"یاد" کے موضوع پر اشعار!

[حجاب]

گو پلٹتے نہیں بیتے ہوئے زمانے پھر بھی
دل پہ بیتی ہوئی یادوں کا نشاں رہتا ہے

 

[نوید ملک]

کہیں یہ ترکِ محبت کی ابتداء تو نہیں
وہ مجھ کو یاد کبھی اس قدر نہیں آئے

 

[عبدالجبار]

کیا یاد ہیں تم کو وہ راتیں، جب پیار سے کرتے تھے باتیں
ہم آج تلک اُن راتوں کو بے تاب بُلایا کرتے ہیں​

 

[عمر سیف]

اس شام وہ رخصت کا سماں یاد رہے گا
وہ شہر، وہ کوچہ، وہ مکاں یاد رہے گا
وہ ٹیس کہ ابھری تھی ادھر یاد رہے گی
وہ درد کہ اٹھا تھا یہاں یاد رہے گا
(انشاء)

 

[عبدالجبار]

ہم میں کیا ہے کہ ہمیں یاد کرے گا کوئی
اچھے اچھوں کو یہاں لوگ بُھلا دیتے ہیں​

 

[نوید ملک]

تھک گیا دلِ وحشی مرا فریاد سے بھی
جی بہلتا نہیں اے دوست تری یاد سے بھی

 

[عبدالجبار]

وہ مجھے یاد تو کرتا ہے مگر یوں جیسے
گھر کا دروازہ کسی رات کُھلا رہ جائے​

 

[عمر سیف]

اکیلے کس سے اٹھا ہے تعلق کا بوجھ
وہ تم کو یاد نہ رکھے تو بھول جانا اسے

 

[عبدالجبار]

سماں‌ہے قہر کا، یا ہے یہ پیار کی صورت
کھٹک رہی ہے تِری یاد خار کی صورت​

 

[عمر سیف]

تھک گیا میں یاد تجھ کو کرتے کرتے
اب تجھے میں یاد آنا چاہتا ہوں

 

[نوید ملک]

یوں میری یاد میں محفوظ ہیں تیرے خدوخال
جسطرح دل میں کسی شے کی تمنا ہونا

 

[عمر سیف]

ایک عُمر سے عادت ہے تیرے شام و سحر کی
اب کون تیری یاد کے معمول سے نکلے

 

[تیشہ]

یاد میری بھی پڑی رہتی ہے تکئیے کے تلے
آخری خط کی طرح روز جلاتی ہوں اسے

راہ میں اسکے بچھادیتی ہوں ٹوٹی ہوئی چوڑُی
چھب کے کانٹے کی طرح روز ستاتی ہوں اسے

بھولے بسرے کسی لمحے کی مہکتی خوشبو
گوندھ کر اپنے پراندے میں جھلاتی ہوں اسے

ایک بھیگے ہوئے نیناں کا سمجھکر موتی
شام کے نیلے دوپٹے میں لگاتی ہوں اسے ۔

 

[عمر سیف]

رنج، غم، درد، الم، یاس، تمنا، حسرت
اِک تری یاد کے ہونے سے ہے کیا کیا دل میں

 

[F@rzana]

‘‘تمہاری یاد‘‘

سونی سونی،خالی خالی
اک سرمئی حویلی میں
راگ۔ ۔ ۔ ستار نے چھیڑا ہے
اک جلتی مشعل لے کر
شب ۔ ۔ ۔ ملنے کو آئی ہے
فانوسوں کی چھن چھن، چھن میں
جھلمل جھلمل چاندنی پر
رقص ہوا کا جاری ہے
سوکھی چنبیلی کی اک بیل
خستہ ستون سے لپٹی ہے
اور
تھرکتی لو کا رنگ لے کر
لاکھوں ننھے دیپ
دل کے طاق پہ جل اٹھے ہیں
آئی جیسے۔ ۔ ۔
تمہاری یاد !!!
​

 

[نوید ملک]

میں‌جاتا ہوں ، دل کو ترے پاس چھوڑے
مری یاد تجھ کو دلاتا رہے گا

 

[عمر سیف]

یاد کیا دستِ ہنر ہے کہ سنوارتا گیا میں
اسکو سوچا تو اُسے یاد ہی کرتا گیا میں

 

[نوید ملک]

تو بھی اس شہر کا باسی ہے تو دل سے لگ جا
تجھ سے وابستہ ہے اک یاد پرانی میری

 

[عمر سیف]

میں تجھے ڈھونڈنے یادوں کی کھلی سڑکوں پر
خشک پتوں کی طرح روز بکھر جاتا ہوں

 

[حجاب]

جہاں وہ اتنا بھولا تھا وہاں کچھ یاد بھی رکھتا
فقط اتنا تو کہہ دیتا کہ اُس نے مجھ کو چاہا تھا
ہمارا عشق کب کُھلتا کسی پر سعد ایسے ہی
یقین مانو کہ ہم نے خود زمانے کو بتایا تھا۔