کل صراحی کی تھی مٹی اب ہے پیمانے کی خاک - مبصر لکھنوی

[کاشفی]

غزل​

(مبصر لکھنوی)​

​

کل صراحی کی تھی مٹی اب ہے پیمانے کی خاک​

اپنی حد میں کروٹیں لیتی ہے میخانے کی خاک​

​

دوری منزل سے ہے واماندگی بھی شوق بھی​

بیٹھتی اُٹھتی چلی جاتی ہے دیوانے کی خاک​

​

چلتے ہی بادبہاری ہوگیا میدان صاف​

تھی مگر زندان کی دیواروں میں ویرانے کی خاک​

​

جذب کامل کی بدولت اُٹھ گیا فرق دوئی​

اب بجائے شمع، لَو دیتی ہے پروانے کی خاک​

​

دیکھ لینا وادیء وحشت سے تامیدانِ حشر​

آگے آگے ناقہ، پیچھے پیچھے دیوانے کی خاک​

​

توبہ کیا ہو، ترکِ مے ہے میری فطرت کے خلاف​

دل کا پیمانہ بنا ہے لے کے میخانے کی خاک​

​

زلزلوں سے قبر ٹوٹی، قبر سے آندھی اُٹھی​

قید ہو کر رہ نہیں سکتی تھی دیوانے کی خاک​

​

آرزو اب کس جگہ روئیں کہاں آنسو بہائیں​

ایک کردی آسماں نے اپنے بیگانے کی خاک​

 

[محمد وارث]

لاجواب۔ بہت شکریہ کاشفی صاحب شیئر کرنے کیلیے۔

 

[کاشفی]

لاجواب۔ بہت شکریہ کاشفی صاحب شیئر کرنے کیلیے۔

بیحد شکریہ محمد وارث صاحب! ۔
شکریہ ذیشان صاحب اور پپو صاحب