا بے حد شکریہ۔
سارہ خان اور عندلیب صاحبات آپ کے شکریوں‌کا بھی شکریہ۔

 

[فاتح]

واہ فاتح صاحب کیا ہی خوبصورت نظم ہے - ہم تو بچپن سے ہی ساحر کے اسیر ہیں -

بچپن میں تو ساحر لدھیانوی کے اسیر تھے اور عہدَ شباب کے پنجہ کے اسیر ہو کر کس ساحر کے ہوئے یہ بھی بیان ہو

 

[امیداورمحبت]

ذبردست ، ساحر کی یہ نظم مجھے بھی ہمیشہ اچھی لگتی ہے

 

[فرخ منظور]

بچپن میں تو ساحر لدھیانوی کے اسیر تھے اور عہدَ شباب کے پنجہ کے اسیر ہو کر کس ساحر کے ہوئے یہ بھی بیان ہو

حضور عہدِ شباب آتے ہی بہتوں سے درخواست کی لیکن کسی نے گھاس نہیں ڈالی - بالآخر ہماری بیگم کو ہی ہم پر سحر کرنا پڑا -

 

[فاتح]

ساحر کی یہ نظم آج ارسال کرنا چاہ رہا تھا لیکن تلاش کرنے پر معلوم ہوا کہ یہ کارِ خیر تو ہم کئی سال پہلے انجام دے چکے ہیں۔

 

[نیرنگ خیال]

ساحر کی یہ نظم آج ارسال کرنا چاہ رہا تھا لیکن تلاش کرنے پر معلوم ہوا کہ یہ کارِ خیر تو ہم کئی سال پہلے انجام دے چکے ہیں۔

فاتح بھائی ۔۔۔ جس نے ساحر نہیں پڑھا اس نے زمانہ نہیں پڑھا۔۔۔ جون ایلیا کے بعد کسی کا کلام سب سے زیادہ یاد ہے تو وہ ساحر ہے ۔۔۔۔

 

[mohsin ali razvi]

سبحان الله ز ه این کلام امن و آدمیت

 

[فاتح]

فاتح بھائی ۔۔۔ جس نے ساحر نہیں پڑھا اس نے زمانہ نہیں پڑھا۔۔۔ جون ایلیا کے بعد کسی کا کلام سب سے زیادہ یاد ہے تو وہ ساحر ہے ۔۔۔ ۔

ساحر مجھے اس قدر تو پسند نہیں لیکن کافی کچھ بہت ہی کمال لکھا ہے ساحر نے

 

[فاتح]

سبحان الله ز ه این کلام امن و آدمیت

تشکر خیلی

 

[حسینی]

لیکن اگر دنیا میں جنگیں ختم ہو جائیں تو اسلحہ مافیا کا اسلحہ کون خریدے گا۔۔۔ جن کا سالانہ اربوں ڈالر کے اسلحہ کا کاروبار ہیں۔
لیکن زیادہ تر ہم مسلمانوں کی بدبختی ہے کہ ہم ہی دوسروں کے آلہ کار بن کر لڑتے ہیں۔
یورپ اور امریکہ تو آرام سے امن میں رہ رہے ہیں اور ہمارا تماشا دیکھ رہے ہیں۔

بہرحال ساحر بھائی کی نظم واقعی عالی بود۔۔۔ ماشاء اللہ اچھی شراکت ہے۔۔ بہت شکریہ۔۔

 

[نیرنگ خیال]

ساحر مجھے اس قدر تو پسند نہیں لیکن کافی کچھ بہت ہی کمال لکھا ہے ساحر نے

مجھے اس کی معاشرے پر کی گئی شاعری بہت پسند ہے۔۔۔۔ اس نے حالات کو بہت عمدہ بیان کیا ہے۔۔۔

 

[فاتح]

لیکن اگر دنیا میں جنگیں ختم ہو جائیں تو اسلحہ مافیا کا اسلحہ کون خریدے گا۔۔۔ جن کا سالانہ اربوں ڈالر کے اسلحہ کا کاروبار ہیں۔
لیکن زیادہ تر ہم مسلمانوں کی بدبختی ہے کہ ہم ہی دوسروں کے آلہ کار بن کر لڑتے ہیں۔
یورپ اور امریکہ تو آرام سے امن میں رہ رہے ہیں اور ہمارا تماشا دیکھ رہے ہیں۔

بہرحال ساحر بھائی کی نظم واقعی عالی بود۔۔۔ ماشاء اللہ اچھی شراکت ہے۔۔ بہت شکریہ۔۔

سو فیصد بجا فرماتے ہیں۔

 

[فاتح]

مجھے اس کی معاشرے پر کی گئی شاعری بہت پسند ہے۔۔۔ ۔ اس نے حالات کو بہت عمدہ بیان کیا ہے۔۔۔

اس شاعری میں سے وقتاً فوقتاً آپ ہی کچھ نہ کچھ محفل میں بھی ارسال کرتے رہا کریں کہ ساحر تو ماننے والے نہیں یہ بات۔

 

[نیرنگ خیال]

اس شاعری میں سے وقتاً فوقتاً آپ ہی کچھ نہ کچھ محفل میں بھی ارسال کرتے رہا کریں کہ ساحر تو ماننے والے نہیں یہ بات۔

جی قبل اس کے میں بھی ساحر سے جا ملوں۔۔۔۔

 

[ساقی۔]

ساحر لدھیانوی کی یہ نظم شیئر کرنے لگا تھا ۔جو کہ پہلے ہی موجود ہے یہاں ۔ کیا لاجواب نظم ہے۔

 

[کاشفی]

کوئی دیکھے یا نہ دیکھے شبیر تو دیکھے گا۔۔۔لیکن حیرت ہے اب تک شبیر نے بھی نہیں دیکھا اور نہ میری نظر سے یہ نظم گزری۔۔
خوبصورت نظم شیئر کرنے کے لیئے بیحد شکریہ فاتح الدین بشیر بھائی۔۔۔