فی البدیہہ شاعری (موضوعاتی / غیر موضوعاتی)

[فیصل عظیم فیصل]

نئے سال کے پہلے دن
صبح سویرے جب تم جاگو
اٹھنا تیرا خوش خوش سا ہو
رنگ دھنک کا تم پر چھائے
گئے سال کی ہر ان چاہی
آنے والا سال بچائے
تیری سوچ میں جو خواہش ہے
اللہ اگلے سال ملائے
ان سے جن سے تیرا جھگڑا
اللہ ان سے صلح کرائے
یہ جان لینا تمہاری خاطر
کوئی ہے اپنے ہاتھ اٹھائے
خدائے سبحان تم کو اپنی امان دے دے
وہ ہر خوشی جو تمہارا حق ہے تمہیں ملائے
عمر کا جتنا سفر ہے باقی ترے سفر میں
ہرایک پل رب ہو تجھ سے راضی
ہر ایک پل تیری زندگی کا نجات پائے
سبھی دکھوں سے سبھی غمو ں سے
اندھیری راتوں کے رت جگوں سے
میرے یہ دو ہاتھ تیری خاطر اٹھے ہوئے ہیں
میرے خدا سے یہی ہے التجا خدایا
سبھی کو اپنی پناہ دینا سبھی دکھوں سے
سبھی اندھیروں سے ظلمتوں سے
میرے خدایا سبھی کو اپنی پناہ دینا
غرور و نفرت ،ضلالتوں سے
میرے خدایا سبھی کو دینا
تیرے ہدایا ہدایتوں کے
تمہیں بھی اتنا کہوں کہ جانو (جانُو نہیں ہے بلکہ جان لو کے ہم معنی ہے)
خدا سے مانگو اور اسکے درپر سوال کرنا
اسی کی خاطر کرو محبت اسی کی خاطر قتال کرنا
مگر کبھی بھی حدود رب کو نہ کم سمجھ کر پامال کرنا
خدا سے ڈرنا اسی سے اپنے سوال کرنا
حبیب رب سے کرو محبت سبھی سے بڑھ کے
مگر خدا سے بڑھے محبت کبھی نہ ایسی مجال کرنا
اسی طرح سے شروع اپنا یہ سال کرنا
یہ سال کرنا

 

[ابن سعید]

بہت خوب فیصل بھائی۔

خیر ابھی کے لئے خود کو یہی کہوں گا کہ:

میں ہوں مصروف امتحانوں میں
ٹھونس لینے دو روئی کانوں میں

خیر آنکھیں تو پھر بھی پڑھتی رہیں گی۔

 

[فخرنوید]

ٹھونس لو روئی کانوں میں
آنکھیں بدل لو بانٹوں میں

 

[فیصل عظیم فیصل]

خبر ہے ان کی دید کیا کہیئے
اور فخرے نوید کیا کہیے۔۔!
ہم صحافی نہیں ہیں اخباری
اب کہ فیصل مزید کیا کہیئے
بنٹے کھیلیں تو ہم سے آجائیے
کیوں میاں بن سعید کیا کہیے
گر کسی کا دکھائیں بات سے دل
ایسی گفت و شنید کیا کہیئے

 

[فیصل عظیم فیصل]

ب۔۔ہت دنوں سے نہیں کچھ کہا گیا ہم سے
چلو یہ دیکھ لیں کیسے سخن شناس ہیں ہم

 

[مغزل]

لیجے تازہ شعر:
میں کہیں اپنے آپ میں گم ہوں
’’شعر‘‘ والوں سے رابطہ ہی نہیں

 

[نوید صادق]

دوستو! آئنہ نظر میں رہے
شعر کہنا اگر ضروری ہے ؟؟

 

[مغزل]

آپ کا شکریہ ، یہاں آئے
آپ کا شکریہ ، نوید انکل !

 

[نوید صادق]

یہ جو انکل کہا گیا ہے ہمیں
سرِ‌تسلیم خم ہے اس پر بھی

 

[انیس فاروقی]

یہ لڑی کیوں رہی پوشیدہ
یہ تو مرض ہے پسندیدہ
وہ جو اصلاح کی لڑی ہے یہاں
ہم تو بس ہیں اسی کے گرویدہ

 

[الف عین]

تم نے ڈھونڈا نہیں یہیں شاید
یہ ہے فیصل کی سر زمیں شاید
تھی جو اک شخص کے ’تکلم‘ سے
اب وہ گرمی یہاں نہیں شاید

 

[مغزل]

سانس لینے کو رک گیا تھا میں
آپ سمجھے کہ میں نہیں شاید

 

[مغزل]

یہ جو انکل کہا گیا ہے ہمیں
سرِ‌تسلیم خم ہے اس پر بھی

سرِ تسلیم سے خوئے تسلیم
وائے تسلیم وائے رے ’’ تسلیم ‘‘

 

[فیصل عظیم فیصل]

تم نے ڈھونڈا نہیں یہیں شاید
یہ ہے فیصل کی سر زمیں شاید
تھی جو اک شخص کے ’تکلم‘ سے
اب وہ گرمی یہاں نہیں شاید

سرد موسم میں کون سی گرمی
سخت جاں اور گفت گو نرمی
میں یہیں ہوں مگر کہوں کیسے
جھوٹ کہنا بھی ایک بے شرمی
دیس میں جس طرح کی حالت ہے
نرم و نازک کلام ہٹ دھرمی

 

[فیصل عظیم فیصل]

یہ لڑی کیوں رہی پوشیدہ
یہ تو مرض ہے پسندیدہ
وہ جو اصلاح کی لڑی ہے یہاں
ہم تو بس ہیں اسی کے گرویدہ

چلو اچھا ہوا کہ آپ کی نظروں میں آگئی
اب ہم بھی میزبان کہیں خود کو آپ کے

 

[فیصل عظیم فیصل]

سانس لینے کو رک گیا تھا میں
آپ سمجھے کہ میں نہیں شاید

مری سانسیں بھی آپ لے لیجئے
اب نہ محفل سے دور جائیے گا

 

[فیصل عظیم فیصل]

لیجے تازہ شعر:
میں کہیں اپنے آپ میں گم ہوں
’’شعر‘‘ والوں سے رابطہ ہی نہیں

شعر والے اگر نہیں ملتے
شئیر والوں سے رابطہ کر لو

 

[فیصل عظیم فیصل]

دوستو! آئنہ نظر میں رہے
شعر کہنا اگر ضروری ہے ؟؟

آئینہ دیکھنا تکلف ہے
ہم کواپنی لجا ستاتی ہے

 

[مغزل]

ہائے یہ اہتمامِ شد ومد
وائے یہ انصرامِ کدو رد

 

[نوید صادق]

آئینہ دیکھنا تکلف ہے
ہم کواپنی لجا ستاتی ہے

روز فتنے نئے جگاتی ہے
یہ لجا سانحے بڑھاتی ہے
بات کھل کر کرو تو بہتر ہے
گفتگو راستے سجھاتی ہے