آپ کے پسندیدہ اشعار!

[سید فصیح احمد]

قیس جنگل میں اکیلا ہے مجھے جانے دو
خوب گزرے گی جو مل بیٹھیں گے دیوانے دو

میاں داد خان سیاح

 

[سید فصیح احمد]

فسانے اپنی محبت کے سچ ہیں، پر کُچھ کُچھ
بڑھا بھی دیتے ہیں ہم زیب داستاں کے لئے

شیفتہ

 

[سید فصیح احمد]

زاہد شراب پینے سے کافر ہوا میں کیوں
کیا ڈیڑھ چلو پانی میں ایمان بہہ گیا

ذوق

 

[سید فصیح احمد]

میرے سنگ مزار پر فرہاد
رکھ کے تیشہ کہے ہے، یا استاد

میر تقی میر

 

[سید فصیح احمد]

محشر کا خیر کچھ بھی نتیجہ ہو اے عدم
کچھ گفتگو تو کھل کے کرینگے خدا کے ساتھ

عبدالحمید عدم

 

[سید فصیح احمد]

ہمارے اور تمہارے پیار میں بس فرق ہے اتنا
اِدھر تو جلدی جلدی ہے اُدھر آہستہ آہستہ

وہ بے دردی سے سر کاٹے امیر اور میں کہوں‌ ان سے
حضور آہستہ آہستہ جناب آہستہ آہستہ

امیرمینائی

 

[طارق شاہ]

بے رُخی اِس سے بڑی اور بَھلا کیا ہوگی
ایک مُدّت سے ہمیں اُس نے ستایا بھی نہیں

قتیل شفائی

 

[عبد الرحمن]

جس سر کو غرور آج ہے یاں تاج وری کا
کل اس پہ یہیں شور ہے پھر نوحہ گری کا

میر

 

[عبد الرحمن]

پتا پتا بوٹا بوٹا حال ہمارا جانے ہے
جانے نہ جانے گل ہی نہ جانے باغ تو سارا جانے ہے

میر​

 

[عبد الرحمن]

خاک بھی سر پر ڈالنے کو نہیں
کس خرابے میں ہم ہوئے آباد

میر

 

[عبد الرحمن]

جو اس شور سے میر روتا رہے گا
تو ہم سایہ کا ہے کو سوتا رہے گا

 

[عبد الرحمن]

موسم ہے، نکلے شاخوں سے پتے ہرے ہرے
پودے چمن میں پھولوں سے دیکھے بھرے بھرے

میر

 

[عبد الرحمن]

کیا کہیں میر جی ہم تم سے معاش اپنی غرض
غم کو کھایا کرے ہیں، لہو پیا کرتے ہیں

 

[عبد الرحمن]

نامرادی کی رسم میر سے ہے
طور یہ اس جوان سے نکلا ہے

 

[طارق شاہ]

میں تو قائم ہُوں تِرے غم کی بدولت ورنہ
یوں بکھر جاؤں کہ خود ہاتھ نہ آؤں اپنے

انور مسعُود

 

[طارق شاہ]

سوچتا ہُوں کہ بُجھا دُوں میں یہ کمرے کا دِیا
اپنے سائے کو بھی کیوں ساتھ جگاؤں اپنے

انور مسعُود

 

[طارق شاہ]

ایک سیدھی بات ہے، مِلنا نہ مِلنا عشق میں !
اِس پہ سوچو گے تو، یہ بھی مسؑلہ بن جائے گا

اِک برہمن نے، یہ آ کے صحنِ مسجد میں کہا
عِشق جس پتھر کو چھُو لے وہ خدا بن جائے گا

سلیم احمد

 

[طارق شاہ]

کیا اختتامِ قصّہؑ قدرت پہ سوچنا
حاصل حصول، حاشیہ آرائی ہی نہ ہو

شاہد ذکی

 

[طارق شاہ]

کیا مِلے گا سرسری نظروں کو میرے شعر میں
ڈوب کر دیکھو محب، کیسے بیاں ہوتا ہے کیا

محب عارفی

 

[طارق شاہ]

اپنے اندر کے نظاروں کوہی پاتا ہے اتھاہ
آئینے کو کیاغرض باہر کہاں ہوتا ہے کیا

محب عارفی