خالد احمد غزل ۔۔۔۔۔۔۔۔۔۔۔۔۔۔۔۔ وہ چرچا جی کے جھنجھٹ کا ہوا ہے

نوید صادق

محفلین
غزل
وہ چرچا جی کے جھنجھٹ کا ہوا ہے
کہ دل کا پاسباں کھٹکا ہوا ہے

وہ مصرع تھا کہ اِک گل رنگ چہرہ
ابھی تک ذہن میں اٹکا ہوا ہے

ہم اُن آنکھوں کے زخمائے ہوئے ہیں
یہ ہاتھ ، اُس ہاتھ کا جھٹکا ہوا ہے

یقینی ہے اَب اِس دل کی تباہی
یہ قریہ ، راہ سے بھٹکا ہوا ہے

گلوں کے قہقہے ہیں، چہچہے ہیں
چمن میں اِک چمن چٹکا ہوا ہے

گلہ اُس کا کریں کس دل سے، خالد!
یہ دل کب ایک چوکھٹ کا ہوا ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

دیے کا دَم کہیں اٹکا ہوا ہے
سو، مشکل، بھیڑنا پٹ کا ہوا ہے

بس اِک اُمّید پر ہم جی رہے ہیں
کہ وہ گھٹوال، تلچھٹ کا ہوا ہے

ہماری وحشتوں کے ساتھ شہرہ
کسی کی خیرہ سر لَٹ کا ہوا ہے

نہ کیوں دُھومیں ہوں یک سطحی سخن کی
زمانہ ایک کروٹ کا ہوا ہے

ابھی دل ہجر سے ہارا نہیں ہے
اِک آنسو حلق میں اَٹکا ہوا ہے

سخن تحلیل ہوتے جا رہے ہیں
سخن وَر، بھوت، مرگھٹ کا ہوا ہے

پرندے کس تھکن میں اُڑ رہے ہیں
مسافر ، منزلوں بھٹکا ہوا ہے

کٹورے ہیں کہ چھلکے آ رہے ہیں
کہ رستہ بند، پن گھٹ کا ہوا ہے

ابھی تک ایک مٹیالا اُجالا
صلیبِ حرف پر لٹکا ہوا ہے

گنا جاتا ہے اُن کے صادقوں میں
یہ رُتبہ، ایک نٹ کھٹ کا ہوا ہے

یہ بستی ہے غزالانِ ختن کی
کوئی بھڑکا، کوئی بھٹکا ہوا ہے

دلِ رُسوا میں در آئے نہ خالدؔ
یہ آہو ، سائے سے کھٹکا ہوا ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

خالد احمد
 

نوید صادق

محفلین
اعجاز بھائی۔
خالد احمد صاحب کی کتاب "نم گرفتہ" کی غزل کا انتخاب میں نے اور احمد فاروق نے کیا ہے۔ اور یہ بیاض میں شائع بھی ہو چکا ہے۔انشا اللہ آپ کوای میل کر دوں گا۔مزید یہ کہ آپ نے جو خالد صاحب کی کچھ غزلیں جمع کر کے لائبریری میں اپ لوڈ کر رکھی ہیں۔وہ میں نے خالد صاحب کو دکھائی تھیں بہت خوش ہوئے اور وہ فائل انھوں نے ہو بہ ہو بیاض میں شائع کی تھی۔
 

محمداحمد

لائبریرین
وہ مصرع تھا کہ اِک گل رنگ چہرہ
ابھی تک ذہن میں اٹکا ہوا ہے

ہم اُن آنکھوں کے زخمائے ہوئے ہیں
یہ ہاتھ ، اُس ہاتھ کا جھٹکا ہوا ہے

گلوں کے قہقہے ہیں، چہچہے ہیں
چمن میں اِک چمن چٹکا ہوا ہے

ابھی دل ہجر سے ہارا نہیں ہے
اِک آنسو حلق میں اَٹکا ہوا ہے

پرندے کس تھکن میں اُڑ رہے ہیں
مسافر ، منزلوں بھٹکا ہوا ہے

لاجواب!

عمدہ اشعار!
 
Top