شفیق خلش :::::: کب زیست منحرف تھی یوُں اپنے مدار سے:::::Shafiq Khalish

طارق شاہ

محفلین

Shafiq_Khalish-_Small.jpg

غزل
کب زیست منحرف تھی یوُں اپنے مدار سے
وابستہ اِک اُمید نہ جانِ بہار سے

بھاگ آئے دُور دیس ہم اپنے دِیار سے
باقی نہ کچھ کسی پہ رہے اعتبار سے

مطلق ہماری ذات پہ راغب ہی جو نہ ہوں!
کیوں مانگتے ہیں ہم اُنھیں پروردگار سے

خواہش ہماری کوئی بھی پُوری نہیں ہُوئی
یہ تک کہ کاش مر بھی چُکیں ایک بار سے

فرماں روائی غم میں بھی کب کم تھی مرحمت
دَردَوں کا کیا گِلہ ہو دِلِ تاجدار سے

مجھ پر مفارقت سے خزاں مستقل ہُوئی
بہلے گا خاک دِل مرا باغ و بہار سے

حیراں ہُوں اپنے دِل پہ، کہ مُدّت ہُوئی مگر
عاجز ہُوا ذرا نہ ترے اِنتظار سے

یاد آئے آج ہار کے بیٹھے پہ وہ خلشؔ
جن کو بدل دِیا تھا غمِ روز گار سے

شفیق خلشؔ

 
Top