جگر :::: اگر شامل نہ در پردہ کسی کی آرزو ہوتی -- Jigar Muradabaadi

[طارق شاہ]

جگر مُراد آبادی

اگر شامِل نہ در پردہ کِسی کی آرزُو ہوتی !
تو پھر اے زندگی ظالم، نہ میں ہوتا نہ تُو ہوتی

اگر حائِل نہ اُس رخ پر نقابِ رنگ و بُو ہوتی
کِسے تابِ نظر رہتی، مجالِ آرزُو ہوتی

نہ اِک مرکز پہ رُک جاتی، نہ یوں بے آبرُو ہوتی !
محبّت جُستجُو تھی، جُستجُو ہی جُستجُو ہوتی

تِرا مِلنا تو مُمکِن تھا، مگر اے جانِ محبوُبی !
مِرے نزدیک توہینِ مزاجِ جُستجُو ہوتی

نگاہِ شوق اُسے بھی ڈھال لیتی اپنے سانچے میں
اگر اِک اور بھی دُنیا ورائے رنگ و بُو ہوتی

جگر مُراد آبادی
​

 

[احمد بلال]

بہت زبردست۔ کمال انتخاب ہے

 

[صائمہ شاہ]

نہ اِک مرکز پہ رُک جاتی، نہ یوں بے آبرُو ہوتی !
محبّت جُستجُو تھی، جُستجُو ہی جُستجُو ہوتی

 

[عمر سیف]

نہ اِک مرکز پہ رُک جاتی، نہ یوں بے آبرُو ہوتی !
محبّت جُستجُو تھی، جُستجُو ہی جُستجُو ہوتی

واہ ۔۔

 

[طارق شاہ]

تشکّر آپ سب کے اظہارِ خیال اور پذیرائی پر، ممنون ہوں
بہت خوش رہیں

 

[محمد خلیل الرحمٰن]

نگاہِ شوق اُسے بھی ڈھال لیتی اپنے سانچے میں
اگر اِک اور بھی دُنیا ورائے رنگ و بُو ہوتی
​

واہ صاحب واہ۔ کیا خیال آفرینی ہے۔ جگر کا پھڑکتا ہوا کلام شیئر کرنے پر شکریہ قبول فرمائیے

 

[طارق شاہ]

تشکّر خلیل بھائی اظہارِ خیال پر ۔
صائمہ شاہ صاحبہ نے اس غزل کا اک شعر، پسندیدہ اشعار
میں پیش کیا جو بہت ہی خوب لگا تو غزل تلاش کرکے پیش کردی
خوشی ہوئی جو آپ صاحبان کو غزل پسند آئی
بہت خوش رہیں

 

[توقیر عالم]

لوٹ لیا آج تو اتنی کمال سوچ اور اس پے انداز بیاں
اقبال کے بعد ھمارے دل کو چھونے والی پہلی غزل ھے

 

[فاخر رضا]

یہ عشق حقیقی ہے یا مجازی