آپ کے پسندیدہ اشعار!

[ظہیراحمدظہیر]

قسمت کیا ہر ایک کو قسّامِ ازل نے
جوشخص کہ جس چیز کے قابل نظر آیا
(ناسؔخ)

 

[فرقان احمد]

کیوں میری تمنا کی طرف دیکھ رہے ہو!
کیا تم نے کبھی آگ پہ خِرمن نہیں دیکھا

اُس نے بھی تبسم کا ہُنر دیکھ کے نیرؔ
آلام چھُپانے کا مرا فن نہیں دیکھا

شہزاد نیر

 

[لاريب اخلاص]

مکان چہرے دکان چہرے

ہماری بستی کی جان چہرے

اجاڑ نسلوں کے نوحہ گر ہیں

خزاں رسیدہ جوان چہرے

دھواں دھواں منظروں کا حصہ

خیال خوشبو گمان چہرے

روایتوں کے نقوش جن پر

وہ کھنڈروں سے مکان چہرے

کوئی تأثر ہو زندگی کا

کریں خوشی غم بیان چہرے

کوئی نہیں ہے کسی سے واقف

نگر میں سب بے نشان چہرے

حنیفؔ قدریں بدل چکی ہیں

نہ ڈھونڈ وہ درمیان چہرے

فرحان حنیف وارثی

 

[لاريب اخلاص]

یہ کس نے کہا تم کوچ کرو باتیں نہ بناؤ انشاؔ جی

یہ شہر تمہارا اپنا ہے اسے چھوڑ نہ جاؤ انشاؔ جی

جتنے بھی یہاں کے باسی ہیں سب کے سب تم سے پیار کریں

کیا ان سے بھی منہ پھیرو گے یہ ظلم نہ ڈھاؤ انشاؔ جی

کیا سوچ کے تم نے سینچی تھی یہ کیسر کیاری چاہت کی

تم جن کو ہنسانے آئے تھے ان کو نہ رلاؤ انشاؔ جی

تم لاکھ سیاحت کے ہو دھنی اک بات ہماری بھی مانو

کوئی جا کے جہاں سے آتا نہیں اس دیس نہ جاؤ انشاؔ جی

بکھراتے ہو سونا حرفوں کا تم چاندی جیسے کاغذ پر

پھر ان میں اپنے زخموں کا مت زہر ملاؤ انشاؔ جی

اک رات تو کیا وہ حشر تلک رکھے گی کھلا دروازے کو

کب لوٹ کے تم گھر آؤ گے سجنی کو بتاؤ انشاؔ جی

نہیں صرف قتیلؔ کی بات یہاں کہیں ساحرؔ ہے کہیں عالیؔ ہے

تم اپنے پرانے یاروں سے دامن نہ چھڑاؤ انشاؔ جی


قتیل شفائی

 

[عدنان عمر]

گو ہاتھ کو جنبش نہیں آنکھوں میں تو دم ہے
رہنے دو ابھی ساغر و مینا میرے آگے

مرزا غالب

 

[لاريب اخلاص]

ہماری آنکھیں اُداس غزلوں کے قافیے ہیں

ہمارا چہرہ پرانے وقتوں کی شاعری ہے
جہانزیب ساحر

 

[عدنان عمر]

آج وہ دیکھنے بیٹھے ہیں میرے دل کی کتاب
ایک ہِر پھر کے محبت ہی کا نام آتا ہے

 

[فرقان احمد]

آج وہ دیکھنے بیٹھے ہیں میرے دل کی کتاب
ایک ہِر پھر کے محبت ہی کا نام آتا ہے

کس شاعر کا کلام ہے سر؟

 

[عدنان عمر]

کس شاعر کا کلام ہے سر؟

یہ نہیں معلوم جناب۔ کہیں سنا تھا۔

 

[سحر کائنات]

وقت کی بے رحم موجوں نے بنا ڈالے
حصہ زندگی سے قصہ زندگی کچھ لوگ

 

[عدنان عمر]

‏کیا کروں میں کہ مجھ کو تیرے بنا
ساتھ اپنا بھی اب نہیں بھاتا
جس سمے تم نے ساتھ چھوڑا تھا
وہ سمے چھوڑ کر نہیں جاتا
۔۔۔۔۔۔
فیصل فارانی

 

[لاريب اخلاص]

غنچوں کے چٹکنے کی صدا تھے میرے بابا
پھولوں کے مہکنے کی ادا تھے میرے بابا

پہنچاتے تھے ہر شخص کو جو فیض مسلسل
بس قادرِ مطلق کی عطا تھے میرے بابا

ہر لفظ میں اُن کے لیے اِک جذبہ ءِ تحسیں
اخلاص و عنایت کی نوا تھے میرے بابا

دنیا میں وہ انسان کی عظمت کے تھے پیکر
دیں دار تھے ، تصویرِ حیا تھے میرے بابا

ہر محفلِ بے رنگ کو کرتے تھے وہ خوش رنگ
سب جلتے چراغوں کی ضیا تھے میرے بابا

ہر شخص پہ ہوتی تھی کرامات کی بارش
ہاں سب کے لیے حرفِ دعا تھے میرے بابا

اُن کے لیے رابیلؔ ہے ہر آن دعائیں
میرے لیے انعامِ خدا تھے میرے بابا

گُلِ رابیل

 

[فرقان احمد]

دیکھیے رُسوا نہ ہو جائے کہیں رسمِ جُنوں
اپنے دیوانے کو اک پتھر تو مارے جائیے !!!



حنیف اخگر ملیح آبادی

 

[عدنان عمر]

ہم سے پہلے بھی مسافر کئی گزرے ہوں گے
کم سے کم راہ کے پتھر تو ہٹاتے جاتے
۔۔۔۔۔
راحت اندوری

 

[محمد مغیرہ عاصم]

تیری جستجو میں یہاں وہاں، میری ساری عمر گزرگئی
ہے کہاں نہاں میری داستاں ، میری ساری عمر گزر گئی

میرا عشق کتنا عجیب ہے تو حبیب ہے نہ رقیب ہے
میں ہوں اپنی ذات میں خوش گماں میری ساری عمر گزرگئی

 

[عدنان عمر]

یہ فقط آپ کی عنایت ہے
ورنہ میں کیا میری حقیقت کیا

 

[جاسمن]

ہم سے پہلے بھی مسافر کئی گزرے ہوں گے
کم سے کم راہ کے پتھر تو ہٹاتے جاتے
۔۔۔۔۔
راحت اندوری

واہ!
بہت خوب!

 

[فرقان احمد]

اِس کا سوچا بھی نہ تھا اب کے جو تنہا گُزری
وہ قیامت ہی غنیمت تھی ۔۔۔۔۔۔۔ جو یکجا گُزری


(احمد فراز)

 

[عدنان عمر]

‏منتِ چارہ ساز کون کرے
درد جب جاں نواز ہو جائے

― فیض احمد فیض

 

[عدنان عمر]

بہارو رنگ و نکہت سے غرض کیا ہوش مندوں کو
کہ یہ پیغام جب آیا تو دیوانوں کے نام آیا