جس پل سے ترا عشق ہمیں دان ہوا ہے

چند تک بندیاں:

جس پل سے ترا عشق ہمیں دان ہوا ہے
پہلے جو کٹھن تھا وہی آسان ہوا ہے

الفت کا بھی کیا خوب ہی احسان ہوا ہے
اب نام تمہارا مری پہچان ہوا ہے

یہ بھول گیا فرطِ مسرت میں دھڑکنا
اس دل میں ترا درد جو مہمان ہوا ہے

جاتی ہے تو جاں جائے، نہ جائے گا یہ دل سے
یہ عشق ہمیں صورتِ ایمان ہوا ہے

فریاد، نہ شکوہ، نہ فغاں، مہر بہ لب ہوں
وہ ضبط مرا دیکھ کے حیران ہوا ہے

اشکوں کی سیاہی بھرے مژگاں کے قلم سے
تحریر غمِ ہجر کا فرمان ہوا ہے

گلشن کی تباہی پہ نہ ہوگی کوئی فریاد
گل چیں سے عنادل کا یہ پیمان ہوا ہے

لے آئے کوئی آنکھ میں امید کے جگنو
تاریک مرے دل کا شبستان ہوا ہے

اک یاد تمہاری بھی گئی ہاتھ سے جس کے
عاطفؔ سا بھی کوئی تہی دامان ہوا ہے

عاطفؔ ملک
اکتوبر ۲۰۲۰​

 

ماشاءاللہ۔ بہت خوب ملک صاحب

 

بہت شکریہ جناب

شکریہ تابش بھائی۔
پذیرائی کیلیے ممنون ہوں

ہاہاہا۔۔۔۔۔۔تعلق خوب جوڑا ہے آپ نے

 

بہت خوب، ماشاء اللہ ۔۔۔ کیا خوب تغزل ہے

 

۔۔۔۔۔واہ۔۔۔

 

واہ، عمدہ ہے غزل

 

بہت شکریہ راحل بھائی

بہت شکریہ محترمی

بہت شکریہ استادِ محترم

 

واہ واہ! اچھی غزل ہے عاطف بھائی !
کئی اچھے اشعار ہیں ۔ بہت خوب!

 

عنادل نہ صرف خود منقار زیرِ پر ہیں بلکہ کوشش کرتی ہیں کہ کنجشک و عصافیر و زاغ و زغن وغیرہم کو بھی کچھ نہ بولنے دیں۔

 

واہ بے حد کمال۔

 

بہت شکریہ ظہیر بھائی
آپ کو اشعار پسند آئے،محنت وصول شد

بہت شکریہ

 

سنا ہے ایسی گنجلک اور مبہم باتیں کرنے پر بھی پابندِ سلاسل کیا جا رہا ہے۔ آپ تو پہنچ سے دور ہیں، یقیناً اس کا خمیازہ صاحبِ رسالہ کو ہی بھگتنا پڑے گا

 

بہت خوب

 

بہت خوب عاطف بھائی!

کیا کہنے!

بہت سی داد اور مبارکباد!

 

جاتی ہے تو جاں جائے، نہ جائے گا یہ دل سے
یہ عشق ہمیں صورتِ ایمان ہوا ہے
واہ-خوب کہا ہے۔

 

شکریہ

نوازش احمد بھائی

پذیرائی کیلیے ممنون ہوں شاہ جی

 

بہت شکریہ آپا

 

ماشاءاللہ اچھی غزل ہے مبارک باد