باقیاتِ راز از سرور عالم راز سرور

[الف عین]

O
اک بات تھی بے نقاب کر دی تو نے
برباد سب آب و تاب کر دی تو نے
افسوس! کہ اس میں رنگِ غربت بھر کر
تصویرِ جہاں خراب کر دی تو نے

 

[الف عین]

O
تدبیر کی زور آزمائی دیکھی
تاثیرِ دُعا کی خودنمائی دیکھی
تقدیرِ رسا کی نارسائی توبہ !
دیکھی، دیکھی، تری خدائی دیکھی

 

[الف عین]

O
یہ بزم، یہ سوز و ساز کیا کہنا ہے
یہ دَورِ نیاز و ناز کیا کہنا ہے
جس بزم کی رونق ہوں حریفانِ ازل
اُس بزمِ سخن کا اے راز کیا کہنا ہے

 

[الف عین]

O
ہر نقش کو بے نقاب کر دیتا ہے
مستور کو بے حجاب کر دیتا ہے
کیا چیز ہے مہرِ ارتباط و اخلاص
جو ذرّہ کو آفتاب کر دیتا ہے

 

[الف عین]

O
ساقی! یہ سکوت، یہ خموشی کب تک
یہ طرزِ کرم، یہ ناز کوشی کب تک
آخر کوئی حدِ بے نیازی بھی ہے
پیاسی رہے روحِ حق نیوشی کب تک

 

[الف عین]

مشاہدات

O
دلدارئ دوست کا فسانہ کہئے
یا قصّۂ شوخئ زمانہ کہئے
جو کچھ کہئے اس انجمن میں اے راز
با طرزِ لطیف و شاعرانہ کہئے

 

[الف عین]

O
ساقی سے اگر سلام ہو جاتا ہے
نظارۂ حسنِ عام ہو جاتا ہے
وہ عالمِ کیف و نور، اللہ اللہ
آئینہ ہر ایک جام ہو جاتا ہے

 

[الف عین]

O
مخمورِ مئے بہار ہو جاتا ہوں
خوش وقت و کامگار ہو جاتا ہوں
واللہ، بیک نگاہِ مستِ ساقی سے
فطرت سے ہمکنار ہو جاتا ہوں

 

[الف عین]

O
جب عشق سے ساز باز ہو جاتا ہے
انساں دنیائے راز ہو جاتا ہے
بیگانۂ فکرِ دین و دنیا ہو کر
دلدادۂ سوز و ساز ہو جاتا ہے

 

[الف عین]

O
جب عشق سخن طراز ہو جاتا ہے
وَا، بابِ نیاز و ناز ہو جاتا ہے
آخر ہوتی ہے ختم بحثِ من و تو
محمود نما ایاز ہو جاتا ہے

 

[الف عین]

O
جب راہِ طلب میں راز کھو جاتا ہوں
منزل سے بہت قریب ہو جاتا ہوں
تھک جاتے ہیں پاؤں جبکہ چلتے چلتے
تو یاد میں رہنما کی سو جاتا ہوں

 

[الف عین]

O
جب سارا جہانِ راز سو جاتا ہے
اک عالمِ بیخودی میں کھو جاتا ہے
ہوتا ہے نیاز اس سے حاصل مجھ کو
بیدار مرا نصیب ہو جاتا ہے

 

[الف عین]

O
کچھ حسن کی تنویر نظر آتی ہے
کچھ عشق کی تاثیر نظر آتی ہے
دنیا ہے کہ بتخانۂ آذر اے راز
جو چیز ہے تصویر نظر آتی ہے

 

[الف عین]

O
بلبل کی نوا میں خود ستائی دیکھی
طوطی کی صدا میں ژاژ خائی دیکھی
ہم مشرب و ہم نوا ہیں دونوں، لیکن
ہر اک کی الگ الگ خدائی دیکھی

 

[الف عین]

O
گل ہائے نظر نواز خنداں دیکھے
فطرت کے ہزار راز عریاں دیکھے
فردوسِ جہاں کی ہر روش پر میں نے
محمود نما ایاز حیراں دیکھے

 

[الف عین]

O
اربابِ جہاں کی مے پرستی دیکھی
وہ کیفِ نظر، وہ شانِ مستی دیکھی
خود کام و خدا فروش پایا سب کو
دیکھی، اے راز بزمِ ہستی دیکھی

 

[الف عین]

O
ہر رند کے غمگسار ہو جاتے ہیں
بے وجہ گناہ گار ہو جاتے ہیں
اربابِ جہاں کا ظرفِ عالی، توبہ
اک جام میں ہوشیار ہو جاتے ہیں

 

[الف عین]

داد و فریاد

O
تصدیقِ خیالِ خام ہو جائے گی
تخئیل کی روک تھام ہو جائے گی
اک جُرعۂ تلخ کی ہے حاجت اے راز
دنیا شیریں کلام ہو جائے گی

 

[الف عین]

O
یہ واعظِ خوش کلام، اللہ اللہ
شرمندۂ ذوقِ عام، اللہ اللہ
افسانہ تراش اور حق گو، توبہ!
دیں اس کو بھی جام، اللہ اللہ

 

[الف عین]

O
لاریب کہ رہنمائے دوراں تو ہے
گم کردۂ راہ کا نگہباں تو ہے
قربان اس ادّعائے خوش فہمی کے
دنیا کافر ہے بس مسلماں تو ہے