فرقان احمد
محفلین
یہ اپنی نوعیت کی انوکھی لڑی ہے۔ اردو محفل میں معزز اراکین کے درمیان نوک جھونک کا سلسلہ جاری رہتا ہے۔ عام طور پر ماحول خوشگوار رہتا ہے تاہم بسا اوقات محفلین آپس میں الجھ پڑتے ہیں جو کہ کچھ ایسی بھی غیر فطری بات نہیں ہے۔ جذبات کی شدت کے باعث ایسی کیفیت بھی پیدا ہو جاتی ہے کہ خون کھولنے لگ جاتا ہے ، یعنی کہ فشارِ خون کی سطح بلند ہو جاتی ہے۔ یہ وہ مرحلہء سخت ہے جب صلح صفائی کے لیے انتظامیہ کو مداخلت کرنا پڑتی ہے۔ تاہم، یہ بھی ممکن ہے کہ بروقت مداخلت نہ کی جا سکے۔ اس لیے ہم اس نئی لڑی کا 'اجرا' کر رہے ہیں تاکہ محفلین اپنے مسائل خود ہی نپٹا لیں۔ ہمارے خیال میں یہ زیادہ بہتر طریقہء کار ہے۔
نوٹ: اس لڑی میں شمولیت اختیار کرنے والی شخصیت پر لازم ہو گا کہ وہ بغض، کینہ، حسد اور اس طرح کے منفی جذبات سے اپنا دامن چھڑا کر یہاں تبصرہ کرے۔ اپنے دل اور نیت کو صاف رکھے یعنی محض صلح صفائی کے ارادے سے امن کی وادی میں قدم رکھے۔
ہم محفلین سے امید رکھتے ہیں کہ وہ امن کی فاختہ کو روٹھنے نہیں دیں گے۔
اس لڑی میں یوں تو کوئی بھی رکن تبصرہ کرنے کا حق محفوظ رکھتا ہے تاہم نوک جھونک کے بعد صلح کی غرض سے تشریف لانے والے محفلین کی خاص طور پر حوصلہ افزائی کی جائے گی۔ جو صلح میں پہل کرے گا، اسے یقینی طور پر زیادہ پذیرائی ملے گی۔٭
٭ براہ مہربانی اکاؤنٹ اور منتظمین سے متعلقہ امور کو اس لڑی میں زیربحث نہ لایا جائے۔
