آپ کے پسندیدہ اشعار!
- صاحب لڑی فرقان احمد
- تاریخ ابتداء
طارق شاہ
محفلین
نہ جانے کون صدا آ رہی ہے کانوں میں
سُنا ہے مذہبِ دِل کُفر ہے، نہ ایماں ہے
تِرے خِرام سے یہ رازِ قُرب و بعد کُھلا !
نہ ہاتھ آئے جو ہاتھ آ کے بھی ، وہ داماں ہے
نہ پوُچھ عرصۂ ہستی کی وُسعت و تنگی
جو چل پڑے تو بیاباں ، رُکے تو زِنداں ہے
بہت قریب کہیں مُسکرا رہا ہے کوئی
رَگِ جُنوں ہے، رَگِ گُل ہے یا رَگِ جاں ہے
فراق گورکھپُوری
طارق شاہ
محفلین
تھا مُستعار حُسن سے اُس کے جو نوُر تھا
خوُرشید میں بھی اُس ہی کا ذرّہ ظہُور تھا
پُہنچا جو آپ کو تو، میں پُہنچا خُدا کے تئیں
معلوم اب ہُوا کہ بہت میں بھی دُور تھا
آتش بُلند دِل کی نہ تھی ، ورنہ اے کلیم !
یک شعلہ برقِ خرمنِ صد کوہِ طُور تھا
مجلِس میں رات ایک تِرے پَرتوے بغیر
کیا شمع، کیا پتنگ، ہر اِک بے حضوُر تھا
ہم خاک میں مِلے تو مِلے لیکن ، اے سپہر!
اُس شوخ کو بھی راہ پہ لانا ضرُور تھا
میر تقی میر
طارق شاہ
محفلین
پھر آج اَشک سے آنکھوں میں کیوں ہیں آئے ہُوئے
گُزر گیا ہے زمانہ ، تجھے بُھلائے ہُوئے
یہ نرم نرم ہوائیں ہیں کِس کے دامن کی
چراغِ دیروحرم بھی ہیں جِھلمِلائے ہُوئے
اب اِضطراب سا کیوں ہے کہ مُدتیں گُزرِیں
تجھے بُھلائے ہُوئے، تیری یاد آئے ہُوئے
زمانہ بُھول گیا، بس وہی نہیں بُھولے
گذر گئی جنھیں اِک عُمر یاد آئے ہُوئے
فراق گورکھپوری
طارق شاہ
محفلین
غم سے لپٹ ہی جائیں گے ، ایسے بھی ہم نہیں
دُنیا سے کٹ ہی جائیں گے ، ایسے بھی ہم نہیں
دن رات بانٹتے ہیں ہمیں ، مُختلِف خیال !
یُوں اِن میں بٹ ہی جائیں گے ، ایسے بھی ہم نہیں
اِتنے سوال دل میں ہیں ، اور وہ خموش در
اُس در سے ہٹ ہی جائیں گے ، ایسے بھی ہم نہیں
ہم ہیں مثالِ ابر ، مگر اِس ہَوا سے ہم
ڈر کر سِمٹ ہی جائیں گے ، ایسے بھی ہم نہیں
ہیں سختیِ سفر سے بہت تنگ ، پر منیر !
گھر کو پلٹ ہی جائیں گے ، ایسے بھی ہم نہیں
منیر نیازی
آخری تدوین: