اردو تھیسارس ویب سائٹ کا اجراء

آج صبح ہی ٹوئٹر سے اردو تھیسارس ویب سائٹ کے اجراء کی خبر ملی۔
ویب سائٹ کا تعارفی مضمون :


اردو تھیسارس کا BETA یا ’آزمائشی‘ ورژن جو ۱۶ جولائی ۲۰۱۶ کو انٹرنیٹ اور موبائل فون کے لیے جاری کیا گیا، پانچ سال کی مدت میں تیار ہوا۔ ویب سائٹ اور ایپ کے ذریعے اُردو تھیسارس کے موجودہ ورژن میں چالیس ہزار سے زائد الفاظ اور بیس ہزار سے زائد مترادفات کے مجموعے ڈھونڈے جاسکتے ہیں۔ اردو زبان اور الفاظ کے ایک ماخذ کے طور پراس کو بہتر بنانے کا عمل مسلسل جاری ہے۔ اپنی موجودہ حالت میں یہ محض مترادفات کے ایک حصے پر مشتمل ہے، لیکن مستقبل میں اُردو اور ذولسانی لغات کے علاوہ، اس میں متضادات، محاورات، اور ضرب الامثال کا اضافہ بھی کیا جائےگا۔ اردو تھیسارس کے استعمال کی ہدایات یہاں پڑھی جاسکتی ہیں۔

میں ماہرین اردو ادب و لسانیات جناب ڈاکٹر تحسین فراقی، ڈاکٹر معین نظامی، محمد سلیم الرحمان، اور ڈاکٹر مظہر محمود شیرانی کا مشکور ہوں کہ انھوں نے مستقبل میں اس علمی منصوبے کی ہدایت کے لیے ادارتی مشاورتی بورڈ میں شمولیت کی میری درخواست قبول فرمائی۔ اس اردو تھیسارس میں موجود کسی بھی غلطی، نقص یا سہو کا میں بہرحال خود ذمے دار ہوں۔

میں ڈاکٹر اویس اطہر کا ممنون ہوں جنہوں نے از حد خلوص اور نہایت محنت سے اردو تھیسارس کے آن لائن ڈیٹابیس اور موبائل ایپ کی تیاری میں مدد دی۔ انھوں نے مختلف مراحل میں بھیجے جانے والے میرے متعدد سوالات پر رہنمائی کی، اور ڈیٹا کی ترتیب و تنظیم، موبائل ایپ کی خامیاں دور کرنے، اور اس کو استعمال میں سہل بنانے کے لیے مطلوبہ سہولیات فراہم کیں۔

میں اردو تھیسارس کی ایڈیٹنگ اور پروف ریڈنگ کی ذمہ داری سے انجام دہی پر محترمہ حمیرا اشرف اور ڈاکٹر رفاقت علی شاہد کا مشکور ہوں۔ جناب عثمان عابد اور محمد شعیب کا شکریہ بھی واجب ہے جنھوں نے محنت اورباریک بینی سے تمام الفاظ کا اندراج کیا۔

زبان اور الفاظ کے کسی بھی ماخذ کی طرح اردو تھیسارس کی تالیف میں بھی متعدد اردو لغات اور مستند حوالہ جاتی کتب سے استفادہ کیا گیا ہے، لیکن اس اردو تھیسارس میں موجود ذخیرہ الفاظ کی ترتیب و تنظیم منفرد ہے اور اس کے کاپی رائٹ اور جملہ حقوق محفوظ ہیں۔ مآخذ کی کتابیات اس منصوبے کی تکمیل پر جاری کی جائے گی۔

لائسنسنگ اور ڈیٹا ڈاؤنلوڈ کے بارے میں معلومات کے لیے ادارے کی ای میل کے ذریعے رابطہ کیجیے۔

اردو تھیسارس ایک مفت تعلیمی سروس کے طور پر پیش کی جارہی ہے۔ ادارہ اس کے ڈیزائن، خصوصیات اور مندرجات میں بہتری کے لیے آپ کی تجاویز اور سفارشات سے مستفید ہو گا۔ اردو تھیسارس اور اس کی انفرادی اندراجات سے متعلق اپنے تبصروں کے لیے، ویب سائٹ اور موبائل فون ایپ میں دیے گئے لنک کے ذریعے براہِ مہربانی ہم سے رابطہ کیجیے۔ ادارہ آپ کے تجربے کے بارے میں جاننا چاہتا ہے اور آپ کے تعاون اور معاونت کا شکریہ ادا کرتا ہے۔


مخلص،
مشرف علی فاروقی
مدیر، اردو تھیسارس
۱۶ جولائی ۲۰۱۶
 

الف نظامی

لائبریرین
ایک مثال:

 
اردو لکھنے اور پڑھنے والوں کو بعض اوقات ایک ایسی آزمائش کا سامنا کرنا پڑتا ہے جب وہ کسی لفظ کا مطلب یا اس کا مناسب متبادل لفظ جاننے کے لیے کئی لغات کا سہارا لیتے ہیں۔

