محترم سید عمران صاحب سے گفتگو

م حمزہ

محفلین
اور رہی بات فلم، مووی ، تھیڑکی، تو ہم اپنی ذات سے کتنے ہی برے اور خراب ہوں لیکن دوسروں کو تو حسن ظن رکھنا چاہیے کہ شاید یہ ایسا نہ کرتے ہوں ۔ کم از کم ہم سے پسندیدہ ٹی وی، فلم، مووی، تھیٹر کا پوچھنا کچھ نامناسب سے لگتا ہے۔۔۔
(اور کون سا آپ کے پوچھنے پر ہم بتادیں گے!!!)
:D:D:D
استاد محترم! 'سے "درست ہے یا 'سا'؟
تھیٹر
 

نور وجدان

لائبریرین
ہمیں مندرجہ ذیل سوالات اچھے لگے ہیں، اس بنا پر کہ ان کے واسطے سے کچھ کام کی اور اچھی باتیں نشر ہو جائیں، جن سے کچھ سیکھنے کو بھی مل سکتا ہے اور کوئی عمل کرنا چاہے تو ان شاء اللہ اچھے اور بہترین نتائج ملنے کی قوی امید ہے۔۔۔
باقی آپ کا پسندیدہ خوشبو، کھانا وغیرہ جیسے سوالات جو ڈائجسٹوں میں چھپتے ہیں ہمیں پسند نہیں۔۔۔
کوئی کباب کھائے یا گلاب سونگھے اس سے کسی کو غرض یا کیا فائدہ؟؟؟
بہرحال وہ سوالات یہ ہیں:

آپ نے قرآن پاک سے کیا سیکھا ؟
اب تک کن کن غیر نصابی اور فلاحی سرگرمیوں میں حصہ لے چکے ہیں؟
اردو محفل پر کیسے آنا ہوا اور اس کے آپ کی زندگی پر کیا اثرات ہی؟
وہ کون سی چیز ہے جو ہمیں زندگی میں مستقل مزاج اور بلند حوصلہ کے حامل بنانے کے لیے کافی ہے؟
آپ کیا سمجھتے ہیں کہ انسان اپنی تقدیر خود بناتا ہے یا ہونی ہو کر رہے گی؟
آپ کے خیال میں سوشل میڈیا پر انسان کا آئیڈیل رویہ کیا ہو سکتا ہے؟
عشق مجازی عشقِ حقیقی کے لیے کتنا ضروری ہے جب کہ یہ محض اتفاقیہ واقعہ ہو؟
آپ کے نزدیک بچوں کو موبائلز ٹیبز دے دینی چاہیے ،جیسے ہمارے خیبر کے حماد صافی 11 سال کی عمر میں پروفیسر ہیں.. وہ بھی تو استعمال کرتے ہوں.گے تو اس کے منفی اثرات سے کیسے بچا جائے؟
آپ کے خیال میں وقت میں برکت کیسے آتی ہے اور کون سے ایسے کام ہیں جو انسان کو کرتے رہنے کا معمول بنانا چاہئیے؟
زندگی کی کوئی انتہائی وجدانی کیفیت اور کب طاری ہوئی ؟
آپ کے خیال میں روحانی سکون کے لیے سب سے اہم چیزکیاہے؟
وہ کون سی چیز ہے جو ہمیں زندگی میں مستقل مزاج اور بلند حوصلہ کے حامل بنانے کے لیے کافی ہے؟


ہم آپ سے علم پانے کی لگن لیے بیٹھے منتظر ہی رہے، اللہ کا لاکھ لاکھ شکر ہے کہ آپ نے اس لڑی کو رونق بخشی ہے. آپ جن سوالات کو اہم سمجھ رہے ہیں انہی کے جوابات دیجیے. ہم مزید بہت بہتر سوالات بنالیں گے.سوالات تو بہت ہیں تاہم آسانی کے لیے کچھ بنیادی سوالات بھی رکھے جاتے ہیں تاکہ وہ (محفلین) اچھا محسوس کریں .. بہت شکریہ :) آپ ان کے جوابات دیجیے، مزید سوالات آجائیں گے. آپ محفل کی بہت محترم شخصیت ہے یقیناً ہر کوئی آپ کو جاننے کی جستجو رکھے ہوئے ہے
 

عثمان

محفلین
چونکہ پینل کے علاوہ اب دیگر افراد کو بھی سوال کی اجازت ہے اس لیے میں بھی ایک سوال پوچھنا چاہوں گا۔
 

عثمان

محفلین
میرا سوال یہ ہے کہ آپ اپنے ہر ایک مراسلے میں تین exclamation points (ابتدائیہ) کیوں لگاتے ہیں؟
 
