امجد اکبر کا کلام

[محمد اسامہ سَرسَری]

اس دھاگے میں ، میں اپنے ایک قابل احترام شاعر دوست جناب امجد اکبر صاحب کی غزلیں اور نظمیں وقتا فوقتا پیش کرتا رہوں گا۔ ان شاء اللہ تعالیٰ!

 

[محمد اسامہ سَرسَری]

چمن یہ پیار کا اجڑا دکھائی دیتا ہے​

قدم قدم پہ جو خطرہ دکھائی دیتا ہے​

​

نظر اٹھا کے جہاں میں جدھر بھی میں دیکھوں​

ہر ایک سو ترا جلوہ دکھائی دیتا ہے​

​

نگر نگر جو معزز تھا ، معتبر تھا کبھی​

ڈگر ڈگر وہی رسوا دکھائی دیتا ہے​

​

فریب آنکھ کا ہے یا خمارِ بادہ و مے​

یہ آئینہ مجھے الٹا دکھائی دیتا ہے​

​

جلا عدو کا جو گھر تو حسد میں اے امجد!​

مرا بھی گھر اسے جلتا دکھائی دیتا ہے​

​

الف عین محمد یعقوب آسی محمداحمد محمد خلیل الرحمٰن امجد علی راجا متلاشی محمدعلم اللہ اصلاحی ابن سعید خرم شہزاد خرم محمد وارث ملک عدنان احمد انیس الرحمن عبدالقدوس راشد محمد شعیب مزمل شیخ بسمل شمشاد وجی
عینی شاہ نیلم مہ جبین تبسم حوا کی بیٹی ملائکہ عندلیب mano بنت عائشہ قرۃالعین اعوان مؤثرہ

 

[محمد اسامہ سَرسَری]

​

قطعہ​

​

رسوا ہوا میں کب؟ مجھے اس کی خبر نہیں!​

تنہا ہوا میں کب مجھے اس کی خبر نہیں!​

​

وہ میرے ہوگئے ہیں ، خبر ہے مجھے ، مگر​

ان کا ہوا میں کب؟ مجھے اس کی خبر نہیں!​

شاعر: امجد اکبر​

 

[بنت عائشہ]

بہت خوب

 

[مزمل شیخ بسمل]

شکریہ اسامہ ٹیگ فرمانے کا۔ اچھا کلام ہے۔ بہر حال اساتذہ کے تبصروں سے یقیناً فائدہ ہوگا۔ کیونکہ تبصرے کی ضرورت بہر حال ہے۔
الف عین
محمد یعقوب آسی
صاحبان

 

[محمد یعقوب آسی]

بہت شکریہ جناب اسامہ

 

[محمد اسامہ سَرسَری]

مجھے برباد کرنے سے تجھے حاصل ہوا کیا ہے​

یہ دل ناشاد کرنے سے تجھے حاصل ہوا کیا ہے​

بتا امجد جہاں تیری نہ سننے والا تھا کوئی​

وہاں فریاد کرنے سے تجھے حاصل ہوا کیا ہے​

شاعر: امجد اکبر​

 

[الف عین]

خوب۔

 

[متلاشی]

بہت خوب جناب اسامہ صاحب۔۔۔!

 

[قرۃالعین اعوان]

واہ!

 

[محمد اسامہ سَرسَری]

خوب۔

بہت خوب جناب اسامہ صاحب۔۔۔ !

واہ!

امجد اکبر صاحب کا کلام پسند کرنے پر ممنون ہوں۔

 

[محمد اسامہ سَرسَری]

تمھیں دل نے پکارا ہے ، کہاں ہو تم چلے آؤ​

بہت ہی تم کو ڈھونڈا ہے ، کہاں ہو تم چلے آؤ​

​

تمھارے بن نہ جیتا ہوں ، تمھارے بن نہ مرتا ہوں​

عجب ہی حال میرا ہے ، کہاں ہو تم چلے آؤ​

​

بنا کر آپ کی تصویر اس سے پوچھتا ہوں میں​

ابھی کتنا ستانا ہے ، کہاں ہو تم چلے آؤ​

​

اگر اب بھی نہ آؤ گے ، بتاؤ پھر کب آؤ گے​

کہ اٹھنے کو جنازہ ہے ، کہاں ہو تم چلے آؤ​

​

تم اک دن لوٹ آؤ گے ، مری اس آس پر امجد!​

زمانہ مجھ پہ ہنستا ہے ، کہاں ہو تم چلے آؤ​

شاعر: امجد اکبر​

​

 

[محمد اسامہ سَرسَری]

جنھیں ہم چاہتے تھے ان سے بھی ہم مل نہیں سکتے​

قیامت سے بھلا امجد! یہی کیا کم قیامت ہے​

شاعر: امجد اکبر​

​

 

