عباس تابش انتخاب ِعباس تابش

ہمارے دل میں ہے آسیبِ آرزو ایسا
کبھی کبھی تو ہمیں خود سے خو ف آنے لگے

جہان چھوڑتے جاتے ہیں کس سہولت سے
یہ رفتگاں تو مرا حوصلہ بڑھانے لگے​

 

بادباں کب کھولتا ہوں پار کب جاتا ہوں میں
روز رستے کی طرح دریا سے لوٹ آتا ہوں میں

صبح دم میں کھولتا ہون رسی اپنے پاؤں کی
دن ڈھلے خود کو کہیں سے ہانک کر لاتا ہوں

ایک بچے کی طرح خود کو بٹھا کر سامنے
خوب خود کو کوستا ہوں خوب سمجھاتا ہوں میں

یہ وہی تنہائی ہے جس سے بہل جاتا تھا دل
یہ وہی تنہائی ہے اب جس سے گھبراتا ہوں میں​

 

خلوتِ خاص میں بلوانے سے پہلے تابش
عام لوگوں میں بہت دیر تک بٹھایا گیا میں​

 

دل میں ہوتا تو یہ ممکن تھا نکل بھی جاتا
اب تو وہ شخص بہت دور تلک ہے مجھ میں​

 

اے رنجِ بے دلی! ترے رہنے کے واسطے
دیوار و در کی شرط ہے دیوار و در کہاں

یہ جاننے کو ان کا تعاقب کروں گا میں
یہ لوگ جا رہے ہیں مجھے چھوڑ کر کہاں​

 

چاند نے جھک کر پوچھا ہو گا
شہرِ برباد ترا کیا ہو گا

دور ایسا ہے کہ لحظہ لحظہ
سوچنا پڑتا ہے اب کیا ہو گا

بوجھ وہ آن پڑا ہے دل پر
شعر کہہ کر بھی نہ ہلکا ہو گا

میں جہاں ڈوب رہا ہوں لوگو
کل یہاں ایک جزیرہ ہو گا

سب کو ہجرت کی پڑی ہے تابش
اس گھڑی کون کسی کا ہو گا

​

 

پھر کوئی لے کے آ گیا دامن کی دھجیاں
لگتا تھا مجھ پہ ہو چکا دیوانہ پن تمام​

 

محبت ایک دم دکھ کا مداوا نہیں کرتی
یہ تتلی بیٹھتی ہے زخم پر آہستہ آہستہ​

 

یہ محبت تو بہت بعد کا قصہ ہے میاں
میں نے اُس ہاتھ کو پکڑا تھا پریشانی میں​

 

اس لیے جل کے کبھی راکھ نہیں ہوتا دل
یہ کبھی آگ میں ہوتا ہے کبھی پانی میں​

 

یہ ترے خیال کے لوگ ہیں یہ بڑے کمال کے لوگ ہیں
ابھی پاؤں رکھنے کی جا نہ تھی ابھی خوابِ خوش میں سما گئے

سرِ راہ روک کے پوچھنا شرفاء کا شیوہ نہیں میاں
کبھی فرصتوں میں بتاؤں گا جو معاملے مجھے کھا گئے​

 

اپنی سی تو کر رہے ہیں ہم فنا آمادگاں
بس وہی رہ جائے گا جو اُس کی نظر میں رہ گیا​

 

انتخاب مکمل ہوا، شعر کسی کو کیوں پسند آتا ہے اور کسی دوسرے کے ہاں وہی ناپسندکیوں ٹھہرتا ہے ، اس پر بحث طول طویل ہے۔یہ موقع اس بحث کا نہیں ، بلکہ شعر سے حظ اٹھانے کا ہے۔ یہ تمام اشعار متعدد قراءتوں کے بعد نمایاں کر چکا تھا،آج اور کل رات ان کو ٹائپ کر دیا۔ تین چار غزلیں پہلے سے ٹائپ شدہ بھی مل گئیں، باقی کل اور آج میں کی گئیں، اس لیے خال خال ٹائپو کا امکان بھی ہے۔
عباس تابش کی کلیات "عشق آباد "سے یہ چیزیں مجھے اچھی لگیں، اپنے مضامین، تنوع ، امیجری،فکری سوالات ، شعری میکانیات اور نظام فکری کے حوالہ سے عباس تابش مجھے پسند ہیں۔ اس انتخاب کے لیے مہمیز برادرِ عزیز محمد احمد ہیں۔اگر منتظمین چاہیں تو ان تمام مراسلہ جات کو اکٹھا کر کےالگ سے ایک ای بک بھی بنائی جا سکتی ہے۔
والسلام

 

ضرور، اسی کے لئے میں یہاں وارد ہوا تھا کہ اس کی ای بک بنا دوں۔ اور ابھی دیکھا کہ اس دھاگے کی وجہ سے ہی عزیزی فلک شیر پانچ ہزاری منصب پر پہنچ چکے ہیں، اور کسی نے مبارکباد ہی نہیں دی!!!

 

یہ تو آپ کی محبت اور شفقت ہےمحترم اعجاز عبید صاحب ۔
شکرگزار ہوں ۔

 

بہت اچھا کام کیا ہے آپ نے۔
اور پانچ ہزاری ہونے پر بہت بہت مبارک ہو۔۔۔
خوش رہیں۔۔

 

شکرگزار ہوں

 

الف عین
محترم اعجاز عبید صاحب! کیا یہ ای بک بن چکی ہے؟
اگر بن چکی ہے، تو ربط عنایت فرمائیے۔
جزاک اللہ
فلک شیر

 

یہ ابھی ابھی پوسٹ کر دیا ہے۔

 

جزاک اللہ خیر