آخری تدوین:

سید عمران

محفلین
اب تک کن کن غیر نصابی اور فلاحی سرگرمیوں میں حصہ لے چکے ہیں؟
اللہ کا شکر ہے کہ اپنی مخلوق کی خدمت کی سعادت کے کچھ نہ کچھ مواقع عطا فرماتے رہتے ہیں تاہم فی الوقت ایک واقعہ کا ذکر کرنا مناسب ہو گا۔۔۔
جب ؁۲۰۰۵ کو کشمیر و ملحقات میں شدید نوعیت کا زلزلہ آیا تو ہم کچھ دوست رضا کارانہ طور پر وہاں گئے تھے۔۔۔
ایک بڑی ٹیم زخمیوں کے علاج معالجہ اور خیموں کی بڑی تعداد لے کر چھوٹی سی خیمہ بستی بسانے مظفر آباد گئی۔۔۔
دوسری ٹیم ضلع باغ کے ایک مخصوص علاقہ کو فوکس کرکے وہاں پہنچی، ہم اس ٹیم کا حصہ تھے۔۔۔
یہ زندگی کا بڑا عبرت ناک اور سبق آموز سفر تھا۔۔۔
ایک عظیم تباہی کا منظر، جگہ جگہ زمیں چاٹتی عمارتوں کا ڈھیر، ان کے ملبوں تلے دبی انسانی لاشوں کی فضاؤں میں بو، اپنے عزیزوں سے جدا رہ کر زندہ بچ جانے والوں کی سسکتی سانسیں۔۔۔
اس حالت میں ایک بڑی آبادی کے لوگوں کو سنبھالنا ، ان کے کھانے پینے ،علاج معالجے اور رہائش کا بندوبست کرنا اور ان کے جذباتی صدمے اور غم دور کرنے کی کوشش کرنا۔۔۔
غرض زندگی نے ان پہاڑوں پر بہت کچھ سکھایا۔۔۔
سب سے بڑھ کر یہ ادراک ہوا کہ سیر و سیاحت کے مزے اور زبان کی چاٹ سب پیٹ بھرے اور سکون کے لمحات کی عیاشیاں ہیں۔۔۔
ورنہ کشمیر کا حسن وہی تھا جس کے لیے لوگ لاکھوں روپے خرچ کرکے دور دراز کا سفر طے کرتے اور مشقتیں اٹھا کر یہاں پہنچتے تھے۔۔۔
مگر اُس وقت فضاؤں میں پھولوں پتوں کی خوشبو نہیں تھی، سڑتی ہوئی لاشوں کا تعفن تھا، بارش تو اسی طرح ہوتی تھی مگر مٹی کی خوشبو نہیں مہکتی تھی، پہاڑوں پر درخت تو پریوں کی مانند قطار اند قطار کھڑے تھے مگر کوئی ان کے حسن کی طرف آنکھ اٹھا کر نہیں دیکھتا تھا، اور دیکھتا بھی کیسے کہ سب کی آنکھیں دُکھ کے پانی سے تر جو تھیں!!!
 
آخری تدوین:

سید عمران

محفلین
املا یا کمپوزیشن کے کسی استاد سے کبھی پوچھیے۔ :)
اتنی پنکچویشن کا علم تو ہمیں بھی ہے۔۔۔
لیکن یہاں املا کا امتحان دینے کی نیت نہیں ہوتی ۔۔۔
کبھی کسی ماحول میں انسان کو بے ضرر سی مرضی کرنے کی آزادی مل جائے تو اس کو اچھا لگتا ہے!!!
 

عثمان

محفلین
اتنی پنکچویشن کا علم تو ہمیں بھی ہے۔۔۔
لیکن یہاں املا کا امتحان دینے کی نیت نہیں ہوتی ۔۔۔
کبھی کسی ماحول میں انسان کو بے ضرر سی مرضی کرنے کی آزادی مل جائے تو اس کو اچھا لگتا ہے!!!
یہ آپ کے انٹرویو کا دھاگہ ہے اس لئے اس کی وضاحت پھر کبھی۔
 

