آپ کے پسندیدہ اشعار!

[طارق شاہ]

غم کی بارش نے بھی تیرے نقش کو دھویا نہیں
تُو نے مجھ کو کھو دِیا ، میں نے تجھے کھویا نہیں

نیند کا ہلکا گلابی سا خُمار آنکھوں میں تھا !
یُوں لگا جیسے وہ شب کو دیر تک سویا نہیں

ہر طرف دیوار و در اور اُن میں آنکھوں کے ہجوم
کہہ سکے جو دل کی حالت ، وہ لبِ گویا نہیں

جرم آدم نے کِیا ، اور نسلِ آدم کو سزا
کاٹتا ہُوں زندگی بھر میں نے جو بویا نہیں

جانتا ہُوں ایک ایسے شخص کو میں بھی مُنیر
غم سے پتھر ہو گیا ، لیکن کبھی رویا نہیں

مُنیر نیازی

 

[طارق شاہ]

خلشِ ہجرِ دائمی نہ گئی
تیرے رُخ سے یہ بے رُخی نہ گئی

پُوچھتے ہیں کہ، کیا ہُوا دل کو ؟
حُسن والوں کی سادگی نہ گئی

سر سے سودا گیا محبّت کا !
دِل سے پر اُس کی بے کلی نہ گئی

اور سب کی حکایتیں کہہ دیں
بات اپنی کبھی کہی نہ گئی

ہم بھی گھر سے مُنیر تب نِکلے
بات اپنوں کی جب سُنی نہ گئی

منیر نیازی

 

[ام اریبہ]

-"* سنو !
جو مسکراتے ہیں
انہیں بھی روگ ہوتے ہیں
بہت مجبور ہوتے ہیں
راتیں جاگتی انکی، دعاؤں میں گزرتی ہیں
نگاہیں بھیگتی ہیں
اور پلکیں بھی لرزتی ہیں
نہ ماضی بھولتا ان کو نہ کوئی آس ہوتی ہے
فقط اک پیاس ہوتی ہے
جو جینے بھی نہیں دیتی
جو مرنے بھی نہیں دیتی
اذیت آگ کی صورت دلوں میں ہی سلگتی ہے
یہ شدت اور بڑھتی ہے یہ شدت اور بڑھتی ہے
سنو
جو مسکراتے ہیں
انہیں بھی روگ ہوتے ہیں.؟.؟
.

 

[معاویہ وقاص]

وہ جن کو ہم تری قربت میں بھول بیٹھے تھے
وہ لوگ تیری جدائی کے بعد یاد آئے

ہم اتنے بھی گئے گزرے نہیں تھے جانِ فراز
کہ تجھ کو ساری خدائی کے بعد یاد آئے

احمد فراز

 

[ام اریبہ]

بارش اور تیری یاد
کئی دنوں کے بعد
دونوں ایک ساتھ
اکثر تو پہلے یاد
پھر برسات ہوتی ہے
اکثر بنا برسات
تیری یاد ہوتی ہے
لیکن زہے نصیب
کہ ایسا بھی ہوا ہے
یکلخت اچانک کبھی
ایسا بھی ہوا ہے
یکلخت اچانک بڑی
تیزی سے گھر آئی
وہ آسماں پہ اور
یہ میرے دل پہ چھا گئی
ہوتی ہے شاد و ناز
ایسی بھی کرامات
دونوں ایک ساتھ
کئی دنوں کے بعد
بارش اور تیری یاد

 

[عبدالقیوم چوہدری]

آسیب زدہ گھر کا وہ دروازہ ہوں امجد۔۔۔
جسے دیمک کی طرح کھا گئی دستک کی تمنا

 

[عبدالقیوم چوہدری]

ہر تمنا دل سے رخصت ہو گئی
اب تو آجا اب تو خلوت ہو گئی

عزیز الحسن مجذوب

 

[عبد الرحمن]

وہ جو منزلوں پہ لا کر کسی ہم سفر کو لوٹیں
انہی رہزنوں میں تیرا کہیں نام آ نہ جائے

 

[عبد الرحمن]

کوشش کے باوجود بھلائے نہ جائیں گے
ہم پر جو دوستوں نے کیے ہیں کرم یہاں

 

[عبد الرحمن]

تیرے لیے میں کیا کیا صدمے سہتا ہوں
سنگینوں کے راج میں بھی سچ کہتا ہوں

 

[عبدالقیوم چوہدری]

فضا ہے دہکی ہُوئی، رقص میں ہیں شعلۂ گُل
جہاں وہ شوخ ہے اُس انجمن کی آنچ نہ پُوچھ !!

فراق گورکھپوری

 

[عبدالقیوم چوہدری]

نغمۂِ ساز سے کیا اُس کی طبیعت بہلے
دل کی آواز سُنے جس کو زمانہ ہو جائے !!

سیماب اکبرآبادی

 

[صائمہ شاہ]

یاں جہاں میں کہ شہر کوراں ہے
سات پردے ہیں چشمِ بینا پر
میر

 

[صائمہ شاہ]

شکوۂ آبلہ ابھی سے میر!
ہے پیارے ہنوز دلی دُور
میر

 

[صائمہ شاہ]

وہ سر چڑھا ہے اتنا اپنی فروتنی سے
کھویا ہمیں نے اس کو ہر لحظہ پاؤں پڑ کر

میر

 

[صائمہ شاہ]

محسن عروجِ کم نظراں سانحہ نہیں
یہ سانحہ ہے اہلِ نظر دیکھتے رہے

محسن نقوی

 

[صائمہ شاہ]

یاں جہاں میں کہ شہر کوراں ہے
سات پردے ہیں چشمِ بینا پر
میر

 

[صائمہ شاہ]

وہ اب لاکھوں دلوں‌سے کھیلتا ہے
مجھے پہچان لے اتنا بہت ہے

بشیر بدر

 

[سید فصیح احمد]

سُنا ہے دِن کو اُسے تِتلیاں ستاتی ہیں
سُنا ہے رات کو جُگنو ٹھہر کے دیکھتے ہیں

فراز

 

[ام اریبہ]

حُسن کو احتیاط لازم ہے
ہر نظر پارسا نہیں ہوتی_ _ _