غم حسین علیہ السلام پر اشعار

[سیدہ شگفتہ]

رگوں میں خون شہیداں جو سرد ہو جاتا
تو رنگ سارے گلابوں کا زرد ہو جاتا
حسین تیرا لہو اس میں رچ گیا ورنہ
یہ خاک زار جہاں گرد گرد ہو جاتا

عبالقادر تاباں

 

[سیدہ شگفتہ]

ازل نے چن کے لوگ وہ دیے حسین کے لیے
جنوں نے جان و دل فدا کیے حسین کے لیے

انجم

 

[سیدہ شگفتہ]

اپنی اپنی ذات کے غم کو دل زدگاں
دشت بلا کے ذروں میں ضم کرتے ہیں

لوح وفا پر ان کا نام نہیں رہتا
پیش یزید جو سر اپنا خم کرتے ہیں

حسن رضا عباس

 

[سیدہ شگفتہ]

پاؤں برہنہ بیبیاں تھیں اور شام کی گلیاں
شہر کی فصیلوں پر تھا کندہ ماتم

حسن رضا عباس

 

[سیدہ شگفتہ]

اے خاک بے بصر تیرامہماں ہوا ہے کون
جان بتول و لخت دل مصطفیٰ ہے کون

سچ پوچھیے تو اپنا تشخص اسی سے ہے
بے چہرگی کے دور میں چہرہ نما ہے کون

قاتل ہر ایک ظلم کا ہو اور قتیل بھی
ایک حسین ابن علی ہے دوسرا ہے کون

توصیف تبسم

 

[سیدہ شگفتہ]

چراغ شام میں لَو ہے کئی چراغوں کی
بسی ہیں صورتیں آنکھوں میں جانے والوں کی
نبی کا گھر ہے بڑا محترم سمجھتے تھے
زباں سمجھتے نہ تھے جو کج زمانوں کی
لہو میں ڈوب جا اے دیدہ نظار ا طلب
پڑی ہے خاک میں تصویر آسمانوں کی

توصیف تبسم

 

[سیدہ شگفتہ]

وہ جو نورِ چشمِ بتول تھا، جو گُل ریاضِ رسول تھا
اسی ایک شخص کے قتل سے میری کتنی صدیاں اُداس ہیں

احمد ندیم قاسمی

 

[محمد عدنان اکبری نقیبی]

غم میں کسی کے لاکھ کوئی روئے عمر بھر
ہے کون کربلا کے عزادار کی طرح

اسد اقبال

 

[اکمل زیدی]

غمِ حسین کا دِ ل سے اثر نہیں جاتا
یہ وہ ملال ہے جو عُمر بھر نہیں جاتا

 

[محمد عدنان اکبری نقیبی]

تُم ایسے شخص سے کرنے لگے ہو عید کی بات؟؟
جو ماہِ "صوم" ۔۔۔کی "اکیسویں" کا دکھ سمجھے

ن ع ساجد

 

[فاخر رضا]

آنکھوں کے ساحلوں پہ ہے اشکوں کا اک ہجوم
شاید غم حسین کا موسم قریب ہے

 

[محمد عدنان اکبری نقیبی]

میں سوچتا ہوں کہ حق کس طرح ادا ہو گا ؟
غم حسین زیادہ ہے زندگی کم ہے

 

[محمد عدنان اکبری نقیبی]

دیکھو تو سلسلہ ادب مشرقین کا
دنیا کی ہر زباں پہ قبضہ حسین کا

 

[محمد عدنان اکبری نقیبی]

جے سنگھ پناہ مانگے گی مجھ سے نرگ کی آگ
ہندو تو ہوں مگر ہوں میں شیدا حسین کا

جے سنگھ

 

[محمد عدنان اکبری نقیبی]

سوالِ بیعتِ شمشیر پر جواز بہت
مگر جواب وہی معتبر حسین کا ہے

عارف افتخار

 

[محمد عدنان اکبری نقیبی]

یہ بچھتی جا رہی ہے ارضِ مقتل کس کے قدموں میں
ادا کس نے کیا یہ زیرِ خنجر عصر کا سجدہ

نصرت زیدی

 

[محمد عدنان اکبری نقیبی]

یہ معجزہ بھی پیاس جہاں کو دکھا گئی
آنکھوں میں آنسوئوں کی سبیلیں لگا گئی
کرب و بلا میں دیکھیے شبیرؑ کی ’’نہیں ‘‘
ہر دور کے یزید کو جڑ ے مٹا گئی

سورج سنگھ سورج

 

[محمد عدنان اکبری نقیبی]

قرآن اور حسین برابر ہیں شان میں
دونوں کا رتبہ ایک ہے دونوں جہان میں
قرآں کلامِ پاک ہے شبیر نور ہے
دونوں جہاں میں دونوں کا یکساں ظہور ہے

دلو رام کوثری

 

[محمد عدنان اکبری نقیبی]

سلامی کیا کوئی بے کار ہے جی سے گزر جانا
حیاتِ جاوداں ہے شاہ کے ماتم میں مر جانا
نہیں آتا جنہیں راہِ حقیقت سے گزر جانا
حسین ابنِ علی سے سیکھ لیں وہ لوگ مر جانا

حکیم چھنو مل دہلوی

 

[محمد عدنان اکبری نقیبی]

گلشنِ صدق و صفا کا لالۂ رنگیں حسین
شمعِ عالم، مشعلِ دنیا، چراغِ دیں حسین

بادۂ ہستی کا ہستی سے تری ہے کیف و کم
اٹھ نہیں سکتا ترے آگے سرِ لوح و قلم

کنور مہندر سنگھ بیدی