سید عمران

محفلین
آپ کے گھر پر اردو ادب میں دلچسپی کس کس کو ہے؟
پہلے تو ہم سمجھتے تھے کہ ہم ہی ہم ہیں۔۔۔
کیوں کہ بچپن سے ہی ہر وقت کتاب آنکھوں کے سامنے رہتی تھی۔۔۔
چھوٹی چھوٹی کہانیوں کی کتابیں، پھر نسبتاً بڑے سائز کے رسالے۔۔۔
اس وقت بچوں کے ماہانہ جتنے رسالے چھپتے تھے تقریباً سب ہمارے گھر آتے تھے۔۔۔
پھر طلسم ہوشربا پڑھی تو بار بار پڑھتے، آج بھی اس کی فینٹسی کا مزہ دل میں ہے۔۔۔
لیکن جب میڑک کیا تو والد صاحب نے بانگ درا لاکر دی اور کہا کہ کچھ شاعری بھی پڑھو،
دیکھو اقبال نے کتنے اچھے انداز میں فطرت کا حسن بیان کیا ہے۔۔۔
پھر جوش بھرے انداز سے یہ اشعار پڑھے۔۔۔

اے ہمالہ اے فصیلِ کشورِ ہندوستاں
چومتا ہے تیری پیشانی کو جھک کر آسماں
تجھ میں کچھ پیدا نہیں دیرینہ روزی کے نشاں
تو جواں ہے گردشِ شام و سحر کے درمیاں
اور۔۔۔
آتی ہے ندی فرازِ کوہ سے گاتی ہوئی
کوثر و تسنیم کی موجوں کو شرماتی ہوئی
آئینہ سا شاہدِ قدرت کو دِکھلاتی ہوئی
سنگِ رہ سے گاہ بچتی گاہ ٹکراتی ہوئی
اشعار میں اور پڑھنے کے انداز میں اتنا ردھم اور ترنم محسوس ہوا کہ ایک ہی دفعہ میں سن کر یاد ہوگئے، پھر نہ جانے کتنا عرصے انہیں دہراتے رہے۔۔۔
یہ زندگی میں شاعری کا پہلا سبق تھا۔۔۔
بعد میں معلوم ہوا کہ والد صاحب خود بہت اچھے شاعر ہیں، بلکہ نوآموز لوگوں کو صلاح بھی دیتے ہیں۔ان کی نثر میں بھی بہت سلاست اور روانی تھی۔آج بھی ان کے خطوط محفوظ ہیں، جب پڑھو لطف آتا ہے، الفاظ پر اتنی گرفت اور تحریر اتنی اچھی گویا کاغذ پر جابجا نگینے ٹنکے ہوئے ہیں۔۔۔
لطف کی بات یہ کہ تحریر تصحیح کے قلم کی کاٹ چھانٹ سے محفوظ ہوتی تھی، یعنی لکھ کر کبھی نہیں کاٹا کہ غلط لفظ یا غلط بات لکھ دی ہے۔ یہی بات ہم نے حکیم سعید صاحب کی تحریر میں دیکھی، جب ہمدرد لائبریری میں ان کے ہاتھ کی لکھی ہوئی تحریریں دیکھیں کہ روانی کے ساتھ صفحات کے صفحات لکھے ہوئے ہیں مگر کہیں کاٹ پیٹ کا نشان نہیں، رواں اور صاف ستھری تحریر۔۔۔
گو والد صاحب کی خواہش کے باوجود شعر و شاعری کی طرف طبیعت زیادہ مائل نہ ہوسکی لیکن اتنا ہوا کہ بے زار بھی نہ ہوئی۔۔۔
کوئی اچھےاشعار کہے تو مطلع سے جو نظر پھسلتی ہے تو مقطع پر جاکر ہی سانس لیتی ہے۔۔۔
آج بھی کچھ اشعار ایک دفعہ ہی سن کر یاد ہوجاتے لیکن اس کے ساتھ ہی یہ خامی بھی ہےکہ بعض اشعار جن کا مضمون اچھا ہوتا ہے باوجود محنت اور کوشش کے یاد نہیں ہوتے۔۔۔
یہ تو حال رہا شاعری کا۔۔۔
اب کرتے ہیں بات نثر کی۔۔۔
ہمارے ایک قریبی کزن عمر میں ہم سے بہت بڑے تھے، ان کی کتابوں کی ایک شیلف تھی، ابھی ہمارا بچپن تھا، جب ہم ان کے گھر جاتے اور شیلف سے نظر آتی کتابوں پر للچائی نظر رکھتے تو عین اسی وقت وہ ہم پر عقابی نظر رکھتے کہ بچے ہماری کتابیں برباد نہ کردیں۔۔۔
ایک مرتبہ ان کے گھر گئے تو وہ موجود نہیں تھے، معلوم ہوا کہ بہت دیر سے آئیں گے، واہ کیا شاندار موقع تھا، جلدی سے شیلف میں سے ایک کتاب نکالی، جس کی رنگین جلد کے باعث ہمیشہ سے اس پر نظر تھی۔ ’’دجلہ‘‘ از شفیق الرحمٰن۔ بس جلدی سے ایک کونہ پکڑا اور جو پڑھنا شروع کیاتو لفظ لفظ اپنے سحر میں جکڑتا گیا۔ آج تک اس سحر سے نہ نکل سکے۔۔۔
گو اس کے بعد بہت سے ادیبوں کو پڑھا جو اچھے بھی لگے مگر شفیق الرحمٰن کے طلسم ہوشربا کا طلسم کوئی نہ توڑ سکا!!!
 
