داغ کب وہ چونکے جو شرابِ عشق سے مستانہ ہے ۔ داغ دہلوی

فرخ منظور

لائبریرین
کب وہ چونکے جو شرابِ عشق سے مستانہ ہے
شورِ محشر اس کو بہرِ خواب اِک افسانہ ہے
پھر سرِ شوریدہ پُر جوشِ جنوں دیوانہ ہے
پھر دلِ تفسیدہ پر برقِ بلا پروانہ ہے
خوب ہی چلتی ہوئی وہ نرگسِ مستانہ ہے
آشنا سے آشنا، بیگانے سے بیگانہ ہے
آتے جاتے ہیں نئے ہر روز مرغِ نامہ بر
بندہ پرور آپ کا گھر بھی کبوتر خانہ ہے
فاتحہ پڑھنے کو آیا تھا مگر وہ شمع رُو
آج میری قبر کا جو پھول ہے پروانہ ہے
درد سے بھرتے ہیں آنسو ضبط سے پیتے ہیں ہم
آنکھ کی ہے آنکھ یہ پیمانے کا پیمانہ ہے
پائے ساقی پر گرایا جب گرایا ہے مجھے
چال سے خالی کہاں یہ لغزشِ مستانہ ہے
کوہ کن کا تھا یہی پیشہ جو کاٹا تھا پہاڑ
کم مشکل جاں کنی اے ہمتِ مردانہ ہے
جب پڑا ہے وقت کوئی، ہو گئے ہیں سب الگ
دوست بھی اپنا نہیں، بیگانہ تو بیگانہ ہے
اس کے در پر جا کے ہوتا ہے گدا کو بھی یہ ناز
لوگ کہتے ہیں مزاج اس شخص کا شاہانہ ہے
مجھ کو لے جا کر کہا ناصح نے ان کے روبرو
آپ کے سر کی قسم یہ آپ کا دیوانہ ہے
اس کو دیوانہ بنا لوں تو کروں جھک کر سلام
میں تو بھولا ہوں مگر دشمن بڑا فرزانہ ہے
ہم نے دیکھا ہی نہیں خالی نحوست سے کوئی
زاہدوں کو مبارک سبحۂ صد دانہ ہے
داغ یہ ہے کوئے قاتل، مان ناداں ضد نہ کر
اٹھ یہاں سے ادھر، گھر بیٹھ، کچھ دیوانہ ہے
(داغ دہلوی)
 

باباجی

محفلین
واہ بہت ہی خوب شیئرنگ سر جی

درد سے بھرتے ہیں آنسو ضبط سے پیتے ہیں ہم
آنکھ کی ہے آنکھ یہ پیمانے کا پیمانہ ہے
 

طارق شاہ

محفلین
فرخ صاحب!
تشکّراور بہت سی انتخابی داد، اِس خوب صورت شیئرنگ پر
بہتا لطف دیا آپ کے انتخاب نے
بہت خوش رہیں
 

شاہد دہلوی

محفلین
میرا خیال ہے کہ یہ تین اشعار غالباً کچھ اس طرح ہوں گے ۔
براہِ کرم رہ نمائی کی جاے ۔
۔۔۔۔۔
کوہ کن کا تھا یہی پیشہ جو کاٹا تھا پہاڑ
کام مشکل جاں کنی اے ہمتِ مردانہ ہے

ہم نے دیکھا ہی نہیں خالی نحوست سے کوئی
زاہدوں کو ہو مبارک سبحۂ صد دانہ ہے
داغ یہ ہے کوئے قاتل، مان ناداں ضد نہ کر
اٹھ یہاں سے آادھر، گھر بیٹھ، کچھ دیوانہ ہے
۔۔۔۔۔۔۔
 
Top