جگر اگر نہ زہرہ جبینوں کے درمیاں گزرے - جگر مراد آبادی

[کاشفی]

غزل
(جگر مراد آبادی)​

اگر نہ زہرہ جبینوں کے درمیاں گزرے​

تو پھر یہ کیسے کٹے زندگی کہاں گزرے​

جو ترے عارض و گیسو کے درمیاں گزرے​

کبھی کبھی وہی لمحے بلاے جاں گزرے​

مجھے یہ وہم رہا مدتوں یہ جرات شوق​

کہیں نہ خاطر معصوم پر گراں گزرے​

ہر اک مقام محبت بہت ہی دلکش تھا​

مگر ہم اہل محبت کشاں کشاں گزرے​

جنوں کے سخت مراحل بھی تری یاد کے ساتھ​

حسیں حسیں نظر آئے جواں جواں گزرے​

مری نظر سے تری جستجو کے صدقے میں​

یہ اک جہاں ہی نہیں سینکڑوں جہاں گزرے​

ہجوم جلوہ میں پرواز شوق کیا کہنا​

کہ جیسے روح ستاروں کے درمیاں گزرے​

خطا معاف زمانے سے بد گماں ہو کر​

تری وفا پہ بھی کیا کیا ہمیں گماں گزرے​

مجھے تھا شکوہ ہجراں کہ یہ ہوا محسوس​

مرے قریب سے ہو کر وہ ناگہاں گزرے​

رہ وفا میں اک ایسا مقام بھی آیا​

کہ ہم خود اپنی طرف سے بھی بد گماں گزرے​

خلوص جس میں ہو شامل وہ دور عشق و ہوس​

نہ رائیگاں کبھی گزرا نہ رائیگاں گزرے​

بہت حسین مناظر بھی حسن فطرت کے​

نجانے آج طبیعت پہ کیوں گراں گزرے​

وہ جن کے سائے سے بھی بجلیاں لرزتی تھیں​

مری نظر سے کچھ ایسے بھی آشیاں گزرے​

اسی کو کہتے ہیں جنّت اسی کو دوزخ بھی​

وہ زندگی جو حسینوں کے درمیاں گزرے​

کبھی کبھی تو اسی ایک مشت خاک کے گرد​

طواف کرتے ہوے ہفت آسماں گزرے​

بہت حسیں سہی صحبتیں گلوں کی مگر​

وہ زندگی ہے جو کانٹوں کے درمیاں گزرے​

ابھی تو تجھ کو بہت ناگوار ہے ہمدم​

وہ حادثات جو اب تک رواں دواں گزرے​

جنہیں کہ دیدہ شأعر ہی دیکھ سکتا ہے​

وہ انقلاب ترے سامنے کہاں گزرے​

بہت عزیز ہے مجھ کو انھیں کی یاد جگر​

وہ حادثات محبت جو ناگہاں گزرے​