آخری تدوین:

سید عمران

محفلین
والد محترم کا تعارف اور کلام پوسٹ کرنا آپ پر قرض رہا۔ :)
ان کا بہت سا کلام تو نجانے کہاں گم ہوگیا۔۔۔
البتہ انہوں نے کچھ کاغذات کمپیوٹر سے پرنٹ کروائے تھے، جو کافی عرصے تک ہم نے سنبھال کر رکھے، اب ڈھونڈنا پڑے گا کہ کہاں ہیں۔ جب مل گئے تو ان شاء اللہ آپ کی خدمت میں پیش کردئیے جائیں گے!!!
 
کبھی کسی ماحول میں انسان کو بے ضرر سی مرضی کرنے کی آزادی مل جائے تو اس کو اچھا لگتا ہے!!!
آپ کی اس رائے پر دل بہت خوش ہوا ،
ہمارا آپ سے یہ سوال ہے کہ جب آپ ایسی زبردست سوچ رکھتے ہیں تو ہم پر اتنی سخت گرفت کیوں فرماتے ہیں ، کیا اس سے ہماری آزادی اور مرضی ختم نہیں ہو رہی ؟:p:D:LOL:
 

سید عمران

محفلین
آپ کی اس رائے پر دل بہت خوش ہوا ،
ہمارا آپ سے یہ سوال ہے کہ جب آپ ایسی زبردست سوچ رکھتے ہیں تو ہم پر اتنی سخت گرفت کیوں فرماتے ہیں ، کیا اس سے ہماری آزادی اور مرضی ختم نہیں ہو رہی ؟:p:D:LOL:
کیا آپ نے یہ محسوس نہیں کیا کہ سب ہنس بول لیتے ہیں۔۔۔
ہم بھی آج تک آپ کے رویے سے یہی سمجھتے ہے کہ آپ بھی لطف لے رہے ہیں جبھی دانستہ غلطیاں کرتے رہتے ہیں۔۔۔
تاہم اگر آپ کے احساسات ایسے نہیں ہیں تو ہماری کیا مجال کہ آپ کی کسی بات کو پکڑیں!!!
 
کیا آپ نے یہ محسوس نہیں کیا کہ سب ہنس بول لیتے ہیں۔۔۔
ہم بھی آج تک آپ کے رویے سے یہی سمجھتے ہے کہ آپ بھی لطف لے رہے ہیں جبھی دانستہ غلطیاں کرتے رہتے ہیں۔۔۔
تاہم اگر آپ کے احساسات ایسے نہیں ہیں تو ہماری کیا مجال کہ آپ کی کسی بات کو پکڑیں!!!
بھیا آپ تو سنجیدہ ہو گئے ہم نے تو آپ کی حس مزاح کو پیش نظر رکھتے ہوئے آپ پر سوال داغا تھا ، آپ کی محبت ہمارے لیے قیمتی سرمایہ ہے خدارا ا سے کم یا ختم مت کیجیےگا اگر ایسا ہوا تو شاید ہم اس گلی کا رستہ بھلا بیٹھیں ۔
 
آخری تدوین:

م حمزہ

محفلین
بھیا آپ تو سنجیدہ ہو گئے ہم نے تو آپ کی حس مزاح کو پیش نظر رکھتے ہوئے آپ پر سوال داغا تھا ، آپ کی محبت ہمارے لیے قیمتی سرمایہ ہے خدارا اس سے کم یا ختم مت کیجیےگا اگر ایسا ہوا تو شاید ہم اس گلی کا رستہ بھولا بیٹھیں ۔
خود سےتصحیح کریں
 

سید عمران

محفلین
بھیا آپ تو سنجیدہ ہو گئے ہم نے تو آپ کی حس مزاح کو پیش نظر رکھتے ہوئے آپ پر سوال داغا تھا ، آپ کی محبت ہمارے لیے قیمتی سرمایہ ہے خدارا اس سے کم یا ختم مت کیجیےگا اگر ایسا ہوا تو شاید ہم اس گلی کا رستہ بھولا بیٹھیں ۔
دیکھا یہ ہوتا ہے آزادی اور چھوٹ دینے کا نتیجہ۔۔۔
نہیں بھئی ہم تو غلطیاں ہی پکڑیں گے!!!
 
Top