اوڑھ لیں سب گلوں نے قبائیں نئی، کونپلوں پر عجب اک نکھار آگیا

طویل بحر میں کی گئی ایک کوشش پیش کرنے کی جسارت کر رہا ہوں،اس امید پر کہ شاید کوئی شعر احباب کو پسند آ جائے۔

اوڑھ لیں سب گلوں نے قبائیں نئی، کونپلوں پر عجب اک نکھار آ گیا
بلبلوں نے خوشی کے ترانے پڑھے،جب چمن میں وہ جانِ بہار آ گیا

اک گھڑی کو نظر آپ سے کیا لڑی،مجھ کو واللہ سدھ بدھ نہ کوئی رہی
لوگ مے خوار مجھ کو سمجھنے لگے،میری آنکھوں میں ایسا خمار آ گیا

سامنے ان کے جب ذکر میرا ہوا، رُخ وفورِ حیا سے دمکنے لگا
ماہِ کامل میں کیا ہوگی ایسی پھبن، ان کے چہرے پہ ایسا نکھار آ گیا

ہم نے ہو کر خفا یہ ارادہ کیا عمر بھر بات اس سے کریں گے نہ ہم
اس نے آنکھوں میں معصومیت بھر کے یوں ہم کو دیکھا کہ پھر اس پہ پیار آ گیا

وہ جو ہوتے نہ تھے لحظہ بھر کو جدا، ان کا برسوں سے کوئی نہیں رابطہ
سچ کہوں گر تو میں خود بھی حیران ہوں اس تعلق میں کیوں یہ غبار آ گیا

عینؔ مشہور تھا بے ادب، بد زباں، آئی نرغے میں جب عشق کے اس کی جاں
اس کے اطوار میں آگئی عاجزی اور لہجے میں بھی انکسار آ گیا

عینؔ میم عاطفؔ
مارچ ۲۰۲۰​

 

واہ بہت خوب۔

 

ما شاء اللّٰہ۔ بہت خوب۔۔

 

خوب غزل ہے ڈاکٹر صاحب۔

 

بہت بہت شکریہ

جزاک اللہ تابش بھائی

نوازش

بہت شکریہ وارث صاحب

 

واہ ، واہ ۔ خوب غزل ہے عاطف ۔ اتنی لمبی بحر میں کچھ حشو و زوائد کا آجانا تو عام سی بات ہے ۔ مجموعی طور پر اچھے اشعار ہیں ۔

 

بہت بہت شکریہ ظہیر صاحب

 

بہت عمدہ ⁦❤️⁩ شاندار ، بہترین غزل ، عاطف بھائی !

 

خوبصورت اشعار۔ ڈھیروں داد قبول فرمائیں۔

 

بہت اچھے جناب۔ لمبی بحر بہت اچھی نبھائی ہے آپ نے۔ بہت سی داد قبول کیجئے۔
آپ میرے ہم پیشہ ہیں لہذا آپ کا اچھا کلام پڑھ کر زیادہ خوشی ہوتی ہے۔

 

بہت شکریہ کاشف بھائی۔
بہت عرصے بعد نظر آئے ہیں۔خوشگوار حیرت ہوئی۔
کیسے مزاج ہیں؟

بہت نوازش

بہت شکریہ۔۔۔۔لمبی بحر مشکل لگتی ہے لیکن اپنی طرف سے کچھ بہتر کہنے کی کوشش کی ہے۔

ماشااللہ۔۔۔۔۔۔مجھے بھی اب آپ کا کلام پڑھ کے زیادہ خوشی ہوا کرے گی۔

 

ایک بات بتائیے کہ کیا اس بحر
فاعلن فاعلن فاعلن فاعلن فاعلن فاعلن فاعلن فاعلن (8 بار)
کی کوئی اور مثال آپ کے علم میں ہے؟ اگر ہے تو بتائیے۔ مجھے یہ بحر پہلی بار یہاں نظر آئی اور اچھی لگی۔

 

نصرت فتح علی خان کا گایا ہوا کلام:
سادگی تو ہماری ذرا دیکھیے اعتبار آپ کے وعدے پر کر لیا

 

عمدہ غزل ہے بھیا واہ

 

بہت شکریہ فرحان بھائی

 

بہت خوب عاطف بھائی۔ خوبصورت اشعار۔ بہت عمدہ۔