بہادر شاہ ظفر ::::: گُلشن میں جب ادا سے وہ رنگِیں ادا ہنسے ::::: Bahadur Shah Zafar

طارق شاہ

محفلین
غزلِ


گُلشن میں جب ادا سے وہ رنگِیں ادا ہنسے
غُنچے کا مُنہ ہے کیا کہ جو پھر اے صبا ہنسے

دِیوانے کو نہیں تِرے پروا، کہ اے پری !
دِیوانگی پہ میری کوئی روئے یا ہنسے

روئے غمِ فِراق میں برسوں ہم، اے فلک
گر وصل کی خوشی میں کبھی اِک ذرا ہنسے

چارہ کرے اگر تِرے بِیمارِ عِشق کا
تدبِیرِ چارہ ساز پہ، کیا کیا قضا ہنسے

جو دِل گرفتہ غُنچۂ تصوِیر ہو ظفر
پھر اُس کو کیا ہنسائے کوئی اور وہ کیا ہنسے

بہادر شاہ ظفر
 
Top