داغ بزمِ دشمن میں نہ کھلنا گلِ تر کی صورت ۔ داغ دہلوی

[فاتح]

بزمِ دشمن میں نہ کھلنا گلِ تر کی صورت​

جاؤ بجلی کی طرح آؤ نظر کی صورت​

​

نہ مٹانے سے مٹی فتنہ و شر کی صورت​

نظر آتی نہیں اب کوئی گذر کی صورت​

​

سوچ لے پہلے ہی تو نفع و ضرر کی صورت​

نامہ بر تجھ کو بھلا دیں گے وہ گھر کی صورت​

​

کیا خبر کیا ہوئی فریاد و اثر کی صورت​

کہ ادھر کب نظر آتی ہے ادھر کی صورت​

​

بگڑی شوریدہ سری سے مرے گھر کی صورت​

وہی دیوار کی صورت ہے جو در کی صورت​

​

چھپ کے بیٹھے ہو اگر مجھ سے چلو یونہی سہی​

میں بھی اٹھنے کا نہیں پردۂ در کی صورت​

​

اس کو دیکھے کوئی محفل میں، یہ کس کی طاقت​

ہر بشر دیکھنے لگتا ہے بشر کی صورت​

​

بارِ تشبیہ سے دہرے وہ ہوئے جاتے ہیں​

کیوں رگِ جاں سے ملائی تھی کمر کی صورت​

​

نامہ بر جان کے میں اس کے قدم لیتا ہوں​

جب بنا کر کوئی آتا ہے سفر کی صورت​

​

نہیں معشوق کوئی حسن و ادا سے خالی​

اس پہ صورت بھی مرے رشکِ قمر کی صورت​

​

اے جنوں! خاکِ بیاباں کو بیاباں سمجھوں​

میری آنکھوں میں ابھی پھرتی ہے گھر کی صورت​

​

ان کے جانے کا وہ صدمہ، وہ مری تنہائی​

اور روتی ہوئی وہ شمعِ سحر کی صورت​

​

رشک آئینے سے کیا، وہم تو اس بات کا ہے​

تیرے دل میں نہ پھرے آئینہ گر کی صورت​

​

خط میں لکھا تھا کہ آتا ہے کلیجا منہ کو​

اب دکھائیں انہیں کس منہ سے جگر کی صورت​

​

وصف حورانِ بہشتی کے سنے، اے واعظ!​

سب سے اچھی ہے جو اچھی ہے بشر کی صورت​

​

لبِ پاں خوردہ کی شوخی پہ نہ اترا ظالم​

ملتی جلتی ہے مرے زخمِ جگر کی صورت​

​

خواب راحت سے جو اٹھے ہیں وہ کلمہ پڑھتے​

نظر آئی ہے کسی پاک نظر کی صورت​

​

آج آنکھیں نہیں یا میں نہیں، دیکھو تو غضب​

کہ دکھائی ہے مجھے غیر کے گھر کی صورت​

​

آئے تھے گھر میں مرے آگ ببولا بن کر​

ٹھنڈے ٹھنڈے وہ گئے بادِ سحر کی صورت​

​

ہاتھ آنکھوں پہ شبِ وصل عبث رکھتے ہو​

میری صورت نہ سہی، دیکھو سحر کی صورت​

​

آپ نے کی ہیں عبث شرم سے نیچی آنکھیں​

چبھ گئی یہ بھی ادا دل میں نظر کی صورت​

​

دل سے نکلے تو پھرے خانہ خرابوں کی طرح​

تم نے برسوں کبھی دیکھی نہیں گھر کی صورت​

​

منتظر ہجر میں ہم، وصل میں مشتاق ہو تم​

نظر آتی نہیں دونوں کی سحر کی صورت​

​

در و دیوار کا جلوہ نہیں دیکھا جاتا​

ان کے آتے ہی بدل جاتی ہے گھر کی صورت​

​

کوئی دم کوئی گھڑی کل نہیں پڑتی دل کو​

میں بیاں کس سے کروں آٹھ پہر کی صورت​

​

لیے جاتا ہے ہمیں جوشِ جنوں صحرا کو​

دیکھتے جاتے ہیں منہ پھیر کے گھر کی صورت​

​

حضرتِ داغؔ تو شاعر ہیں، ہوا باندھتے ہیں​

نہ دعا کی کوئی صورت، نہ اثر کی صورت​

نواب مرزا خان داغؔ دہلوی کے مجموعۂ کلام "مہتابِ داغ" سے انتخاب

 

[محمد وارث]

لاجواب۔

شکریہ فاتح صاحب ارسال فرمانے کیلیے

 

[فاتح]

لاجواب۔

شکریہ فاتح صاحب ارسال فرمانے کیلیے

پسند فرمانے پر شکریہ وارث صاحب

 

[ماروا ضیا]

عمدہ انتخاب

 

[فاتح]

عمدہ انتخاب

شکریہ ماروا صاحبہ

 

[شیزان]

بھئی واہ۔۔
اِتنا عمدہ کلام اور وہ بھی مکمل۔۔
بےحد شکریہ فاتح بھائی اس عنایت کا۔۔ لطف آ گیا