آپ کے پسندیدہ اشعار!

[طارق شاہ]

پیشِ دل کچھ اور ہے ، پیشِ نظر کچھ اور ہے
ہم کھلی آنکھوں سے کیا کیا دیکھتے ہیں خواب میں

خورشید رضوی

 

[طارق شاہ]

دھیان بھی تیرا، تِری موجودگی سے کم نہ تھا
کنجِ خلوت میں بھی ہم ، جکڑے رہے آداب میں

خورشید رضوی

 

[طارق شاہ]

گھول جا دن بھر کا حاصل اِس دلِ بے تاب میں
ڈوب جا، اے ڈوبتے سورج! مرے اعصاب میں

خورشید رضوی

 

[طارق شاہ]

گاہ، قریب شاہ رگ، گاہ امید دائم و خواب
اس کی رفاقتوں میں رات، ہجر بھی تھا وصال بھی

پروین شاکر

 

[طارق شاہ]

کچھ تو ہوا بھی سرد تھی، کچھ تھا تِرا خیال بھی
دل کو خوشی کے ساتھ ساتھ ،ہوتا رہا ملال بھی

پروین شاکر

 

[طارق شاہ]

سُنا ہے، غیر کی محفِل میں تم نہ جاؤ گے
کہو تو، آج سجا لوں غریب خانے کو

قمر جلالوی

 

[طارق شاہ]

کسی نے بھی نہ اپنی دھڑکنوں میں دی جگہ جن کو
وہ سارے ولولے ، میرے دلِ ناکام تک پہنچے

قتیل شفائی

 

[طارق شاہ]

اک زخم تھا، کہ وقت کے ہاتھوں سے بھرگیا
کیا پُوچھتے ہیں آپ، کسی مہرباں کی بات

عبدالحمیدعدم

 

[طارق شاہ]

دیکھ آیا ہے آج خود بھی اُنھیں
آج، کچھ مُطمئن طبیب ہُوا

عبدالحمیدعدم

 

[طارق شاہ]

اُداسی بھی عدم! احساسِ غم کی ایک دولت ہے
بسا اوقات، ویرانے حسِیں معلوم ہوتے ہیں

عبد الحمید عدم

 

[سید فصیح احمد]

کھلا ہے جھوٹ کا بازار، آؤ سچ بولیں
نہ ہو بلا سے خریدار، آؤ سچ بولیں

سکوت چھایا ہے انسانیت کی قدروں پر
یہی ہے موقعِ اظہار، آؤ سچ بولیں

تمام شہر میں اب ایک بھی نہیں منصور
کہیں گے کیا رسن و دار، آؤ سچ بولیں

قتیل شفائی

 

[سید فصیح احمد]

لوح دل کو، غمِ الفت کو قلم کہتے ہیں
کُن ہے اندازِ رقم حُسن کے افسانے کا

فانی بدایونی

 

[سید فصیح احمد]

کچھ تو ہوا بھی سرد تھی، کچھ تھا تِرا خیال بھی
دل کو خوشی کے ساتھ ساتھ ،ہوتا رہا ملال بھی

پروین شاکر

یوں تو یہ مکمل غزل ہی شاہکار ہے مگر مُجھے مطلع بہت زیر کرتا ہے ،،
جزاک اللہ محترم !!

 

[طارق شاہ]

خلق کہتی ہے جسے، دل تِرے دیوانے کا
ایک گوشہ ہے یہ دُنیا ، اُسی ویرانے کا

فانی بدایونی

 

[طارق شاہ]

کرم کِیا، تو بہ اندازۂ تبسّمِ برق !
وہ کچھ خیال میں آئے ہی تھے کہ آ کے چلے

فانی بدایونی

 

[طارق شاہ]

قربان ایک آمدِ دل پر ہزار غم
صدقے اِس اِبتدائے قیامت مآل کے

فانی بدایونی

 

[طارق شاہ]

دل حاصلِ حیات ہے، اور دل کا ما حصل
وہ بے دلی، کہ جانِ تمنّا کہیں جسے

فانی بدایونی

 

[طارق شاہ]

نگاہوں سے چھپ کر کہاں جائیے گا
جہاں جائیے گا ، ہمیں پا ئیے گا

جگر مُراد ابدی

 

[طارق شاہ]

ہمیں بھی یہ اب دیکھنا ہے، کہ ہم پر !
کہاں تک، توجّہ نہ فرمائیے گا

جگر مُراد ابدی

 

[طارق شاہ]

ہمیں جب نہ ہونگے، تو کیا رنگِ محفل
کسے دیکھ کر آپ شرمائیے گا

جگر مُراد آبادی