آپ کے پسندیدہ اشعار!

[فرقان احمد]

آنکھوں سے خواب، دل سے تمنا تمام شد
تم کیا گئے ۔۔۔۔۔۔ کہ شوقِ نظارا تمام شد

شہرِ دلِ تباہ میں پہنچوں تو کچھ کھُلے!!!
کیا بچ گیا ہے راکھ میں، اور کیا تمام شد

شاعر: نامعلوم

 

[کاشفی]

مکتب عشق کا دستور نرالا دیکھا
اس کو چھٹی نہ ملی جس کو سبق یاد ہوا
(میر طاہر علی رضوی)

 

[زارا آریان]

کام اے رندو نہ آئی حشر کی بھی تیز دھوپ
خشک ہونے سے یہاں بھی دامنِ تر رہ گیا

✍ ریاضؔ خیرآبادی ( ریاض احمد )
خیرآباد، سیتا پور، اودھ | ۱۸۵۳ – ۱۹۳۴

 

[فرحان محمد خان]

چھوڑو! جاؤ! کون کہاں کی شہزادی
شہزادی کے ہاتھ میں چھالے ہوتے ہیں؟
فریحہ نقوی

 

[سین خے]

دم بھرتا رہا اپنی وفاؤں کا جو مخلصؔ
وہ شخص تو لینے کو خبر تک نہیں پہنچا

مخلص وجدانی

 

[زارا آریان]

کرتا ہے گر تو بت شکنی تو سمجھ کے کر
شاید کہ ان کے پردے میں زاہد خدا بھی ہو

✍ تاباں عبدالحی

 

[فرقان احمد]

ہے یہ خاموشی آخری حربہ
اب نہ مانا تو ہار جاؤں گا ۔۔۔!

شاعر: اتباف ابرک

 

[فہد اشرف]

فقط اس شوق میں پوچھی ہیں ہزاروں باتیں
میں ترا حسن ترے حسن بیاں تک دیکھوں
احمد ندیم قاسمی

 

[فہد اشرف]

نہ وہ رنگ فصل بہار کا نہ روش وہ ابر بہار کی
جس ادا سے یار تھے آشنا وہ مزاج باد صبا گیا
فیض احمد فیض

 

[کاشفی]

اس سادگی پہ کون نہ مر جائے اے خدا
لڑتے ہیں اور ہاتھ میں تلوار بھی نہیں
(مرزا غالب مرحوم و مغفور رحمتہ اللہ علیہ)

 

[کاشفی]

آگ تھے ابتدائے عشق میں ہم
اب جو ہیں خاک انتہا ہے یہ
(میر تقی میر)

 

[کاشفی]

میرؔ کے دین و مذہب کو اب پوچھتے کیا ہو ان نے تو
قشقہ کھینچا دیر میں بیٹھا کب کا ترک اسلام کیا
(میر تقی میر)

 

[سین خے]

تری نگاہ نے اپنا بنا کے چھوڑ دیا
ہنسا کے پاس بلایا رلا کے چھوڑ دیا

شیون بجنوری

 

[سین خے]

ہنسا کے پہلے مجھے پھر رلا گیا اک شخص
فسانہ کہہ کے فسانہ بنا گیا اک شخص

احمد علی برقی اعظمی

 

[سین خے]

تو شریک سخن نہیں ہے تو کیا
ہم سخن تیری خامشی ہے ابھی

یاد کے بے نشاں جزیروں سے
تیری آواز آ رہی ہے ابھی

شہر کی بے چراغ گلیوں میں
زندگی تجھ کو ڈھونڈتی ہے ابھی

ناصر کاظمی

 

[کاشفی]

اس طرح زندگی نے دیا ہے ہمارا ساتھ
جیسے کوئی نباہ رہا ہو رقیب سے
(ساحر لدھیانوی)

 

[محمد وارث]

ٹوٹتے جاتے ہیں سب آئنہ خانے میرے
وقت کی زد میں ہیں یادوں کے خزانے میرے
احمد ندیم قاسمی

 

[سردار محمد نعیم]

خار ہی خار زمانے میں نظر آتے ہیں
اپنے دامن کو برائ سے بچا کہ چلیے

روشنی ہو تو چمک اٹھتی ہے ہر راہ سیاہ
دو قدم چلیے مگر شمع جلا کہ چلیے
پیرسید نصیر الدین نصیر

 

[محمد وارث]

تیرے ہر ذرّے پہ تا روزِ قیامت سجدہ ریز
ہم رہیں گے، اے زمینِ کوچہٴ جانانہ، ہم
احسان دانش

 

[سردار محمد نعیم]

کاش میں تیرے بن گوش کا بندا ہوتا

رات کو بے خبری میں جو مچل جاتامیں
تو ترے کان سے چپ چاپ نکل جاتا میں
صبح کو گرتے تری زلفوں سے جب باسی پھول
میرے کھو جانے پہ ہوتا ترا دل کتنا ملول
تو مجھے ڈھونڈتی کس شوق سے گھبراہٹ میں
اپنے مہکے ہوئے بستر کی ہر اک سلوٹ میں
جونہی کرتیں تری نرم انگلیاں محسوس مجھے
ملتا اس گوش کا پھر گوشہ مانوس مجھے
کان سے تو مجھے ہر گز نہ اتارا کرتی
تو کبھی میری جدائی نہ گوارا کرتی
یوں تری قربت رنگیں کے نشے میں مدہوش
عمر بھر رہتا مری جاں میں ترا حلقہ بگوش

کاش میں تیرے بن گوش کا بندا ہوتا
مجید امجد