میں کچھ دنوں میں------ادریس بابر

[آصف شفیع]

ادریس بابر کی ایک غزل:
میں کچھ دنوں میں اسے چھوڑ جانے والا تھا
جہاز غرق ہوا ، جو خزانے والا تھا

گلوں سے بوئے شکست اٹھ رہی ہے نغمہ گرو
یہیں کہیں کوئی کوزے بنانے والا تھا

عجیب حال تھا اس دشت کا، میں آیا تو
نہ خاک تھی، نہ کوئی خاک اڑانے والا تھا

تمام دوست الاؤ کے گرد جمع تھے، اور
ہر ایک اپنی کہانی سنانے والا تھا

بس ایک خواب کی دوری پہ تھا وہ شہر، جہاں
میں اپنے نام کا سکہ جمانے والا تھا

شجر کے ساتھ مجھے بھی ہلا گیا بابر
وہ سانحہ جو اسے پیش آنے والا تھا

 

[محمد وارث]

شکریہ آصف صاحب غزل شیئر کرنے کیلیئے!

 

[الف عین]

غزل تو اچھی ہے کئی اشعار پسند آئے۔ لیکن آصف۔ یہاں اردو اوپن پیڈ میں ’ؤ‘ شفٹ ڈبلیو پر ہے، آپ ’الاؤ‘ درست ٹائپ نہیں کر سکے!!