لاہور میں مقیم مصنف اور مترجم مشرف علی فاروقی کو ابھی اسی آزمائش کا سامنا رہا تاہم انھوں نے اس مشکل کا حل ایک ایپلی کیشن کی صورت میں پیش کیا ہے۔

مشرف علی فاروقی نے حال ہی میں اردو الفاظ کے مترادف الفاظ کا ذخیرہ جمع کر کے ایک ایپلی کیشن اور ویب سائٹ پر اردو تھیسارس کا ایک آزمائشی ورژن انٹرنیٹ اور موبائل فون کے لیے جاری کیا۔

انھوں نے بی بی سی اردو سروس سے خصوصی بات چیت کرتے ہوئے بتایا کہ انھوں نے یہ کام پانچ سال کی مدت میں کیا ہے اور تاحال اس پر مزید کام جاری ہے۔

خیال رہے کہ اردو زبان میں ایک لفظ کے معنی ایک سے زیادہ الفاظ سے ادا ہوسکتے ہیں یعنی وہ الفاظ جو ایک دوسرے کا متبال ہوں یا اپنے معنی میں یکساں یا ایک دوسرے سے قریب ہوں مترادفات کہلاتے ہیں۔

مشرف علی فاروقی اردو ادب میں کلاسیک کا درجہ رکھنے والی تصانیف کے اردو سے انگریزی میں تراجم کر چکے ہیں جن میں داستان امیر حمزہ اور طلسم ہوش ربا قابل ذکر ہیں۔

مشرف علی فاروقی کا کہنا ہے کہ جب سے میں نے کلاسیکی ادب کے تراجم کا کام شروع کیا ہے اس سے زندگی عذاب ہوگئی تھی کیونکہ ان میں جو اصلاحات ہیں ان کے متبادل الفاظ کہیں ملتے ہی نہیں اور اس کے لیے آپ کو کئی لغات سے مدد لینا پڑتی ہے۔ اسی دوران میں نے سوچا کہ ان سب الفاظ اور اصلاحات کا ایک آسان ذریعہ ہونا چاہیے۔

برصغیر میں اردو لغات پر جتنا کام ہوا ہے شاید کہیں اور نہیں ہوا اور میرا خیال ہے کہ اگر یہ سارے لوگ آج کام کر رہے ہوتے تو شاید وہ بھی کسی الیکٹرانک ذریعے کا سہارا لیتے، یہیں سے میرے ذہن میں اس اپیلی کیشن کے خیال نے جنم لیا۔

ان کا کہنا تھا کہ اس ایپلی کیشن میں ذخیرہ الفاظ تقریباً 40 ہزار ہے جبکہ 25 ہزار سے زائد مجموعہ مترادفات ہیں۔

اردو تھیسارس کے موجودہ آزمائشی ورژن میں مترادفات کا تقریباً پچاس فیصد ذخیرہ موجود ہے اور اگلے مرحلے پر مزید ڈیٹا شامل کیا جائے گا۔

ان کا کہنا ہے کہ اس ایپلی کیشن اور ویب سائٹ پر مستقبل میں متضاد الفاظ، محاورے اور ضرب الامثال بھی شامل کیے جائیں گے۔

فی الحال یہ ایپلی کیشن اینڈرائیڈ اور ویب صارفین کے لیے ہے تاہم آئی فون کی ایپلی کیشن ابھی تیاری کے مرحلے میں ہے۔


ماخذ
 
میں نے اپلیکشن ڈاؤنلوڈ کی ہے اور یہ ایک انتہائی بہترین کاوش ہے۔ مشرف علی فاروقی صاحب کی ہمت کو سلام

33c4qac.jpg
 
اردو ترجمہ چاہیئے یا فارسی؟
ویسے اگر کسی کو اس کا اردو متبادل معلوم ہے تو ضرور بتائے.
میرے خیال میں تو تھیسارس ہی اردو میں مستعمل ہے اب. اور میرے نزدیک کچھ ایسا مسئلہ بھی نہیں اسی کو استعمال کرنے میں. بہرحال اگر متبادل موجود ہے تو اچھی بات ہے. :)
 
السلام علیکم عزیزانِ محفل۔

ایک اینڈرائیڈ ایپ اردو تھیسارس (Urdu Thesaurus) کے نام سے پلے سٹور پر موجود ہے اور اردو سے اردو معنیٰ کے لیے انتہائی مفید ہے۔ ایک تو یہ ایڈ فری ہے اور دوسرا اس میں بہت سارے ایسے الفاظ کا ذخیرہ موجود ہے جو عام طور پر ہماری روز مرہ بول چال میں شامل نہیں ہیں۔ اس ایپ کو پلے سٹور پر نیچے دیے گئے لنک سے ڈاؤنلوڈ کیا جا سکتا ہے۔
Urdu Thesaurus - Android Apps on Google Play

امید ہے یہ ایپ آپ کو پسند آئے گی۔
 
آخری تدوین:
Top