غزل: آج یہ کون مرے شہر کا رستہ بھولا

[Qamar Shahzad]

آج یہ کون مرے شہر کا رستہ بھُولا
دیکھ کر جس کو مرا قلب دھڑکنا بھُولا

میں ہی مبہوت نہیں حسنِ فسوں گر کی قسم
جس نے دیکھا اسے پلکوں کو جھپکنا بھُولا

بھولتا کیسے مرا دل مری جاں کا مالک
کون حاکم ہے کہ جو اپنی رعایا بھُولا

بھولپن میں کیا اظہارِ محبت اس نے
کتنا بھولا ہے، مرا بزم میں ہونا بھُولا

چاند بھی دے گا شہادت کہ درونِ فرقت
میں کسی شب نہ ترا چاند سا چہرہ بھُولا

بھول جاتا ہے حقیقت میں وہی روزِ وصال
جو نہیں خواب میں اک روز بھی آنا بھُولا

بعد چسکی کے ترے ہاتھ کو چوما یوں ہے
خیر سے چائے میں تُو آج ہے میٹھا بھُولا

یاد رہتی نہیں باتیں مجھے کل کی لیکن
آج تک مجھ کو نہیں اس کا سراپا بھُولا

غیر ہی دیکھا کیے اس کو درونِ محفل
وہ سجا جس کے لیے اس کو دکھانا بھُولا
قمر آسی​