آپ کے پسندیدہ اشعار!

[طارق شاہ]

مصرعوں میں گیسوِوں کی فصاحت کا بھر کے رنگ
اپنی ہر اِک غزل کو سند ہم نے کر دیا

تشبیہہ دے کے قامتِ جاناں کو سرو سے
اُونچا ہر ایک سرو کا، قد ہم نے کر دیا

سراج الدین ظفر

 

[طارق شاہ]

جو پہنے اُس کو جامۂ عُریانی ٹھیک ہو
اندام پر، ہراِک کے ہے یہ پیرہن درست

خواجہ حیدرعلی آتش

 

[طارق شاہ]

آباد ہم آشفتہ سروں سے نہیں مقتل
یہ رسم ابھی شہر میں زندہ ہے کہ تُم ہو

اے جانِِ فراز اتنی بھی توفیق کِسے تھی
ہم کو غمِ ہستی بھی گوارا ہے کہ تُم ہو

احمد فراز

 

[طارق شاہ]

جنھیں فیضانِ گلشن ہے، نہ عرفانِ بہاراں ہے
وہ پُھولوں کو نئے جذبات کی تعلیم دیتے ہیں

یہاں کلیاں مہکتی ہیں مگر خوشبُو نہیں ہوتی
شگوفے برملا آفات کی تعلیم دیتے ہیں

ساغر صدیقی

 

[طارق شاہ]

کوئی نقش اور کوئی دیوار سمجھا
زمانہ ہُوا مجھ کو چُپ رہتے رہتے

مِری ناؤ اِس غم کے دریا میں ثاقب
کنارے پہ آ ہی لگی بہتے بہتے

ثاقب لکھنوی

 

[طارق شاہ]

اللہ رے میرے شوق کی مُشکل پسندیاں !
کِس آفتِ جہاں کو کِیا اِنتخاب ہے

میں نے کہا کہ میرے گھر آؤ، کہا کہاں
تیرا تو نام پہلے ہی خانہ خراب ہے

میرمہدی مجروح

 

[صائمہ شاہ]

یہ کس نے آج جگائی ہے عہدِ رفتہ کی یاد
یہ کون دل کے قریں آج نوحہ خواں سا ہے

صوفی تبسم

 

[صائمہ شاہ]

مجھ پر گراں گذرتی ہے میری صدا کی گونج
چپ ہوں درونِ گنبدِ بے در پڑا ہوا

میں چھپتا پھر رہا ہوں خود اپنی ہی ذات سے
قیصر مرا عذاب ہے مجھ پر پڑا ہوا

نذیر قیصر

 

[طارق شاہ]

نہ ہوگی خشک، کہ شاید وہ لوٹ آئے پھر
یہ کشت گزرے ہوئے ابرکی نشانی ہوئی

عبیداللہ علیم

 

[طارق شاہ]

بے بسی رات کی چہروں سے جھلکتی ہے صبح
دن کے آلام اُٹھاتے ہیں تراوٹ کے بغیر

رُوح تک جسم کے دردوں کی کسک جاتی ہے
کام دُنیا میں کوئی ہے بھی، تھکاوٹ کے بغیر

شفیق خلش

 

[طارق شاہ]

نشوونُمائے سبزہ و گُل سے بہار میں
شادابیوں نے گھیر لِیا ہے چمن تمام

شیرینئ نسِیم ہے، سوز و گدازِ میر
حسرت تِرے سُخن پہ ہے، لُطفِ سُخن تمام

حسرت موہانی

 

[طارق شاہ]

گورا مُکھڑا یہ سُرخ گال تِرے
چاندنی میں گلاب دیکھا ہے

نرگسی آنکھ ، زُلف شب رنگی
بادلوں کا جواب دیکھا ہے

ہم تو مِل کر، نہ مِل سکے تم کو
تم کو دیکھا، کہ خواب دیکھا ہے

قمرجلال آبادی

 

[طارق شاہ]

یہی خوشیاں رہیںگی دہر میں، ایسے ہی غم ہونگے
مگر اِک وقت آئے گا، نہ تم ہو گے نہ ہم ہونگے

امیدیں ٹُوٹتی ہیں، تو بہت صدمہ پہنچتا ہے !
جو اُمیدیں کریگا کم، اُسے صدمے بھی کم ہونگے

اکبرالٰہ آبادی

 

[طارق شاہ]

دین و مِلّت کی ترقّی کا خیال اچھا ہے !
اصل مضبوُط ہو جس کی، وہ نہال اچھا ہے

بُخدا ہند کے پُرزے بھی غضب ڈھاتے ہیں !
یہ غلط ہے کہ، ولایت کا ہی مال اچھا ہے

اکبرالٰہ آبادی

 

[طارق شاہ]

جگر ! وہ حُسنِ یکتوئی کا منظر یاد ہے اب تک !
نِگاہوں کا سمٹنا اور ہجومِ نُور ہو جا نا

جگرمرادآبادی

 

[عندلیب]

چاند کا کردار اپنایا ہے ہم نے دوستو
داغ اپنے پاس رکھے روشنی بانٹا کئے

حفیظ میرٹھی

 

[طارق شاہ]

عشق ہے ہر مُوئے تن سے نغمہ زن
بج رہی ہیں ہر طرف شہنائیاں

کوئی دیکھے تو حریمِ شوق میں
خلوتوں کی انجمن آرائیاں

یاد ہے اب تک جگر! آغازِ عشق
شب، ہمہ شب وہ خیال آرائیاں

جگرمُرادآبادی

 

[طارق شاہ]

منظر میں جتنے رنگ ہیں نیرنگ اُسی کے ہیں
حیرانیوں میں ذوقِ نظر بھی اُسی کا ہے

مُجرم ہُوں اور خرابۂ جاں میں اماں نہیں
اب میں کہاں چُھپوں کہ یہ گھر بھی اُسی کا ہے

عرفان صدیقی

 

[طارق شاہ]

‫اِک عکس کی دُوری پہ ہے رُوداد گہِ خواب
آئینہ ابھی رنگِ دِگر تک نہیں پہنچا

ہوتے رہے ہر موڑ پہ دونِیم دل و جاں
میں پُورا کبھی لوٹ کے گھر تک نہیں پہنچا

اظہر نقوی

 

[طارق شاہ]

‫کیا خبر تیرہ شبی ہے، کہ اُجالے ہوئے ہیں
ہم تو اُس شہر سے مدّت کے نکالے ہوئے ہیں

اظہر نقوی