باقیاتِ راز از سرور عالم راز سرور

الف عین

لائبریرین
تمہید

O
ہر سازِ سخن ہے پردہ دارِ صد راز
ہر پردۂ ساز میں ہے تیری آواز
اے مطربِ خوش نوائے بزمِ معنی
پردہ پردہ میں تو ہے نغمہ پرداز

O
وہ جامِ مئے سخن دیا ہے تو نے
اپنا بندہ بنا لیا ہے تو نے
کیا مجھ سے ادا ہو شکرِ نعمت ساقی
احسان بہت بڑا کیا ہے تو نے
 

الف عین

لائبریرین
O
کعبہ دیکھا، شرار خانہ دیکھا
دنیا کا ہر ایک کارخانہ دیکھا
ہر ایک مکاں میں تیرے جلوے دیکھے
ہر ایک ترا نگار خانہ دیکھا
 

الف عین

لائبریرین
O
تشریقِ جمال صبحِ عشرت دیکھی
تنویرِ سوادِ شامِ راحت دیکھی
اک روز میں دو کرشمہ ہائے دلکش
اے شاہدِ کُل، تیری کرامت دیکھی
 

الف عین

لائبریرین
O
تمہیدِ نشاطِ کار دیکھی میں نے
تکمیل بھی خوشگوار دیکھی میں نے
ممنونِ کرم ہوں، باغبانِ فطرت
جی بھر کے ہر اک بہار دیکھی میں نے
 

الف عین

لائبریرین
رموز و نکات

O
یہ شام کہ جس کو جانِ راحت کہئے
ہم رنگِ سوادِ صبحِ جنّت کہئے
ساقی سرمست و انجمن ہے سرخوش
اے راز فسانۂ محبت کہئے
 

الف عین

لائبریرین
O
یہ وقتِ نماز،ِ شام، اللہ اللہ!
یہ دَورِ مہِ تمام، اللہ اللہ!
سرخوش ہے فضائے بزمِ امکاں اے راز
لے تو بھی خدا کا نام، اللہ اللہ!
 

الف عین

لائبریرین
O
تمہیدِ کتابِ زندگانی ہوں میں
تمّت بالخیرِ دہرِ فانی ہوں میں
آغاز ہے دل پذیر، دلکش انجام
افسانۂ راز کُن فیکانی ہوں میں
 

الف عین

لائبریرین
O
شمعِ تابانِ بزمِ فطرت ہوں میں
خورشیدِ سپہرِ مہر و رافت ہوں میں
افسانۂ سوز و سازِ دنیا کیا ہے
افسانۂ دہر کی حقیقت ہوں میں
 

الف عین

لائبریرین
O
مخمورِ شرابِ کامرانی تو ہے
مسحورِ طلسمِ زندگانی تو ہے
معلوم بھی ہے مگریہ تجھ کو اے راز
اک واقعہ یا کوئی کہانی تو ہے
 

الف عین

لائبریرین
O
یہ باغ، جہاں، یہ لالہ زارِ کثرت
یہ محفلِ نازِ شاہدانِ فطرت
ظاہر میں تو اک جہانِ رنگ و بو ہے
باطن میں مگر ہے بوستانِ وحدت
 

الف عین

لائبریرین
O
اے صاحبِ عقل و ہوش حیراں کیوں ہے
بے وجہ ، بلا سبب پریشاں کیوں ہے
آ راز کی بات بتاؤں میں تجھ کو
سرگشتہ مثالِ چرخِ گرداں کیوں ہے
 

الف عین

لائبریرین
O
یہ منظرِ سحرکارِ بزمِ فطرت
نظارے سے جس کے ہے جہاں کو حیرت
حسنِ قدرت کی ہے کرشمہ سازی
اتنا ہی سمجھنے کی ہے تجھ کو حاجت
 

الف عین

لائبریرین
O
وہ حسن جو بے نقاب ہو جائے گا
مہتاب ہے، آفتاب ہو جائے گا
اچّھا ہے حجابِ رُخ نہ اٹّھے، ورنہ
آنکھوں کے لئے عذاب ہو جائے گا
 

الف عین

لائبریرین
O
اب ذکرِ نشاطِ جوانی کیوں ہے
شرمندۂ فکر، زندگانی کیوں ہے
پیری میں خمارِ خواب آور کیسا
جب پی ہی نہیں تو سرگرانی کیوں ہے
 

الف عین

لائبریرین
O
دنیا پہ تو اپنا دل نہ شیدا کرنا
بے جا خواہش نہ دل میں پیدا کرنا
زنہار! اگر ہے پاسِ ایماں تجھ کو
بُت خانۂ دہر میں نہ سجدا کرنا
 

الف عین

لائبریرین
O
دنیائے دنی سے ہے محبت تجھ کو
افکار سے کس طرح ہو فرصت تجھ کو
بیکار ہے جستجوئے راحت اے راز
دوزخ میں کہاں ملے گی جنّت تجھ کو
 

الف عین

لائبریرین
O
ہنگامۂ سوز و ساز برپا کر دے
نذرِ آتش، خیالِ بے جا کر دے
دنیا میں اگر ہے جستجوئے راحت
وقفِ غمِ عشق، فکرِ دنیا کر دے
 

الف عین

لائبریرین
O
شیدائے خودی و خودپرستی کیوں ہے
پابندِ طریقِ بزمِ ہستی کیوں ہے
اُٹھ، توڑ یہ قید و بندِ لایعنی تو
انساں ہو کر اسیرِ پستی کیوں ہے
 

الف عین

لائبریرین
O
جب سرد یہ جوشِ آز ہو جائے گا
وَا، دیدۂ امتیاز ہو جائے گا
آئے گا نظر جمالِ معنی ہر سو
دنیا سے تو بے نیاز ہو جائے گا
 
Top