آپ کے پسندیدہ اشعار!

[ڈاکٹر چوہدری ابرار ماجد]

کہہ رہا ہے شور دریا سے سمندر کا سکوت
جس کا جتاظرف ہے اتنا ہی وہ خاموش ہے

 

[فرقان احمد]

تیری نگاہِ ناز میں ، میرا وجود ، بے وجود
میری نگاہ ناز میں ، تیرے سوا، کوئی نہیں

 

[فرقان احمد]

نہ اب وہ یادوں کا چڑھتا دریا نہ فرصتوں کی اداس برکھا
یونہی ذرا سی کسک ہے دل میں، جو زخم گہرا تھا، بھر گیا وہ

 

[فرقان احمد]

ہمارے بعد کوئی آنکھ نم ہوئی کہ نہیں
جو ہو سکے تو یہ منظر بھی دیکھ کر جائیں

 

[ڈاکٹر چوہدری ابرار ماجد]

گر بنو تو درخشندہ آفتاب بنو
بجھے بجھے ستاروں کی زندگی ہے کیا

 

[فرقان احمد]

عمر گزرے گی امتحان میں کیا
داغ ہی دیں گے مجھ کو دان میں کیا

میری ہر بات بے اثر ہی رہی
نقص ہے کچھ مرے ۔۔۔ بیان میں کیا

بولتے کیوں نہیں مرے حق میں
آبلے پڑ گئے ۔۔۔۔۔۔زبان میں کیا

مجھ کو تو کوئی ٹوکتا بھی نہیں
یہی ہوتا ہے ۔۔۔ خاندان میں کیا

اپنی محرومیاں چھپاتے ہیں
ہم غریبوں کی ۔۔۔ آن بان میں کیا

وہ ملے تو یہ پوچھنا ہے مجھے
اب بھی ہوں میں تری امان میں کیا

یوں جو تکتا ہے آسمان کو تو
کوئی رہتا ہے ۔۔۔۔ آسمان میں کیا

ہے نسیم بہار ۔۔۔۔۔۔۔ گرد آلود
خاک اڑتی ہے اس ۔۔۔۔ مکان میں کیا

یہ مجھے چین کیوں نہیں پڑتا
ایک ہی شخص تھا ۔۔۔ جہان میں کیا

خود کو دنیا سے مختلف جانا
آگیا تھا مرے ۔۔۔۔۔۔ گمان میں کیا

 

[فرقان احمد]

عرصہء عمر جس کا نام ہے آہ
برق تھی یا شرار تھا، کیا تھا!

 

[فرقان احمد]

ہم نے دیکھا ہے زمانے کا بدلنا لیکن
ان کے بدلے ہوئے تیور نہیں دیکھے جاتے

 

[فرقان احمد]

چراغ بجھتے چلے جا رہے ہیں سلسلہ وار
میں خود کو دیکھ رہا ہوں فسانہ ہوتے ہوئے

 

[فرقان احمد]

بہت ہے، آئینے جن قیمتوں میں بک جائیں
یہ پتھروں کا زمانہ ہے، شیشہ گر میرے!!!

 

[ہادیہ]

تنہا سمجھ رہا ہے میرے دل کو چارہ گر
دنیا بسی ہے اس میں کسی کے خیال کی

 

[فرقان احمد]

نہ اجنبی ہے کوئی اور نہ آشنا کوئی
اکیلے پن کی بھی ہوتی ہے انتہا کوئی!

 

[فرقان احمد]

کہنے کو زندگی تھی بہت مُختصر مگر
کچھ یُوں بسر ہوئی، کہ خُدا یاد آ گیا

 

[فرقان احمد]

محشر کا خیر کچھ بھی نتیجہ ہو اے عدم
کچھ گفتگو تو کھل کے کریں گے خدا کے ساتھ

 

[فرقان احمد]

چُپ چاپ سر ِ شہر ِ وفا سوچ رہے ہو
لگتا ہے کوئی اپنی خطا سوچ رہے ہو

وہ کون ہے گُذرا تھا جو اِس راہگزر سے
کِس کے ہیں نقوش ِ کف ِ پا سوچ رہے ہو

 

[فرقان احمد]

ہم سہل طلب کون سے فرہاد تھے لیکن!
اب شہرمیں تیرے، کوئی ہم سا بھی کہاں ہے

 

[فرقان احمد]

خرد رقیبِ تماشا ہے، دل رہینِ جمال
وہ کش مکش ہے سکوں عمر بھی ملے نہ ملے

 

[فرقان احمد]

میں وہاں ہوں جہاں جہاں تم ہو​

تم کرو گے کہاں کہاں سے گریز​

 

[محمد وارث]

میں وہاں ہوں جہاں جہاں تم ہو
تم کرو گے کہاں کہاں سے گریز​

فرقان صاحب اگر ساتھ شاعر کا نام بھی لکھتے جائیں، یعنی جب معلوم ہو، تو حق بحقدار رسید والا معاملہ ہو جائے

 

[فرقان احمد]

فرقان صاحب اگر ساتھ شاعر کا نام بھی لکھتے جائیں، یعنی جب معلوم ہو، تو حق بحقدار رسید والا معاملہ ہو جائے

وارث بھیا، ہم ایسے اہل ہوتے تو کم از کم محترم طارق شاہ کے مرید تو بن ہی جاتے شاید وہ بھی اب اس لڑی میں اس لیے تشریف نہیں لاتے ۔۔۔ !!! دراصل انہوں نے ایک اچھا کام یہ کیا ہے کہ نئی لڑی بنا کر گویا ایک شرط سی عائد کر دی ہے کہ شعر درج کیا جائے تو شاعر کا نام بھی لکھا جائے؛ یہ ایک اچھی روایت ہے تاہم زیرنظر لڑی میں کوالٹی پر کمپرومائز کر لیا گیا ہے؛ جس کے ہاتھ جو لگا، پوسٹ کر دیا۔ ہے تو غلط بات، تاہم، مارکیٹ میں سب کچھ بکتا ہے ۔۔۔
ویسے، یہ شعر ۔۔۔
میں وہاں ہوں جہاں جہاں تم ہو
تم کرو گے کہاں کہاں سے گریز
احمد فراز مرحوم کا ہے۔
گوگل پر سرچ کی تو معلوم ہوا کہ آپ کے بلاگ پر بھی یہ غزل موجود ہے۔ پھر، انکشاف ہوا کہ اُستادِ محترم امتحان لے رہے ہیں
سلامت رہیں