عباس تابش انتخاب ِعباس تابش

[فلک شیر]

عباس تابش آج کی غزل کے نمائندہ شعراء میں سے ہیں۔آج ہی محمداحمد بھائی نے ان کے ایک مصاحبہ کا ربط ارسال کیا، تو سوچا کہ سال بھر قبل جو عباس تابش کی کلیات "عشق آباد" ڈھونڈی تھی، کیونکہ مدت سے شائع نہ ہوئی تھی ،اب اس کا فائدہ اٹھاتے ہوئےتابش کے کلام میں سے پسندیدہ اشعار کو اکٹھا کیوں نہ کر دیا جائے۔ یہ اشعار مجھے کیوں پسند ہیں، بلکہ عباس تابش خود مجھے کیوں پسند ہے، اس کا جواب کسی اور مجلس کے لیے اٹھا رکھتے ہیں ، سر دست تو یہ اشعار ، نظمیں یا خال خال مکمل غزل ہی ملاحظہ فرمائیے۔
سب سے پہلے حمدہے۔

حمدیہ
نہ صدا کا سمت کشا ہوں میں
نہ ورق پہ میرا وجود ہے
مرے حرف میں وہ چمک نہیں جو ترے خیال کی چھب میں ہے
مرا انگ کیا مرا ڈھنگ کیا
سرِ خامہ روح کادُود ہے
یہی میرا رازِ شہود ہے
میں شکست خوردہ خیال ہون مجھے آیتوں کی کمک ملے
مجھے آگہی کی چمک ملے
مجھے درسِ عبرت شوق دے
مری انگلیوں کو پکڑ کے حرفِ جنوں پہ رکھ
رہِ خواندگاں پہ مری کجی مری گمرہی کو بھی ڈال دے
نہ قلم پکڑنے کا ڈھنگ ہے نہ ورق ہے میری بساط میں
مرا منہ چڑاتی ہے لوحِ گل
ابھی وہ ورق نہیں سامنے ترا پاک نام کہاں لکھوں
کہ سپیدی صفحہ صاف کی مری آنکھوں میں ہے بھری ہوئی
جہاں کوئی سطر ہے خواب کی نہ خرام موجہِ اشک ہے
مجھے خوابِ خوش سے نواز دے کہ یہ چشمِ وا بھی عذاب ہے
میں تہی نوا
میں تہی ثنا
میں لکھوں گا کیا؟
مگر اے خدا مری پوٹلی میں جو تیرے دھیان کی جوت ہے
یہی رت جگا مرا مال ہے
یہی مال مرا کمال ہے

عباس تابش​

 

[فلک شیر]

کھڑی ہیں رہ میں دُرودوں کی ڈالیاں لے کر
یہ مدحتیں ہیں کہ ہیں بچیاں مدینے کی​

 

[فلک شیر]

نہ جانے کون مرا کھو گیا ہے مٹی میں
زمیں کریدتی رہتی ہیں انگلیاں میری​

 

[فلک شیر]

سن رہا ہوں ابھی تک میں اپنی ہی آواز کی بازگشت
یعنی اس دشت میں زور سے بولنا بھی اکارت گیا​

 

[فلک شیر]

ثبت کر اور کوئی مہر مرے ہونٹوں پر
قفلِ ابجد سے نہیں بند ہوا باب مرا

جس قدر آئی فراخی مرے دل میں تابش
اتنا ہی تنگ ہوا حلقہ احباب مرا​

 

[فلک شیر]

پہلے تو چوپال میں اپنا جسم چٹختا رہا تھا
چل نکل جب بات سفر کی پھیل گئی اعصاب میں چپ

اب تو ہم یوں رہتے ہیں اس ہجر بھرے ویرانے میں
جیسے آنکھ میں آنسو گم ہو جیسے حرف کتاب میں چپ​

 

[فلک شیر]

پہنچے تو سبھی بارگہِ حسن میں لیکن
جلدی کوئی آیا کوئی تاخیر سے پہنچا​

 

[فلک شیر]

دستک نے ایسا حشر اٹھایا کہ دیر تک
لرزاں رہا ہے جسم بھی زنجیرِ درکے ساتھ​

 

[فلک شیر]

فقط مال و زر ِدیوار و در اچھا نہیں لگتا
جہاں بچے نہیں ہوتے وہ گھر اچھا نہیں لگتا​

 

[فلک شیر]

راستے گم ہو رہے ہیں دھند کی پہنائی میں
سردیوں کی شام ہے پھر اس کا چک آنے کو ہے​

 

[فلک شیر]

شب کی شب کوئی نہ شرمندہ رخصت ٹھہرے
جانے والوں کے لیے شمعیں بجھا دی جائیں​

 

[فلک شیر]

مرے حروفِ تہجی کی کیا مجال کہ وہ
تجھے شمار میں لائیں ترا حساب کریں​

 

[فلک شیر]

یہ آج شام بھی گزری کسی خیال کے ساتھ
نہ اس سے ملنے گیا میں نہ اپنے گھر بیٹھا​

 

[فلک شیر]

میرے سینے سے ذرا کان لگا کر دیکھو
سانس چلتی ہے کہ زنجیر زنی ہوتی ہے​

 

[فلک شیر]

میں جب بھی دھوپ کے صحرا میں جا نکلتا ہوں
وہ ہاتھ مجھ پہ دعا کا شجر بناتے ہیں​

 

[فلک شیر]

کہیں لالی بھری تھالی نہ گر جائے سمندر میں
چلا ہے شام کا سورج کہاں آہستہ آہستہ

مکیں جب نیند کے سائے میں سستانے لگیں تابش
سفر کرتے ہیں بستی کے مکاں آہستہ آہستہ​

 

[فلک شیر]

قیدی بھی ہیں اس شان کے آزاد تمہارے
زنجیر کبھی زلف سے بھاری نہیں رکھتے

مصروف ہیں کچھ اتنے کہ ہم کارِ محبت
آغاز تو کر لیتے ہیں جاری نہیں رکھتے
​

 

[فلک شیر]

کوئی روندے تو اٹھاتے ہیں نگاہیں اپنی
ورنہ مٹی کی طرح راہ سے کم اٹھتے ہیں​

 

[فلک شیر]

ادھوری نظم

اندھیری شام کے ساتھی
ادھوری نظم سے زور آزما ہیں
برسرِ کاغذ بچھڑنے کو
سنو.......تم سے دلِ محزوں کی باتیں کہنے والوں کا
یہی انجام ہوتا ہے
کہیں سطرِ شکستہ کی طرح ہیں چار شانے چت
کہیں حرفِ تمنا کی طرح دل میں ترازو ہیں
سنو......ان نیل چشموں سخت جانوں بے زبانوں پر
جو گزرے گی سو گزرے گی
مگر میں اک ادھوری نظم کے ہیجان میں کھویا
تمہیں آواز دیتا ہوں
کہ تنہا آدمی تخلیق سے عاری ہوا کرتا ہے
جانِ من!
سنو......میرے قریب آؤ
کہ مجھ کو آج رات اک ادھوری نظم پوری کر کے سونا ہے!​

 

[فلک شیر]

ویسے تو اس بت کے گھر کا فاصلہ اتنا نہیں
دو قدم چلیے تو مرگِ ناگہاں ہے سامنے​