باقیاتِ راز از سرور عالم راز سرور

[الف عین]

O
جب حسنِ نظر سے ساز ہو جائے گا
آئینۂ حق، مجاز ہو جائے گا
اُٹھ جائے گا پردۂ دوئی آنکھوں سے
حاصل اس سے نیاز ہو جائے گا

 

[الف عین]

O
تدبیر وفا شعار ہو جاتی ہے
تقدیر سے ہم کنار ہو جاتی ہے
آتا ہے جو وقتِ کامیابی اے راز
فطرت بھی شریکِ کار ہو جاتی ہے

 

[الف عین]

O
واعظ شیریں مقال ہو جاتا ہے
زاہد بھی خوش خیال ہو جاتا ہے
پڑتی ہے نگاہِ مستِ ساقی جس پر
وہ صاحبِ حال و قال ہو جاتا ہے

 

[الف عین]

O
بگڑی ہوئی اپنی خود بنانا اچّھا
احساں ہے کسی کا کب اُٹھانا اچّھا
احسان سے جو ملے حیاتِ جاوید
اس زیست سے موت کا ہے آنا اچّھا

 

[الف عین]

O
بیدادِ فلک کی داد دیتا ہوں میں
ہمّت کے سبق ہزار لیتا ہوں میں
منّت کیشِ ناخدا نہیں ہوں اے راز
اپنی کشتی کو آپ کھیتا ہوں میں

 

[الف عین]

O
تکلیفِ سفر میں ایک راحت بھی ہے
دوزخ میں سوادِ صبحِ جنّت بھی ہے
میں وادئ غربت میں نہیں ہوں تنہا
فطرت بھی ساتھ، حسنِ فطرت بھی ہے

 

[الف عین]

O
دنیا یہ سمجھتی ہے کہ مغرور ہوں میں
میخانۂ ہستی سے بہت دور ہوں میں
اب کون بتائے راز اس کافر کو
صہبائے خدا ساز سے مخمور ہوں میں

 

[الف عین]

O
دعوائے سخنوری نہیں ہے مجھ کو
بیمارئ خود سری نہیں ہے مجھ کو
کہتا ہوں غزل بمقتضائے فطرت
سودائے پیمبری نہیں ہے مجھ کو

 

[الف عین]

O
آزادِ قیودِ بزمِ ہستی ہوں میں
پابندِ اصولِ حق پرستی ہوں میں
ظاہر میں شکستہ حال ودل ہوں ، لیکن
جو رشکِ عروج ہے وہ پستی ہوں میں

 

[الف عین]

O
تردیدِ خیالِ خام و بیجا کر دے
تصدیقِ اصولِ دین و دنیا کر دے
آخر اے راز یہ خموشی کب تک
اسرارِ جہاں کو آشکارا کر دے

 

[الف عین]

O
مشرق کی بھلائی کو بُرا کہتا ہے
مغرب کی بُرائی کو بھلا کہتا ہے
کج بیں تو نہیں تیری نگاہِ حق بین
بندے کو تو اے راز خدا کہتا ہے

 

[الف عین]

O
بیکار ہر اک قیاس ہو جائے گا
مجروح ہر التباس ہو جائے گا
اٹھے گا نظر سے جب حجابِ باطل
اے راز تو حق شناس ہو جائے گا

 

[الف عین]

راز و نیاز

O
رودادِ بہارِ زندگانی کہئے....!
افسانۂ عہدِ کامرانی کہئے
کس طرح کٹے گی رات ورنہ اے راز
بہتر ہے یہی، کوئی کہانی کہئے

 

[الف عین]

O
میں اور جامِ عام، تیرے قرباں
کیا اس سے بنے گا کام، تیرے قرباں
صد شکرِ کرم، تیرے کرم کے صدقے
وہ خاص، وہ لالہ فام تیرے قرباں

 

[الف عین]

O
اک جرعہ بنامِ مہر و رافت دے دے
اک جام بحقِ حسنِ خدمت دے دے
یہ بھی نہ سہی، تو پھر خدارا ساقی
اک ساغرِ بادۂ محبت دے دے

 

[الف عین]

O
میخانے کو وقفِ اہلِ دوراں کر دے
سامانِ حیات کو فراواں کر دے
امروز کی فکر اب ہے واجب ساقی
دیروز کو نذرِ طاقِ نسیاں کر دے

 

[الف عین]

O
دیوانۂ حسنِ یار کر دے مجھ کو
بیگانۂ روزگار کر دے مجھ کو
بیکار ہے بحثِ کفر و ایماں ساقی
مخمورِ مئے بہار کر دے مجھ کو

 

[الف عین]

O
اب دُور ہر اختلاف کر دے ساقی
رندوں کی خطا معاف کر دے ساقی
اُٹھ اور گلے لگا کے سب کو للّٰہ
سینہ کینے سے صاف کر دے ساقی

 

[الف عین]

O
کچھ حد سے بڑھی ہوئی غم اندوزی ہے
واللہ یہی تو وقتِ دل سوزی ہے
اُٹھ اور دکھا جمالِ مہرِ راحت
لا اور پلا کہ صبحِ نوروزی ہے

 

[الف عین]

O
وَا عقدۂ بود و ہست کر دے ساقی
دنیا کو خدا پرست کر دے ساقی
صوفی، میکش، فقیر، مومن، کافر
سب کو، ہاں سب کو مست کر دے ساقی