نصیر الدین نصیر بہت کچھ ہم نے دیکھا دیکھنے کو--- سید نصیر الدین نصیر

الف نظامی

لائبریرین
بہت کچھ ہم نے دیکھا دیکھنے کو
رہا دنیا میں اب کیا دیکھنے کو

میں خود اک قدِ آدم آئنہ ہوں
ترا اپنا سراپا دیکھنے کو

کہاں ساحل پہ موجوں کا تبسم
اُنہیں آتا ہے دریا دیکھنے کو

نکل آئے فلک پر چاند سُورج
ترا نقشِ کفِ پا دیکھنے کو

دمِ آخر کروں گا راز اِفشا
مجھے آپ آئیں تنہا دیکھنے کو

تجھے دیکھے نہ کیوں سارا زمانہ
کہاں ملتا ہے تجھ سا دیکھنے کو

مجھے اٹھ اٹھ کے سب محفل نے دیکھا
وہی ظالم نہ اٹھا دیکھنے کو

حریمِ ناز سے باہر وہ آئیں
کھڑی ہے ایک دنیا دیکھنے کو

ترا ثانی سنا ہم نے ، نہ دیکھا
زمانہ ہم نے دیکھا ، دیکھنے کو

بس اس کے بعد تو راہِ عدم ہے
یہی باقی ہے رَستا دیکھنے کو

اِدھر دَم دے دیا بیمارِ غم نے
اُدھر آیا مسیحا دیکھنے کو

نصیر! اُن کی گلی میں کیوں گئے تھے
یہی ، اپنا تماشا دیکھنے کو؟

از سید نصیر الدین نصیر
 

چھوٹاغالبؔ

لائبریرین
ھاھاھاھاھاھاھا واہ صاحب کیا کہنے
نصیر! اُن کی گلی میں کیوں گئے تھے
یہی ، اپنا تماشا دیکھنے کو؟

تھی خبر گرم کہ غالبؔ کے اڑیں گے پرزے
دیکھنے ہم بھی گئےتھے ، پہ تماشا نہ ہوا
 
Top