آپ کے پسندیدہ اشعار!

[شیزان]

بڑے عجیب سے لہجے میں بات کرتے ہو ؟
ہیں چھوڑ جانے کی ساری نشانیاں تم میں

فاخرہ بتول

 

[طارق شاہ]

بعد مرنے کے بھی آرام نہیں ، میر مجھے !
اُس کے کوچے میں ہے پامال مِری خاک ہنوز

میر تقی میر

 

[طارق شاہ]

خُوب بد عہد تُو نہ مِل ، لیکن
میرے تیرے تھا یہ قرار افسوس
۔۔۔۔۔
دوسرا مصرعہ سمجھ نہیں آیا، براہ کرم اگر وقت ہو تو کچھ وضاحت فرمائیے

مابین یہ قرار ٹھہرا تھا، یا قرار پایا تھا،
افسوس یوں کہ پاسداری نہیں

 

[قیصرانی]

مابین یہ قرار ٹھہرا تھا، یا قرار پایا تھا

شکریہ

 

[سید فصیح احمد]

رند ! حاضر ہیں شیشہ و ساغر !
مے نہ سمجھو اگر حرام ، تو لو

رِند لکھنوی

میں صدقے آپ کے اِنتخاب پر شاہ صاحب

 

[طارق شاہ]

اے مرگ آ ، کہ میری بھی رہ جائے آبرو
رکھّا ہے اُس نے سوگ عدو کی وفات کا

نواب مصطفیٰ خان شیفتہ

 

[طارق شاہ]

دُور جاکر قریب ہو جتنے
ہم سے کب تم قریب تھے اِتنے

اب نہ آؤگے تم ، نہ جاؤگے
وصل و ہجراں بہم ہوئے کتنے

فیض احمد فیض

 

[طارق شاہ]

بُوند میں سارا سمندر ، آنکھ میں کُل کائنات
ایک مُشتِ خاک میں ، سورج کی آب وتاب دیکھ

افتخارعارف

 

[طارق شاہ]

دوستو، ترکِ محبّت کی نصیحت ہے فضول
اور نہ مانو ، تو دلِ زار کو سمجھا دیکھو

مولانا حسرت موہانی

 

[طارق شاہ]

مستیِ حُسن سے ، اپنی بھی نہیں تم کو خبر
کیا سُنو عرض میری ، حال میرا کیا دیکھو

مولانا حسرت موہانی

 

[طارق شاہ]

چارہ گر یُوں تو بہت ہیں ، مگر اے جانِ فراز
جُز تِرے ، اور کوئی ، زخم نہ جانے میرے

احمد فراز

 

[طارق شاہ]

کیونکر ہُوا ہے فاش زمانے پہ ، کیا کہیں
وہ رازِ دل جو کہہ نہ سکے رازداں سے ہم

اسرارالحق مجاز

 

[طارق شاہ]

اب گُل سے نظرمِلتی ہی نہیں ، اب دِل کی کلِی کِھلتی ہی نہیں
اے فصلِ بہاراں ! رُخصت ہو، ہم لُطفِ بہاراں بُھول گئے

اسرارالحق مجاز

 

[طارق شاہ]

سِکندر ہو ، کہ مالک سات اقلیموں کا ، آخر کو !
گیا دستِ تہی ، لے یاں سے کیا کُچھ کرگیا حاصل

میر تقی میر

 

[طارق شاہ]

عِبارت خُوب لِکھّی شاعری اِنشا طرازی کی !
ولے مطلب ہی گُم دیکھیں تو کب ہو مُدّعا حاصل

میر تقی میر

 

[طارق شاہ]

روتے بھی اُن نے دیکھ کے ہم کو کِیا نہ رحم
اِک چشمداشت رکھتے تھے مژگانِ نم سے ہم

میر تقی میر

 

[طارق شاہ]

وعدہ کرو ، تو سوچ لو مُدّت کو دل میں بھی !
یہ حال ہے ، تو دیر ، رہیں گے کہاں سے ہم

میر تقی میر

 

[طارق شاہ]

اِس طرح خُوش ہُوں کِسی کے وعدۂ فردا پہ میں
در حقیقت ، جیسے مُجھ کو اعتبار آ ہی گیا

جگرمُراد آبادی

 

[طارق شاہ]

ہائے، کافردِل کی یہ ، کافرجنُوں انگیزِیاں !
تم کو پیار آئے نہ آئے، مُجھ کو پیارآ ہی گیا

جگرمُراد آبادی

 

[طارق شاہ]

گو دِل سے تنگ ہُوں، مگر آتا ہے یہ خیال !
پھر جی کے کیا کرُوں گا دلِ مُبتلا کے بعد

جگر مُراد آبادی