آج کا شعر

[فرخ منظور]

فصیلِ جسم پہ تازہ لہو کے چھینٹے ہیں
حدودِ وقت سے آگے نکل گیا ہے کوئی
(شکیب جلالی)

 

[محمد وارث]

اپنا افسانۂ شوقِ ناکام
کوئی آغاز نہ کوئی انجام

(نا معلوم)

 

[زونی]

لوگ کہتے ہیں سایہ تیرے پیکر کا نہ تھا
میں تو کہتا ہوں سارے عالم پہ ہے سایہ تیرا

(احمد ندیم قاسمی)

 

[شمشاد]

بہت ہی خوبصورت نعتیہ شعر ہے۔

 

[فرخ منظور]

فقط اس شوق سے پوچھی ہیں‌ ہزاروں باتیں
میں تیرا حسن ترے حسنِ بیاں تک دیکھوں
(احمد ندیم قاسمی)

 

[زونی]

میں یہ کس کے نام لکھوں جو الم گزر رہے ہیں
مرے شہر جل رہے ہیں مرے لوگ مر رہے ہیں

کوئی غنچہ ہو کہ گل ہو کوئی شاخ ہو شجر ہو
وہ ہوائے گُلستاں ہے کہ سبھی بکھر رہے ہیں

( عبیداللہ علیم)

 

[شمشاد]

کبھی یوں بھی ہو میرے روبرو، میں نظر ملا کے کہہ سکوں
میری حسرتوں کا شمار کر، مری خواہشوں کا حساب دے

 

[زونی]

کبھی یوں بھی ہو رہے روبرو، میں نظر ملا کے کہہ سکوں
میری حسرتوں کا شمار کر، مری خواہشوں کا حساب دے

شمشاد بھائی میرے خیال سے" رہے" کی جگہ "میرے " لفظ ھے

 

[شمشاد]

نشاندہی کا شکریہ، میں نے تصحیح کر دی ہے۔

 

[زونی]

ہر گھر کا دیا گُل نہ کرو تم کہ نہ جانے
کس بام سے خورشیدِ قیامت نکل آئے

(احمد فراز)

 

[شمشاد]

اک عمر سے ہوں لذتِ گریہ سے بھی محروم
آ راحتِ جاں مجھ کو رُلانے کے لیے آ
(احمد فراز)

 

[محمد وارث]

نغمہ ہائے غم کو بھی اے دل غنیمت جانیے
بے صدا ہو جائے گا یہ سازِ ہستی ایک دن

(غالب)

 

[شمشاد]

قمر اس بے مہر دنیا میں جینا کیسا جینا ہے
ہم اپنے عشق میں جل کر نکھر جاتے تو اچھا تھا
(سیّد ارشاد قمر)

 

[فرحت کیانی]

پی جا ایّام کی تلخی کو بھی ہنس کر ناصر
غم کو سہنے میں بھی قدرت نے مزہ رکھا ہے

عبدالحکیم ناصر

 

[شمشاد]

تم آئے ہو، نہ شبِ انتظار گزری ہے
تلاش میں ہے سحر، بار بار گزری ہے
(فیض)

 

[زونی]

دل تو چمک سکے گا کیا پھر بھی تراش کے دیکھ لو
شیشہ گرانِ شہر کے ہاتھ کا یہ کمال بھی

( پروین شاکر)

 

[فرخ منظور]

وہ بات سارے فسانے میں جس کا ذکر نہ تھا
وہ بات ان کو بہت ناگوار گزری ہے
(فیض)

 

[محمد وارث]

دیارِ دل کی رات میں چراغ سا جلا گیا
ملا نہیں تو کیا ہوا وہ شکل تو دکھا گیا

(ناصر کاظمی)

 

[شمشاد]

تجھے کیا پتہ اے ستم ڈھانے والے
ہم تو رونے کے بہانے ڈھونڈتے ہیں

ان کی آنکھوں کو یوں دیکھو نہ ‘کمال‘
نئے تیر ہیں۔۔۔ نشانے ڈھونڈتے ہیں

 

[زونی]

ڈھونڈ اجڑے ہوئے لوگوں میں وفا کے موتی
یہ خزانے تجھے ممکن ھے خرابوں میں ملیں

(احمد فراز)