نبیل
تکنیکی معاون
حوالہ: پاکستان:بی بی سی ورلڈ کی نشریات نہ دکھانےکا اعلان
پاکستان میں کیبل ٹی وی آپریٹرز نے پاکستان اور پاکستانی افواج کی منفی تشہیر کرنے پر بی بی سی ورلڈ کی نشریات نہ دکھانے کا اعلان کیا ہے۔
ادھر بی بی سی نے نشریات کی فوری بحالی کا مطالبہ کرتے ہوئے کہا ہے کہ یہ اقدام باعثِ فکر ہے۔
بی بی سی ورلڈ کی نشریات نے دکھانے کا اعلان منگل کو پاکستان کے کیبل آپریٹرز ایسوسی ایشن کے عہدیداروں نے لاہور میں ایک پریس کانفرنس سے خطاب کرتے ہوئے کیا۔
تنظیم کے چیئرمین خالد آرائیں نے الزام لگایا کہ عالمی میڈیا پاکستان اور پاکستانی افواج کے بارے میں منفی تشہیر کر رہا ہے ۔انہوں نے بتایا کہ پہلے مرحلے میں بی بی سی ورلڈ کی نشریات پاکستان میں کیبل پر بند کی جا رہی ہیں۔
کیپل آپریٹرز ایسوسی ایشن کے مرکزی صدر ملک فرقان غیاث کے بقول بی بی سی نے پاکستانی اداروں کے خلاف دستاویزی فلم نشر کی جس کے بعد بی بی سی کی نشریات کو پاکستان میں بند کرنے کا فیصلہ کیاگیا ہے۔
ایک سوال پر انہوں نے بتایا کہ بی بی سی کی نشریات پاکستان میں بند کرنے کے فیصلے پر علمدرآمد کا آغاز اسلام آباد سے کیا گیا ہے اور بدھ کی دوپہر بارہ بجے تک پورے ملک میں بی بی سی کی نشریات بند ہو جائیں گی۔
تنظیم کے چیئرمین خالد آرائیں نے کہا کہ بی بی سی کی دستاویزی فلم کے بعد حکومت کو اس پر کارروائی کرنی چاہیے تھی لیکن حکومت کی طرف سے کوئی نوٹس نہ لینے پر کیبل آپریٹرز نے بی بی سی کی نشریات کو بند کرنے کا فیصلہ کیا۔
اس اعلان پر بی بی سی کے ترجمان کا کہنا ہے کہ ’ ہم کسی بھی ایسے اقدام کی مذمت کرتے ہیں جو ہماری ادارتی آزادی کے لیے خطرہ بنے اور ناظرین کو ہماری غیرجانبدارانہ بین الاقوامی نیوز سروس تک رسائی سے روکے‘۔