ساغر صدیقی یقین کر کہ یہ کہنہ نظام بدلے گا - ساغر صدیقی

[کاشفی]

غزل
(ساغر صدیقی)

یقین کر کہ یہ کہنہ نظام بدلے گا
مرا شعور مزاج عوام بدلے گا

یہ کہہ رہی ہیں فضائیں بہار ہستی کی
نیا طریق قفس اور دام بدلے گا

نفس نفس میں شرارے سے کروٹیں لیں گے
دلوں میں جذبہء محشر خرام بدلے گا

مروتوں کے جنازے اٹھائے جائیں گے
سنا ہے ذوق سلام و پیام بدلے گا

دل و نظر کو عطا ہوں گی مستیاں ساغر
یہ بزم ساقی یہ بادہ یہ جام بدلے گا​

 

[فرخ منظور]

بہت عمدہ انتخاب ہے کاشفی صاحب۔ مطلع میں شاید "یقین" کے بجائے "یقیں" ہونا چاہیے۔

 

[کاشفی]

بہت عمدہ انتخاب ہے کاشفی صاحب۔ مطلع میں شاید "یقین" کے بجائے "یقیں" ہونا چاہیے۔

شکریہ سخنور صاحب!

 

[فرخ منظور]

کاشفی صاحب اگر کتاب میں یقین ہے تو پھر یقین ہی ہو گا۔ اب غور کیا تو یقین ٹھیک لگ رہا ہے۔ معذرت چاہتا ہوں۔

 

[فاتح]

یقین کر کہ یہ کہنہ نظام بدلے گا
مرا شعورِ مزاجِ عوام بدلے گا
​

سبحان اللہ! کیا ہی عمدہ انتخاب ہے۔ بہت شکریہ کاشفی صاحب!

 

[محمد شعیب خٹک]

کس شخص کا ذکر چھیڑ دیا آپ نے ۔۔۔
ساغرصدیقی ۔۔۔
ایک ایسا شخص جس کا ٹائیلنٹ بکتا رہا۔ ساغر صدیقی کی بہت سی غزلیں لوگوں نے اس سے خرید کر اپنی طرف منصوب کر لی تھیں۔
عجیب شخص تھا۔۔۔
لوگوں نے اس کی قدر نہیں کی ۔۔۔۔
کاش وہ آج ہوتا ۔۔۔

 

[امجد میانداد]

واہ