لفظِ ”اردو“ پر مشتمل اشعار پیش کریں(کسی بھی زبان کے)

[سیما علی]

اردو کے چند لفظ ہیں جب سے زبان پرُ
تہذیب مہرباں ہے مرے خاندان پر۔۔

اشوک ساحل

 

[سیما علی]

جو دل باندھے وہ جادو جانتا ہے
مرا محبوب اردو جانتا ہے!!!!!!!


انیس دہلوی

 

[سیما علی]

ہاں مجھے اردو ہے پنجابی سے بھی بڑھ کر عزیز
شکر ہے انورؔ مری سوچیں علاقائی نہیں!!!!!!!

انور مسعود

 

[سیما علی]

شہد و شکر سے شیریں اردو زباں ہماری۔۔
ہوتی ہے جس کے بولے میٹھی زباں ہماری

الطاف حسین حالی

 

[سیما علی]

خدا رکھے زباں ہم نے سنی ہے میرؔ و مرزاؔ کی!!!!!
کہیں کس منہ سے ہم اے مصحفیؔ اردو ہماری ہے

مصحفی غلام ہمدانی

 

[سیما علی]

ادب بخشا ہے ایسا ربط الفاظ مناسب نے
دو زانو ہے مری طبع رسا ترکیب اردو سے۔۔

منشی خیراتی لال شگفتہ

 

[عطاء اللہ جیلانی]

تیرے شیریں سخن کا شہر ہے
تجھ سے اردو زبان لینی ہے

تیری نہ نہ نہیں چلے گی پھر
جب بھی آسی نے ٹھان لینی ہے
(قمر آسی)

 

[جاسمن]

زبانیں کاٹ کر رکھ دی گئیں نفرت کے خنجر سے
یہاں کانوں میں اب الفاظ کا رس کون گھولے گا؟

ہمارے عہد کے لوگوں کو انگلش سے محبت ہے
ہمیں غم ہے مستقبل میں اردو کون بولے گا؟

 

[جاسمن]

ہائے وہ اک شخص کہ جس کی خوبیٔ گفتار سے
عشق اردو سے ہوا اور شاعری اچھی لگی

 

[جاسمن]

وہ عطر دان سا لہجہ مرے بزرگوں کا
رچی بسی ہوئی اردو زبان کی خوشبو

بشیر بدر

 

[جاسمن]

وہ کرے بات تو ہر لفظ سے خوشبو آئے
ایسی بولی وہی بولے جسے اردو آئے

احمد وصی

 

[سیما علی]

اہلِ ادب غنیمت جانیں قمرؔ کی ہستی
اک شمع جل رہی ہے اردو کی انجمن کی

( اُستاد قمر جلالوی)

 

[سیما علی]

خدا رکھے زباں ہم نے سنی ہے میر و مرزا کی
کہیں کس منہ سے ہم اے مصحفی اردو ہماری ہے

(غلام ہمدانی مصحفی)

 

[سیما علی]

غفلت تو ذرا قوم کی دیکھو کاظم
وہ سوتی ہے بجھتا ہے چراغِ اردو

( کاظم بنارسی )

 

[سیما علی]

مٹ جائیں گے مگر ہم مٹنے نہ دیں گے اس کو
ہے جا ن و دل سے پیاری ہم کو زباں ہماری

(اختر شیرانی)

 

[سیما علی]

افسر کو آج تک یہ خبر ہی نہیں ہوئی
اُردو جو بولتا ہے سو ہے وہ بھی آدمی

(انور مسعود)

 

[سیما علی]

سب میرے چاہنے والے ہیں، میرا کوئی نہیں
میں بھی اِس ملک میں اُردُو کی طرح رہتا ہوں

( حسن کاظمی )

 

[سیما علی]

کس قدر نرم سی نازک سی ہے اردو کی طرح
صرف محسوس کیا کر اسے خوشبو کی طرح

( منصور آفاق )

 

[سیما علی]

کہہ دو کہ نہ شکوہ لب مغموم سے نکلے
اُردو کا جنازہ ہے ذرا دھوم سے نکلے

( رئیس امروہی )

 

[سیما علی]

ناز و انداز میں شائستہ سا وہ حسنِ نفیس
ہُو بہُو جانِ غزل ہے مری اردو کی طرح

( عطا تراب )