سُنی سنائی سی تھیں بےوفائیاں کیا کیا - ظہیر قدسی، مالیگاؤں

[کاشفی]

غزل​

(ظہیر قدسی، مالیگاؤں - ہندوستان)​

​

سُنی سنائی سی تھیں بےوفائیاں کیا کیا​

بنائیں لوگوں نے لیکن کہانیاں کیا کیا​

​

اسے تو کارِجہاں سے نہیں ملی فرصت​

ہوئی ہیں دل کو مگر بدگمانیاں کیا کیا​

​

اُداسی، درد و غم و رنج، ہجر تنہائی​

ملی ہیں پیار کی ہم کو نشانیاں کیا کیا​

​

بکھیرے گیسو کبھی، کھنچ لے کبھی آنچل​

کرے ہے بادِ صبا چھیڑخانیاں کیا کیا​

​

یہ آئینہ نہیں، احباب ہی بتائیں گے​

ہیں اپنے قول و عمل میں خرابیاں کیا کیا​

​

مجھے کتابوں میں، یا پھر دلوں میں زندہ رکھ​

غبارِ راہ ہوئیں ورنہ ہستیاں کیا کیا​

​

ذرا سا رنگِ سخن کیا ظہیر کا بدلا​

چلائی لوگوں نے لفظوں کی برچھیاں کیا کیا​

 

[صائمہ شاہ]

بہت خوب
اسے تو کارِجہاں سے نہیں ملی فرصت
ہوئی ہیں دل کو مگر بدگمانیاں کیا کیا