[محمد اسامہ سَرسَری]

قسم خدا کی بڑے پُر اثر تھے​

اگرچہ بول ترے مختصر تھے​

​

ہماری ہوتی ملاقات کیسے​

کہ ہم الگ وہ الگ راہ پر تھے​

​

جنھیں نہ آج کوئی دیکھتا ہے​

سنو یہی کبھی رشکِ قمر تھے​

​

ان آندھیوں نے گرایا شجر وہ​

کہ جس شجر ہ پرندوں کے گھر تھے​

​

ہمارے قتل سے سب باخبر تھے​

ہمارے قتل سے وہ بے خبر تھے​

​

جو جل رہے تھے پسِ پشت امجد​

پلٹ کے دیکھا تو اپنے ہی گھر تھے​

شاعر: امجد اکبر​

 

[محمد اسامہ سَرسَری]

ان سے اس بار ملاقات بھی ہوسکتی ہے​

ان سے اس بار مری بات بھی ہوسکتی ہے​

میری محفل میں وہ آئے نہیں امجد ان کو​

کوئی مجبوریٔ حالات بھی ہوسکتی ہے​

شاعر: امجد اکبر​

 

[محمد اسامہ سَرسَری]

تمھی تو ہو رحمتِ دو عالم ، درود تم پر ، سلام تم پر!​

ہیں تم پہ سو جان سے فدا ہم ، درود تم پر ، سلام تم پر!​

​

خدا کی رحمت کا ابر برسا ، سکوں دلِ مضطرب کو آیا​

درود تم پر پڑھا ہے جس دم ، درود تم پر ، سلام تم پر!​

​

چراغ توحید کا جلایا ہے تم نے ایسا کہ تا قیامت​

نہ روشنی جس کی ہوگی مدھم ، درود تم پر ، سلام تم پر!​

​

ہے دل میں ماں باپ کی بھی الفت ، ہے دل میں اولاد کی بھی الفت​

تمھاری الفت سے پر ہے کم کم ، درود تم پر ، سلام تم پر!​

​

مزہ حقیقت میں زندگی سے وہ آدمی ہی اٹھا رہا ہے​

کہ جس کے دل میں تمھارا ہے غم ، درود تم پر ، سلام تم پر!​

​

سبق پڑھایا ہے یہ تمھی نے کہ رب سے مانگو ڈرو اسی سے​

اسی کے آگے ہی سر کرو خم ، درود تم پر ، سلام تم پر!​

​

نہ اس نے پایا زماں تمھارا ، نہ اس نے دیکھا تمھارا روضہ​

ہے آنکھ امجد کی اس لیے نم ، درود تم پر ، سلام تم پر!​

شاعر: امجد اکبر​

​

 

[محمد اسامہ سَرسَری]

بن ترے عمر یوں کٹی میری​

ڈھل گئی غم میں ہر خوشی میری​

​

اشک اپنے وہ پھر نہ روک سکا​

داستاں اس نے جب سنی میری​

​

کل بھی ان سے نہ بات کہہ پایا​

آج بھی بات رہ گئی میری​

​

آج آخر وہ بن گئے میرے​

رنگ لائی ہے عاشقی میری​

​

گھومتی گھومتی نظر امجد!​

ان پہ جاکر ٹھہر گئی میری​

 

[محمد اسامہ سَرسَری]

تم ساری شب ہماری ہی سنتے رہو گے کیا؟​

اپنی بھی کچھ سناؤ کہ دل بے قرار ہے​

شاعر: امجد اکبر​

 

[محمد اسامہ سَرسَری]

نہ دولت کی تمنا ہے ، نہ شہرت کی تمنا ہے​

جو سچ پوچھو محمد کی زیارت کی تمنا ہے​

خدا کو اور پیغمبر کو جیسی اچھی لگتی ہے​

مجھے ویسی ہی صورت اور سیرت کی تمنا ہے​

مرا سب کچھ رسول اللہ پر قربان ہوجائے​

خدا شاہد ہے مجھ کو اس سعادت کی تمنا ہے​

اسے جاکر یہ کہہ دو تم کہ طیبہ دیکھ آئے وہ​

زمیں پر دیکھنے کی جس کو جنت کی تمنا ہے​

محمد مصطفی کی وہ کرے پھر اتباع امجد!​

کہ جس کو رب تعالیٰ کی محبت کی تمنا ہے​

شاعر: امجد اکبر​

 

[محمد اسامہ سَرسَری]

چمن چمن اداس ہے ، کلی کلی اداس ہے​

تمھارے بن اے جانِ جاں ، گلی گلی اداس ہے​

شاعر: امجد اکبر​

​